1 SAMUEL 2 - BUKUIT NE TILIL

Tiendab Hana ne bo kongoi

¹ Ak kisa Hana, kole, Igasegei muguleldanyu eng’ Jehovah, Kagotororit kuinennyu eng’ Jehovah: Kabarait kutinnyu kosiir bunikyuk; Amu abaibai eng’ yetuneng’ung’.

² Mami ne tilil ko u Jehovah; Amu mami age kobatenen: Ama mi ruandet ne u Kamuktaindennyo.

³ Amotes ong’alal eng’ menotet; Among’ komong’une kutuswekwok losetab ge; Amu Jehovah ko Kamuktaindetab naet, Ak inendet ne keerei ole teptoi boisionik.

⁴ Kigoilyo kwangokab bik che nyigonen, Ak kigegermene kimnatet icheget che kiginach.

⁵ Kigoaldagei si konyor amitwogik icheget che kobiyong’dos; Ak kigosisyo che kiamei rubet; Ee, kigosich tisab ne son; Ak nyaluli inendet ne tinyei lagok che chang’.

⁶ Barei Jehovah, ak kosoobi: Choortoi koba kererit, ak komutu kotogos.

⁷ Ibanani Jehovah chi, ak komogornoni: Inyeroti, ak koeeti agine.

⁸ Ing’eeti kibananok komong’une temburiek, Kanabu eng’ kapng’atat che matinyei kiy, Si kogochi kotebi ak bounik, Ak kosich ng’echeretab torornatet: Amu bo Jehovah tolochikab ng’ony, Ak kiinde ng’onyut kotonone choto.

⁹ Ribei kelyekab bikyik che tililen, Ago igochin kiptengeginik kosisyo eng’ ole imen; Amu maiterterisiei chi amu kimnatet.

¹⁰ Kitonatoni che ibeligei ak Jehovah; Tuljin ichek eng’ kipsengwet: Iruokyin Jehovah tabanwekab ng’ony; Ak kogochi kimnatet laitoriandennyi. Ak kotoror kuinetab nenyi ne kigiil.

¹¹ Ak kiwa Elkana gonnyi eng’ Rama. Ak kiboisiechi lakwet Jehovah eng’ taitab tisiindet Eli.

Tengektab werikab Eli

¹² Werikab Eli ko ki werikab Belial; kima nai ichek Jehovah.

¹³ Kingogoitochi tiseiywot ko ki biteetab tisiik eng’ bik, konyo otwogindetab tisiindet, ye kita kiyoi banyek, koting’e eut karnet ne kisagunegei somok ne kirutune banyek;

¹⁴ ak kiirookta karnanato teret orit, anan ko kibiriget, anan ko saburiet, anan ko teret age; kiibei tisiindet tugul che kainem karnanato. Kiyachin ko u noto Israelik tugul eng’ Silo che kibwanei yoto.

¹⁵ Kingotom kobeel mwaita, konyo otwogindetab tisiindet, ak kolenji chito ne kieng’sei, Konu bendo ne kiwatanjin tisiindet; amu maibei bendo ne kagiyo, ne igonu, kobate ne tuon.

¹⁶ Ak ngot kolenji chito inendet, Beelei ichek nguno iman sunetik, yeityo iib che te che machei sobondang’ung’; kowolu anyun kolen, Achicha, kona nguno: ak ngot ko megona, aibe eng’ kimnatet.

¹⁷ Ak ki o mising’ tengektab murenichoto eng’ taitab Jehovah: amu kiwech bik kagochinoikab Jehovah.

¹⁸ Ago kiboisiei Samuel eng’ taitab Jehovah, kota ko lakwet, kolaachi epod ne bo katanit.

¹⁹ Kinapchin kogeny kamet ngoriet ne ming’in, ak koipchin eng’ kenyit age tugul, ye kitogosu ak manong’otiondennyi kogoitoi tiseiywekab kenyit age togul.

²⁰ Ak kiiberur Eli Elkana ak osotiondennyi, kole, Ingogonin Jehovah iyotet eng’ kwonyi amu somet ne kiga kiarorji Jehovah. Yeityo koba ga.

²¹ Ak kirutochi Jehovah Hana, ak kimanach, ak kisich werik somok ak tibik aeng’. Ak kieet lakwet Samuel eng’ taitab Jehovah.

²² Kiga koosit Eli mising’; ak kigas tuguk tugul che kiyachin werikyik Israel tugul, ak ko u ye kiibegei ak kwonyik che kiboisiei eng’ kurgetab emait ne kituiyechin.

²³ Ak kilenji ichek, Amu nee si oyai tuguk che u cho? Amu agase eng’ bichu tugul boisionikwok che yaachen.

²⁴ Achicha, werikyuk; amu ma miachen ng’alek che agase: oyae bikab Jehovah kongelelso.

²⁵ Ngot koyachi chi chito age tengek, koruokyin Kamuktaindet: ago ngot koyachi chi tengek Jehovah, ko ng’o ne saei agobo inendet? Ago kima kas ng’alekab kwandanywa, amu kimachei Jehovah kobar ichek.

²⁶ Kieet anyun lakwanato Samuel, ak ki chamat eng’ Jehovah, ak eng’ bik agichek.

²⁷ Ak kinyonji chitab Kamuktaindet Eli, ak kolenji, Kamwa Jehovah ko u ni, Tos kiang’ang’jigei gotab kwandang’ung’, ye kimitei Misri eng’ gotab Parao?

²⁸ Ak kialewen inendet eng’ bororiosiek tugul che bo Israel koek tisiindennyu, kwo kotogosta ole mi kapkorosunnyu, kwo kobeel nyamdutik, ak kolaach epod eng’ tainnyu? Ak kiagochi gotab kwandang’ung’ kagochinoik tugul che bo Israelik che kigoitoi kobun mat?

²⁹ Amu nee anyun si otiar tiseiywekyuk ak kagochinoikyuk, che kiang’at eng’ meng’otennyu; ak igonyit weriguk kosiira, si onerie kagochinoik che eechen eng’ tugul che bo bikyuk Israel?

³⁰ Noto anyun, mwaei Jehovah, Kamuktaindetab Israel, kole, Kiamwa iman ale, wendoti eng’ tainnyu gong’ung’, ak gotab kwandang’ung’, koigeny: ago kamwa Jehovah nguno kole, Ingolooit eng’ ane; amu ichek che konyita, agonyiti, ago icheget che maiita kole a kiy, kesasei.

³¹ Keero, bwanei betusiek che atile eung’ung’ ak eutab gotab kwandang’ung’, kot ko mabiit boiyo eng’ gong’ung’.

³² Ak igeere nyalildab meng’otennyu eng’ magornatet tugul ne igochin Jehovah Israel: ama biitu boiyo eng’ gong’ung’ koigeny.

³³ Ak ching’ung’ ne maistoi ane eng’ kapkorosunnyu, koegu ne igesu konyeguk, ak kogochi arogenet muguleldang’ung’: ak begu iyotet tugul ne bo gong’ung’ kota ko neran.

³⁴ Ak egu ni kaborunet, ne tun nyonjin weriguk aeng’, Hopni ak Pineas; begu tuwai eng’ betut agenge.

³⁵ Ak ang’eetyige tisiindet ne kiyani, ne tun yaei kit ne mi muguleldanyu ak eng’ kabwatutikyuk: ak ateekyi inendet got ne kim; ak kowendote taitab nenyu ne iilat koigeny.

³⁶ Ak tun nyonei age tugul ne kang’et eng’ gong’ung’ konyo kong’urukyi inendet si konyor fedaiyat ak makatiat, ak kole, Asomin ale, indea aek age eng’ boisionikab tisiik, si aam agot makatiat kitigin.