1 SAMUEL 17 - BUKUIT NE TILIL

Daudi ak Goliat

¹ Kiiyum anyun Pilistik lugosiekwak koba luget, ak kiiyumgei eng’ Soko, ne bo Juda, ak kiteech kwenutab Soko ak Aseka, eng’ Epes-damin.

² Ak kiiyumgei bikab Israel koboto Saul, ak kiteech atebwetab Ela, ak kotet luget kobargei ak Pilistik.

³ Ak kitonone Pilistik tulwet komosta age, kotonone Israel tulwet komosta age: ak kimi atebwet kwenunywa.

⁴ Kimong’ nyiganet age eng’ nganasetab Pilistik, ne kigiguure Goliat, ne bo Gat, ne ki koindanyi ko ki kakwautik lo che bo eut ak inchisiek sogol.

⁵ Ak kitinyei kutwet ne bo sugunwet eng’ metinnyi, ak kiilaachi ngoriet ne bo karik; ak nyigisindab ngorionoto ko ki sekelisiek elfusiek mut che bo sugunonik.

⁶ Ak kitinyei karikab sugunonik eng’ kelyekyik, ak ndiritab sugunwet eng’ batennyi.

⁷ Ak ki kergei irumetab ndirinnyi ak ketit ne taachin usisiek chito ne nabisiei; ak meleitab ng’otinnyi ko ki sekelisiek bogol lo che bo karik nyigisindanyi: ak kiwendi chito ne kiipchin long’et kondoe inendet.

⁸ Ak kitonon ak kotwekyi lugosiekab Israel eng’ kutit ne o, kolenji, Amu nee si omong’u otet lugeng’wong’? Ma a Pilistindet, ko o otwogikab Saul? Olewenjige chito, ak ongochorgei konyonja.

⁹ Ngot komuch kebarge tuwai, ak kobaran, keegu anyun otwogikwok: ago ngot aterter inendet, ak abar, oegu anyun otwogikyok, ak ootech.

¹⁰ Ak kile Pilistindonoto, Arenye lugosiekab Israel ra; ogona chito, si kobiit kebarge.

¹¹ Ak kingogas Saul ak Israel tugul ng’alechato bo Pilistindet, kotoptobenso, ak koiyweis mising’.

¹² Daudi ko ki weritab Epratindonoto bo Bet-lehem-juda, ne kainennyi ko ki Jesii; ak kitinyei werik sisiit: ak ki boiyot chichoto eng’ betusiekab Saul, kiga koosit eng’ kwenutab bik.

¹³ Ak kiga ba luget werik che eechen somogu che bo Jesii kosub Saul: ak kainaikab werikyik somok che kiga ba luget ko ki Eliab, taita, ak ne rubei inendet ko Abinadab, ak ne bo somok ko Sama.

¹⁴ Ak ki ne ming’in Daudi: ak kiga isub Saul che eechen somogu.

¹⁵ Ak kiwendi Daudi oldab Saul, ak koweeksei koyagi kechirekab kwandanyi eng’ Bet-lehem.

¹⁶ Ak kirigu Pilistindet karon ak koskoleny, ak koborugei eng’ betusiek artam.

¹⁷ Ak kilenji Jesii werinnyi Daudi, Ipchi tupchosieguk epah agenge ne bo bek che kagigel, ak makatinichu taman, ak iipchi tupchosieguk eng’ nganaset, ichaktae;

¹⁸ ak iipchi mugunichu taman bo chego kiptaiyatab elfunywa, ak igeer ole chamdoigei tupchosieguk, ak iibu wolunenywa.

¹⁹ Kimi Saul, ak ichek, koboto bik tugul che bo Israel, atebwetab Ela, kobaregei ak Pilistik.

²⁰ Ak king’eet Daudi karon mising’, ak kobagakyi kechirek ribindet, ak kiib tuguchoto ak kwo, ko u ye kiga ng’at Jesii; ak kiit ole mi karisiek, ye kiwaachei luget agobo boriet, komachei komanda koba koyai luget.

²¹ Ak kitet luget Israel ak Pilistik, kotorjingei lugosiek tuwai.

²² Kibagakyi Daudi tugukyik ribindetab tuguk, ak kolabat ye mi luget, kwo kogat werik che tupcho.

²³ Ak ye kita kong’alaldos ak ichek, ogeero, kotogos nyiganet, Pilistindet ne bo Gat, ne kainennyi ko ki Goliat, komong’une kweanaikab Pilistik, ak komwa ng’alek che cham komwaei: ak kigas Daudi.

²⁴ Ak kingogeer bik tugul che bo Israel chichoto, komwee inendet, ak koiywei kot.

²⁵ Ak kile bikab Israel, Kaogeer chichi katogos? Katogosu iman konyo korenyei Israel: ak chito ne barei inendet, kogochin laitoriat inendet magornatet ne o, ak kogochi cheptanyi kotun, ak kotiach gotab kwandanyi eng’ Israel.

²⁶ Ak king’alalji Daudi bik che kitonondos eng’ ye mi inendet, kolenji, Kiyachin nee chito ne barei Pilistindoni, ak koisto tewernatani eng’ Isrtael? Amu ng’o Pilistindoni ma kimuratan, kot koreny lugosiekab Kamuktaindet ne sobei?

²⁷ Ak kiwolji bichoto inendet ko u ni, kolenji, Kiyachin ko u noto chito ne barei inendet.

²⁸ Ak kigas Eliab ng’etab kamet ne o kong’alaljin bichoto; ak kilalyo neregekab Eliab agobo Daudi, ak kile, Amu nee si ichoruge? Ak kebagakyi ng’o kechirechoto ng’ering’ eng’ ong’atet? Angen menoteng’ung’, ak yaitietab muguleldang’ung’; amu kechoruge inyo igeer luget.

²⁹ Ak kile Daudi, Kawech nee nguno? Tos mami kiy ne bo bani?

³⁰ Ak kiwelelgei kotokyigei chito age, ak komwa ko u atgai: ak kiwolji bik inendet kogeny ko u tai.

³¹ Ak ye kingegas ng’alek che kimwa Daudi, keba kemwachi Saul; ak kiyokto chito koguur inendet.

³² Ak kilenji Daudi Saul, Amat kome chi mugulel agobo inendet; wendi otwogindeng’ung’ kobaregei ak Pilistindonito.

³³ Ak kilenji Saul Daudi, Memuchi iwe obargei ak Pilistindonito: amu ta ko i ming’in, ak inendet ko chitab luget koboch ming’inatennyi.

³⁴ Ak kilenji Daudi Saul, Kiiyagi otwogindeng’ung’ kechirekab kwandanyi; ak kingonyo ng’etundo, anan tiondo age ne kergei ak keerit, ak konam aruetab kechir eng’ akwet,

³⁵ asub, awe abar, ak asoru eng’ kutinnyi: ak kingong’eet kole kobara, anam tamnet, akwer, ak abar.

³⁶ Kibar otwogindeng’ung’ tiong’ichoto tuwai, ng’etundo ak noto ne kergei ak keerit; ak igeitu Pilistindonito ma kimuratan age eng’ ichek, amu kogoreny lugosiekab Kamuktaindet ne sobei.

³⁷ Ak kimwa Daudi kole, Jehovah ne kisorua eng’ siokab ng’etundo, ak eng’ siokab tionyoto, kosorua eng’ eutab Pilistindoni. Ak kilenji Saul Daudi, Ui, ak mi Jehovah koboten.

³⁸ Ak kiilaakyi Saul Daudi ngoriennyi ne bo luget, ak kogerjine metit kutwetab sugunwet, ak kiilaakyi ngorietab karik.

³⁹ Ak kiratyi Daudi ngoriennyi rotwennyi bo chok, kolen kwo; amu kitom kotiem. Ak kilenji Daudi Saul, Mamuchi aib tuguchu; amu tom atiem. Ak kiireek Daudi.

⁴⁰ Ak kinam kiroktanyi, ak kokwechigei kibargook mut eng’ kererut, ak konde loletab mestowek ne kitinyei, noto ko ki suberennyi; ak kimi eunnyi borowet ne kiwirtoe koita: ak kirikyi Pilistindet.

⁴¹ Ak kinyo Pilistindet korikyi Daudi; ak kiindoe inendet chito ne kiipchin long’et.

⁴² Ak kingogeerot Pilistindet ola tugul, kogeer Daudi, ak kosas: amu kita ko ming’in, ak ki birir, ak kotinyei toget ne kararan.

⁴³ Ak kilenji Pilistindet Daudi, Tos a seset kot inyonja ak kirokwek? Ak kichub Pilistindonoto Daudi eng’ kanamonikyik.

⁴⁴ Ak kilenji Pilistindet Daudi, Nyo ole ami, si kobiit agochi bortang’ung’ taritikab barak, ak tiong’ikab timin.

⁴⁵ Yeityo kolenji Daudi Pilistindonoto, Kenyonja ak rotwetab chok, ak ng’otit, ak ndirit: ago kanyonjin eng’ kainetab Jehovah ne bo lugosiek, Kamuktaindetab lugosiekab Israel, ne koireny.

⁴⁶ Indein rani Jehovah eunnyu; ak awirin, ak atil meting’ung’, ak agochi rani muswekab lugetab Pilistik taritik che bo barak, ak tiong’ikab timin che bo ng’ony; si kobiit konai ng’ony tugul kole, mi Kamuktaindet Israel:

⁴⁷ ak si kobiit konai tuiyoni tugul kole, masorune chi Jehovah rotwetab chok ak ng’otit: amu bo luget Jehovah ak indeok eunekyok.

⁴⁸ Ak kingong’eet Pilistindet konyo korik, kotorok Daudi, kochakta Daudi, kolabat kotokyigei ole mi luget kotorokta Pilistindet.

⁴⁹ Ak kiirooch Daudi eut lolennyi, ak konem koita, konde borowet, ak kowir Pilistindet kokwer turietab toget; ak kichut koita toget orit, ak kiibut kondoe met.

⁵⁰ Koterter anyun Daudi Pilistindet eng’ borowonoto bo koita, kiwir Pilistindet ak kobar inendet; ago kima komi rotwo ne bo chok eutab Daudi.

⁵¹ Kolabat anyun Daudi, kwo kotonone Pilistindet, ak konam rotwetab Pilistindonoto, kong’us eng’ choget, ak kobar, ak koebe kaatit kong’et. Ak kingogeer Pilistik kole kagome nyiganennywa, komwei.

⁵² Ak king’eetyo bikab Israel ak che bo Juda, ak kowaach, ak koon Pilistik, agoi koit Gat, agoi kurgotikab Ekron. Ak kiibutyot eng’ oret ne wendi Saaraim Pilistik che kigiguoten, agoi Gat, ak Ekron.

⁵³ Ak kiweek lagokab Israel eng’ onet ne kionei Pilistik, ak konyaban nganasenywa.

⁵⁴ Ak kiib Daudi metitab Pilistindonoto, konyo Jerusalem; ago kigonore emainnyi karikab Pilistindet.

⁵⁵ Ak kingogeer Saul Daudi kowendi kobaregei ak Pilistindet, koteebe Abner ne ki kiptaiyatab luget, kolenji, Abner, bo gab ng’o weri? Ak kile Abner, Ko u ye sobei sobondang’ung’, ee laitoriat, ko mangen.

⁵⁶ Ak kile laitoriat, Teeb ole bo werito.

⁵⁷ Ak ye kingoweeksei Daudi kobunu baretab Pilistindet, konam Abner inendet ak komut kwo taitab Saul, kotinyei metitab Pilistindet eng’ eunnyi.

⁵⁸ Ak kiteebe Saul kolenji, I bo gab ng’o, weri? Ak kiwolji Daudi kolenji, A weritab otwogindeng’ung’ Jesii, Bet-lehemindet.