1 SAMUEL 19 - BUKUIT NE TILIL

Kowechei Saul Daudi

¹ Ak king’alalji Saul Jonatan werinnyi, koboto otwogikyik tugul, kolenji kobar Daudi.

² Ago kibaibai mising’ Jonatan weritab Saul agobo Daudi. Ak kimwachi Jonatan Daudi, kolenji, Cheng’ei baba Saul kobarin: noto anyun asain mising’ ale, ripge karon, ak itebi eng’ ung’ot, iunyge:

³ si amanda ak awe atonone ye negite baba eng’ kewet eng’ ole imi, ak keng’alal ak baba agobo inye; ak ngot ageer kiy amwaun.

⁴ Ak king’alalji Jonatan Saul kwandanyi, kochoi Daudi, kolenji, Amat koyachi tengek laitoriat otwogindennyi Daudi, amu ma yaun tengek, ak amu kagomiagitu mising’ boisionikyik che kogoyaun:

⁵ amu ma iit sobondanyi, ak kogobar Pilistindet, ak kiyai Jehovah yetunet ne o agobo Israel tugul: kiigeer kioto aginye, ak kiibaibaitu: amu nee anyun si iyachi tengek korotik che matinyei tengek, ibar Daudi buch?

⁶ Ak kigas Saul ng’olyotab Jonatan: ak kiiyosio Saul kole, Ko u ye sobei Jehovah, ko magibarei inendet.

⁷ Ak kiguur Jonatan Daudi ak koborji Jonatan inendet tuguchoto tugul. Ak kiimut Jonatan Daudi kwo ole mi Saul, ak kitebe tainnyi ko u eng’ tai.

⁸ Ak kibiit luget kogeny: ak kimanda Daudi kwo kobargei ak Pilistik, ak kibar ichek eng’ baret ne o; ak kimwei eng’ tainnyi.

⁹ Ak kinyonji Saul tamirmiriet ne ya ne kibunu Jehovah, ye kitebyei eng’ gonnyi, kotinyei ng’otit eng’ eunnyi; ak kibut Daudi kibugandet eng’ eunnyi.

¹⁰ Ak kilen Saul kotoor Daudi eng’ ng’otit kosore inat; ago kichilil eng’ taitab Saul, ak kitoor inatut eng’ ng’otit: ak kimwei Daudi, ak kochilil kemounoto.

¹¹ Ak kiiyokto Saul bik koba gotab Daudi, korib inendet kole si kobar inendet karon: ak kimwachi Mikal Daudi, osotiondennyi, kolenji, Ngot ko mesoru sobondang’ung’ kemouni, kebarin mutai.

¹² Kochoorta anyun Mikal Daudi kwo ng’ony kobun tirisiet: ak kiwa komwei, kochilil.

¹³ Ak kinam Mikal kanamwet, ak komogon eng’ itogut, ak kotichine met mutoit ne bo kororikab ng’ororek, ak kotuge ngoroik.

¹⁴ Ak kingoyokto Saul bik koba konam Daudi, komwa kwondanyi kole, Miani.

¹⁵ Ak kiiyokto Saul bichoto koba kogeer Daudi, kolenji, Omutwa eng’ itogut si anyo abar.

¹⁶ Ak kingobwa go bichoto, ogeero, kimi kanamwet itok, komi metinnyi mutoinoto bo kororikab ng’ororek.

¹⁷ Ak kilenji Saul Mikal, Amu nee si igena ko u ni ak ichunde bunyondennyu kwo, kot ko kagochilil? Ak kiwolji Mikal Saul kolenji, Kilenja, Bagakta awa; kalya si imach abarin?

¹⁸ Komwei anyun Daudi, ak kochilil, ak kwo ole mi Samuel eng’ Rama, kwo komwachi tuguk tugul che kiyachi inendet Saul. Kiba tuwai ak Samuel koba komeny Naiot.

¹⁹ Ak kigimwachi Saul kelenji, Keero, mitei Daudi Naiot eng’ Rama.

²⁰ Ak kiiyokto Saul bik koba konam Daudi; ak kingogeer tuiyetab maotik komaotendos ng’alek, kotononi Samuel kondochin ichek, konyonji Tamirmirietab Kamuktaindet bikab Saul, ak komaotenso agichek.

²¹ Ak kingemwachi Saul ng’alechato, koyokto bik alak, ak kimaotenso agichek. Ak kiiyokto Saul bik, ne bo somok, ak kimaotenso agichek.

²² Kiwa inendet agine Rama, ak kiit ole mi keringet ne o ne bo beek ne mitei Seku: ak kiteeb kole, Mi ano Samuel ak Daudi? Ak kile chito age, Keero, mi Naiot eng’ Rama.

²³ Ak kiwa oloto bo Naiot eng’ Rama: ak kinyonji inendet agine Tamirmirietab Kamuktaindet, ak kiwa, komaotenot, kot koit Naiot eng’ Rama.

²⁴ Ak kiireek ngoroikyik, ak kimaoten agine eng’ taitab Samuel, ak koru ach ngor betunoto tugul ak kemounoto tugul. Noto anyun mwaei ichek kole, Bo Saul agine maotik?