1 SAMUEL 18 - BUKUIT NE TILIL

Chamnyet ne kichame Jonatan Daudi

¹ Ak kingo kagoges inendet ng’alaljinetab Saul, konamgei sobondab Jonatan ak sobondab Daudi, ak kicham Jonatan inendet ko u sobondanyi.

² Ak kiimut inendet Saul betunoto, mata kochamji kwo ga kogeny, gotab kwandanyi.

³ Kiiyomisgei anyun Jonatan ak Daudi, amu kicham Jonatan inendet ko u sobondanyi.

⁴ Ak kiireek Jonatan ngoriennyi ne bo barak ne kiilaachi, ak kogochi Daudi, ak ngoriennyi ne koi, ak rotwennyi ne bo chok, ak kwangennyi, ak birenennyi.

Ng’etkondab Saul agobo Daudi, ak kocheng’ei kobar inendet

⁵ Kiwa Daudi oldo age tugul ole kiiyokto Saul, ak kitebi eng’ ng’omnatet: ak kiinde Saul inendet koboi murenikab luget, ak kimieit kioto eng’ taitab bik tugul, ak eng’ taitab otwogikab Saul agichek.

⁶ Ak ye kingobwanei ichek, koweeksei Daudi kobunu baretab Pilistindet, komong’ gotab kor eng’ nganasok tugul che bo Israel, kotienonu ak kourereni, kotorogu laitoriat Saul, kobirei sugutisiek che mengechen, eng’ boiboiyet, koboto tuguk che kibutei.

⁷ Ak kitienjingei kobogorisiechoto kourerendos kolen, Kibar Saul elfusiekyik, Kibar Daudi tamanusiekab elfusiekyik.

⁸ Ak kinerech Saul kot, ak ma ibaibai inendet mwaonato, ak kimwa kole, Kagoiityi Daudi tamanusiekab elfusiek, koiitya elfusiek kityo: ko nee age ne kang’et ne nyoru kobate laitornatet?

⁹ Ak kigeerote kong’ ne ya Saul Daudi koboch betunoto agoi.

¹⁰ Ak eng’ betut ne kiisubi betunoto, konyonji Saul tamirmiriet ne ya eng’ kimnatet, ne kibunu Kamuktaindet, ak King’alal eng’ go ko u chi ne amei iywek: ak kibut Daudi ketubet eng’ eunnyi, ko u ye kicham koyaei betut age tugul: ak kitinyei Saul ng’otit eng’ eunnyi.

¹¹ Ak kitoorta ng’otit Saul; amu kile, Atoore Daudi kosore koit inat. Ak kiistoegei Daudi tainnyi konyil aeng’.

¹² Ak kiiywei Saul Daudi, amu kimi Jehovah koboto inendet, ak kiga kobagakta Saul.

¹³ Kiisto Saul anyun inendet eng’ ole mi, ak kiinde inendet koek kiptaiyatab elfut; ak kimandoi ak koweeksei eng’ taitab bik.

¹⁴ Ak kitebi Daudi eng’ ng’omnatet eng’ ortinwekyik tugul; ak kimi Jehovah koboto inendet.

¹⁵ Kingogeer Saul kotebyei Daudi eng’ ng’omnatet ne o, koiywei inendet.

¹⁶ Ago kicham Israel tugul ak Juda Daudi; amu kimandoi ak koweeksei eng’ tainywa.

¹⁷ Ak kilenji Saul Daudi, Keero, cheptanyu ne o, Merab, agonin inendet itun: egu kityo nyiganennyu, ak iyai lugosiekab Jehovah. Amu kile Saul, Mamache kotwa eunekyuk inendet, ago ingobar inendet eunekab Pilistik.

¹⁸ Ak kilenji Daudi Saul, A ng’o ak nee sobondanyu, anan ko oretab baba eng’ Israel, kot aegu sandetab laitoriat?

¹⁹ Ago eng’ betut ne kita kigochin Merab Daudi cheptab Saul, kigochi Adriel Meolatindet kotun.

²⁰ Ak kicham Mikal Daudi, cheptab Saul: ak kigimwachi Saul, ak kiibaibai ng’olyondonoto inendet.

²¹ Ak kimwa Saul kole, Agochini inendet, si kobiit koek mestet eng’ Daudi, ak si kobiit kobar inendet eutab Pilistik. Komwachi anyun Saul Daudi kolenji ne bo aeng’, Iegu ra sandet.

²² Ak king’at Saul otwogikyik, kolenji, Ong’alal ak Daudi eng’ ung’ot, olenji, Keero, baibai laitoriat eng’ inye, ak kochamin otwogikyik tugul: noto anyun ko mie iegu sandetab laitoriat.

²³ Ak kimwachi otwogikab Saul Daudi ng’alechato kogas. Ak kimwa Daudi kole, Ogeere ko kit ne ming’in eng’ okwek koek chi sandetab gab laitoriat, ago ane, ko a chi ne banan, ne sasat?

²⁴ Ak kimwachi anyun otwogikyik Saul, kolenji, Kang’alal Daudi ko u ni.

²⁵ Ak kile Saul, Omwachini Daudi ko u ni, olenjini, Mamachei laitoriat kanyiok alak tugul, ago machei irirenik bogol che bo Pilistik, si kobiit keyaaktochi mugetut bunikab laitoriat. Ak kiibwati Saul kole si kome Daudi eng’ eunekab Pilistik.

²⁶ Ak kingomwachi otwogikyik Daudi ng’alechuto, kobaibait komie Daudi koek sandetab laitoriat. Ak kotom kogesgei betusiechoto;

²⁷ kong’eet Daudi kwo koboto bikyik, koba kobar Pilistik bik bogol aeng’; ak kiib Daudi irirenikwak, ak kogochi laitoriat irirenichoto tugul, si koek sandetab laitoriat. Ak kiigochi Saul inendet Mikal cheptanyi kotun.

²⁸ Ak kigeer Saul ak konai kole komi Jehovah koboto Daudi ak kicham Mikal cheptab Saul Daudi.

²⁹ Ak kites Saul koiywei Daudi; ak kiek Saul bunyotab Daudi betut age tugul.

³⁰ Kimanda anyun bounikab Pilistik: ak ye kicham komandoi, kotebi Daudi eng’ ng’omnatet kosiir otwogik tugul che bo Saul; kot kegonyit kainennyi mising’.