1 SAMUEL 20 - BUKUIT NE TILIL

Choruanditab Daudi ak Jonatan

¹ Ak kimwei Daudi eng’ Naiot eng’ Rama, ak konyo komwa eng’ taitab Jonatan, kole, Kiayai nee? Nee tengektanyu? Nee chalwoktanyu eng’ taitab kwandang’ung’, si kocheng’ei sobondanyu?

² Ak kilenji, Ingolooit noto; memee; keero, mayaei baba kiy ne o anan ne ming’in, ama iborua: ak amu nee si koung’ena baba kiito? Ma u noto.

³ Ak kogeny, kiiyosio Daudi kogeny kole, Ingen kwandang’ung’ komie kole, Kianyoru chamet eng’ taing’ung’; ak kile, Amat konai Jonatan kiito, si maarogen: ago iman ko u ye sobei Jehovah, ak ko u ye sobei sobondang’ung’ agine, komi kakwautiet agenge kityo eng’ kwenunnyu ak meet.

⁴ Kolenji anyun Jonatan Daudi, Kit age tugul ne machei sobondang’ung’, ayaun kioto.

⁵ Ak kilenji Daudi Jonatan, Keero, leelei arawet mutai, ak kama kota nyoljina atebi, ama kitebi ak laitoriat mutai eng’ amisiet: ago chamwa awa, si awa aung’ge eng’ timin agoi betutab somok koskoleny.

⁶ Ngot kogeer kwandang’ung’ kole mami ane, imwachi anyun ilenji, Kosoma Daudi mising’ kole achamji kolabat kwo Bet-lehem nganasennyi: amu mi oloto tiseiywotab kenyit age tugul ne bo orenywa tugul.

⁷ Ngot komwa ko u noto, kole, Mie; konyoru anyun otwogindeng’ung’ kalyet; ago ngot konerech, inai anyun ile kagotil kole yaei kit ne ya.

⁸ Eng’ noto anyun iyachi ne mie otwogindeng’ung’; amu kiiyachi otwogindeng’ung’ arorutiet ne bo Jehovah koboten: ago ngot atinye tengekto, ibara inyendet; amu kalya si imutya kwandang’ung’?

⁹ Ak kile Jonatan, Ingolooit eng’ inye: amu ndangen ale kagotil baba kole koyaun kit ne ya, ko tos mamwaun?

¹⁰ Kolenji anyun Daudi Jonatan, Ng’o ne mwawa ngot kogowolun kwandang’ung’ eng’ koromnatet?

¹¹ Kolenji Jonatan Daudi, Nyo kebe timin. Kiba tuwai anyun timin.

¹² Kilenji Jonatan Daudi, Ingoek baoriat Jehovah, Kamuktaindetab Israel; ye tun ateebe baba mutai koteni asis, anan eng’ betutab somok, keero, ngot komi ng’olyot ne mie agobo Daudi, ko mayogun ak aborun?

¹³ Ingoyachi Jehovah Jonatan ko u noto, ak kosiir, ngot kochamei baba koyaun ne ya, ama aborun, ak amwaun, si kobiit iwe eng’ kalyet: ak ingotebi Jehovah koboten, ko u ye kimi koboto baba.

¹⁴ Ak iborua mieindab Jehovah, ma kota asobe kityo, si mamei:

¹⁵ ago kogeny meistoi mieindang’ung’ eng’ gonnyu koigeny: achicha, agot ye kagoisto Jehovah bunik alak tugul che bo Daudi eng’ ng’ony.

¹⁶ Koyai anyun Jonatan arorutiet koboto gotab Daudi kole, Ak tun mage Jehovah kioto eunekab bunikab Daudi.

¹⁷ Ak kiiyosiechi Jonatan Daudi ne bo aeng’, amu chamnyet ne o ne kiting’e inendet: amu kichamei inendet ko u ye kichamei sobondanyi.

¹⁸ Kilenji anyun Jonatan inendet, Leelei arawet mutai: ak tun kigeerei kele memi, amu mi ng’echereng’ung’ buch.

¹⁹ Ak ye kaibeni betusiek somok, ichortege ichakte, ak iit ole kigeung’ege ye kigimwaei ng’alechato, ak itebe ole negite koitab Esel.

²⁰ Ak amwok tabandanyi eng’ kipchabonik somok, ko u ye kamwoge kiy.

²¹ Keero, ayoktoi lakwet alenji, Ui cheng’ kipchabonik. Ngot amwachi lakwanato alenji, Keero, mitei kipchabonik komosi: inemu anyun ak inyo; amu mitei kalyet eng’ inye, ama mi ng’oiyondit, ko u ye sobei Jehovah.

²² Ago ngot amwachi weroto ko u noto alenji, Mitei komosin kipchabonik: iwe; amu kamwaun Jehovah iwe.

²³ Ak agobo ng’alek che kagemwa, inye ak ane, ko keero, mi Jehovah kwenunnyo.

²⁴ Kiunygei Daudi anyun eng’ timin: ak kingoleel arawet, koteb laitoriat koamis.

²⁵ Ak kitebe laitoriat ng’echerennyi ko u betusiek alak, eng’ ng’echeret ne ki negite inat: ak kitonon Jonatan, ak kitebe Abner ole negite Saul: ago kimi buch komostab Daudi.

²⁶ Ago kima mwa ng’olyo age tugul betunoto Saul: amu kilen, Kagonyonji kiy inendet; ma tilil inendet; iman ma tilil inendet.

²⁷ Ak ki mutai, ko kagoleel arawet, eng’ betut ne bo aeng’, ko kimi buch komostab Daudi: ak kilenji Saul Jonatan werinnyi, Amu nee si ma nyo weritab Jesii amisiet, amut, ak raini?

²⁸ Ak kiwolji Jonatan Saul kolenji, Kosoma Daudi mising’ kwo Bet-lehem:

²⁹ ak kole, Asomin ale, Chamwa awa; amu enyei bikab orennyo tiseiywot eng’ nganaset; ak kong’ata werit ne ketupche awa: ak nguno anyun, ko ngot ko kaanyoru chamet eng’ taing’ung’, asomin ale chamwa awa, ak awe ageer che kitupche. Koma nyo anyun mesetab laitoriat amu noto.

³⁰ Kolalyo anyun neregekab Saul agobo Jonatan, ak komwachi inendet kolenji, Inye weritab kwondo ne imaasat ak ko ngeleliot, tos mangen ale kiilewen weritab Jesii si tun ililane, ak koek kalilanetab ach ngorietab komet?

³¹ Amu kota kosobei weritab Jesii eng’ ng’ony, ko magigimitin anan kigimit bounateng’ung’. Iyokte anyun kimutwa inendet, amu meei iman.

³² Ak kiwolji Jonatan kwandanyi Saul kolenji, Kibarei amu nee? Koyai nee?

³³ Ak kitoor Saul inendet kolen kobar: konae noto anyun Jonatan kole kogotil kwandanyi kobar Daudi.

³⁴ Kong’eet anyun Jonatan eng’ meset eng’ neregek che ng’wonen, ak ma amis eng’ betutab aeng’ ne bo arawet: amu kiarogeni agobo Daudi, amu kiitewer kwandanyi.

³⁵ Ak ki eng’ karon, kwo Jonatan timin eng’ sait ne kiga ng’at Daudi, kobendi ak lakwet ne ming’in.

³⁶ Ak kilenji lakwanato, Labat si icheng’ kipchabonik che amwoktoi. Ak ye kilabati lakwet, komwokto kipchabet kondoe inendet.

³⁷ Ak kingoit lakwet ole kimi kipchabet ne kiga mwokto Jonatan, koguur Jonatan lakwanato, kolenji, Mata komi tai kipchabet?

³⁸ Ak kiguur Jonatan lakwet kolenji, Chakte, labat, mat igage. Ak kiiyum lakwanato bo Jonatan kipchabonik, ak konyo ole mi kiptaiyandennyi.

³⁹ Ago ma nai kiy age tugul lakwanato: Jonatan ak Daudi ichegei che kiingen ng’alechato.

⁴⁰ Ak kiigochi Jonatan karikyik lakwanatonyi, ak kolenji, Ui, ib tuguchu koba nganaset.

⁴¹ Ak ne matia ko kata kowendi lakwet, kong’eet Daudi eng’ ole tokyingei Murot ne bo Tai, kotiing’e togennyi ng’ony, ak kong’uruk konyil somok: ak king’ututgei, ak korirjigei, kot kotesak mising’ rirekab Daudi.

⁴² Ak kilenji Jonatan Daudi, Ui eng’ kalyet, amu ko u ye kagiyosie tuwai eng’ kainetab Jehovah, kele, Tebyei Jehovah eng’ kwenunnyo, ane ak inye, ak kwenutab iyotennyu ak iyoteng’ung’ koigeny. Ak king’eet kwo: ak kiwa Jonatan nganaset.