1 SAMUEL 16 - BUKUIT NE TILIL

Koiili Samuel Daudi koek laitoriat

¹ Ak kimwachi Jehovah Samuel kolenji, Irirjini Saul agoi kotianit amu koaesie inendet si mata koek laitoriat eng’ Israel? Inde mwaita laleng’ung’ konyi, ak iwe, ayoktoin iwe oldab Jesii Betlehemindet: amu kaalewenjige laitoriat eng’ werikyik.

² Ak kimwa Samuel kole, Awetitoi ano? Ngot kogas Saul, kobara. Ak kilenji Jehovah, Kweri roriat, ak imwa ile, Kanyo aeng’ji Jehovah.

³ Ak iguur Jesii konyo ole itisisie, si aborun kit ne iyae: ak iilwa chito ne amwaun.

⁴ Ak kiyai Samuel kioto kiga mwa Jehovah, ak kinyo Bet-lehem. Ak kitorok inendet boisiekab nganaset, kobotanionu, ak kolenji, Inyone eng’ kalyet?

⁵ Ak kile, Ee, anyone eng’ kalyet: kanyo anyo aeng’ji Jehovah: otabange anyun, ak obwa kebe ole atisisie. Ak kiitaban Jesii ak werikyik, ak koguur ichek kobwa ole tisisie.

⁶ Kingoit, kogeer Eliab, ak kole, Mitei iman ne iilat ne bo Jehovah tainnyi.

⁷ Ago kilenji Jehovah Samuel, Amat igeer togennyi, anan ko koindab tononennyi; amu kaesie inendet: amu mageerei Jehovah ko u ye keerei bik; amu keerei bik itonda, ago keerei Jehovah muguleldo.

⁸ Koguur anyun Jesii Abinadab, ak kolenji kosiirto eng’ taitab Samuel. Ak kile, Ma lewen agine Jehovah nito.

⁹ Yeityo kolenji Jesii Sama kosiirto. Ak kile, Ma lewen agine Jehovah nito.

¹⁰ Ak kilenji Jesii werikyik tisab kosiirto eng’ taitab Samuel. Ak kilenji Samuel Jesii, Ma lewen Jehovah chuto.

¹¹ Ak kilenji Samuel Jesii, Mi yu lagoguk tugul? Ak kile, Ta komi ne ming’in, keero, iyagi kechirek. Ak kilenji Samuel Jesii, Iyokte chito kwo komut inendet: amu magitebye ng’ony agoi koit.

¹² Ak kiiyokto chito, ak kiimut inendet. Ki birir, ak ki kararan togennyi, ak ki kararan. Ak kile Jehovah, Ng’eet, iil inendet: amu inendet nito.

¹³ Konem anyun Samuel lalet ne mi mwaita, ak koiil inendet eng’ kwenutab tupchosiekyik: ak kinyonji Tamirmirietab Jehovah Daudi eng’ kimnatet koboch betunoto agoi. Kong’eet anyun Samuel, ak kwo Rama.

Kobutyin Daudi Saul kibugander, aki koipchinoti karik

¹⁴ Ak kiga kwo Tamirmirietab Jehovah eng’ Saul, ak kiimu inendet tamirmiriet ne ya ne kibunu Jehovah.

¹⁵ Ak kimwachi otwogikyik Saul, kolenji, Keero, imuin tamirmiriet ne ya ne bunu Kamuktaindet.

¹⁶ Ingong’at kiptaiyandennyo otwogikyik, che mi tainnyi, kocheng’ chito ne butin ketubet: ye nyonji tamirmiriet ne ya ne bunu Kamuktaindet, kobut ketubet eng’ eunnyi, si isob.

¹⁷ Ak kilenji Saul otwogikyik, Ocheng’wa chito ne ingen kobut ketubet komie, ak omutwa inendet.

¹⁸ Kowolji anyun age eng’ murenjoto chiget, kolenji, Keero, kiageer werit age ne bo Jesii Bet-lehemindet, ne butin, ak ko chito ne kim ne tinyei nyiganatet, ak ko chitab luget, ak ko ng’om eng’ ng’alalet, ak ko chito ne kararan, ak komi Jehovah koboto inendet.

¹⁹ Koyokto anyun Saul bik koba oldab Jesii, koba kolenji, Iyokwa Daudi wering’ung’, ne iyagi kechirek.

²⁰ Ak kichob Jesii sigiriet ak koganapchi amitwogik, ak sotet ne mi divaik, ak aruetab ng’oror, koyoktae Daudi werinnyi koipchi Saul.

²¹ Ak kiit Daudi oldab Saul, ak kotonon eng’ tainnyi: ak kicham Saul inendet mising’; ak kiek chito ne ipchin karikyik.

²² Ak kiiyokto Saul chito kwo oldab Jesii, kwo kolenji, Asomin ale, chamji Daudi kotonone tainnyu: amu kogonyor chamet eng’ ane.

²³ Ak ye kiga nyonji Saul tamirmiriet ne ya ne bunu Kamuktaindet, konem Daudi ketubet ak kobut: kogaigait anyun Saul, ak komieit kogeny, ak kiwa eng’ inendet tamirmiriet ne ya.