1 SAMUEL 14 - BUKUIT NE TILIL

Kobokyin Jonatan Pilistik ak koterteri

¹ Kilenji betut age Jonatan weritab Saul muren age ne kiipchin karikyik, Nyo kebe kelande ole mi lugetab Pilistik, ne mi bitonin. Ago ma mwachi kwandanyi.

² Ak kitebe Saul tabandab Gibea ketit kel ne bo logoek, ne mi Migron: ak ki olo bo bogol lo murenik che kimi ak inendet;

³ koboto Aija, weritab Aitub, ng’etab kametab Ikabod, weritab Pineas, weritab Eli, tisiindetab Jehovah eng’ Silo, ne kiilaachi epod. Ago kima nai bik kole kakwa Jonatan.

⁴ Ak kimi ruandet ne ng’atib komosi, komi age komosin eng’ kwenutab kererjosiek che kimachei Jonatan kobun kolanda kwo ole mi lugetab Pilistik: ak kainetab age ko ki Boses, ak kainetab age ko ki Sene.

⁵ Kiga tonon ruandet age eng’ murot ne bo katam eng’ taitab Mikmas, kotonon age eng’ murot ne bo tai eng’ taitab Geba.

⁶ Ak kilenji Jonatan neranet ne kiipchin karikyik che bo luget, Nyo kelande kebe ole mi lugetab chu ma kimuratan: abere imuchi kotoretech Jehovah: amu mami kiy ne ete Jehovah kosor eng’ che chang’ anan ko eng’ che ng’ering’.

⁷ Ak kilenji inendet chito ne kiipchin karik, Yai tuguk tugul che mi muguleldang’ung’: welelge, keero, ami koboten ko u eng’ muguleldang’ung’.

⁸ Yeityo kole Jonatan, Keero, kilandoi kebendi ole mi bichoto, ak kiborjige.

⁹ Ngot komwawech ko u ni kole, Otebi kot kebwa ole omi; ketonondosi anyun eng’ oldanyo, magitogostoi ole mi ichek.

¹⁰ Ago ngot kolenjech, Otogosu ole kimi; ketogoste anyun: amu kagonde Jehovah ichek eunekyok: ak egu nito kaborunet eng’ achek.

¹¹ Ak kiiborjigei ichek tuwai lugetab Pilistik: ak kile Pilistik, Ogeero, kamong’ Hebranik eng’ keringonik ole koga ung’egei.

¹² Kilenji bikab lugonoto Jonatan ak chito ne kiipchin karik, Otogosu ole kimi, si kiboruok kiy. Ak kilenji Jonatan chichoto kiipchin karik, Togosu isubwa: amu kagonde Jehovah ichek eunekab Israel.

¹³ Ak kiwa Jonatan kolany eng’ eunek ak kelyek, ak kiisubi inendet chichoto kiipchin karik: ak kiibutyo ichek eng’ taitab Jonatan; ak kibarat ichek eng’ let chito ne kiipchinoti karik.

¹⁴ Ak baronato bo tai ne kibar Jonatan ak chito ne kiipchin karik, ko ki olo bo bik tiptem, eng’ koret ne bo kebebertab ekait.

¹⁵ Ak kibiit botanet eng’ nganaset, ak eng’ emet, ak eng’ bik tugul; ak kibotan agine luget koboto luulik: ak kibotan ng’ony, kot kobiit botanet ne o, ne siirtoot.

¹⁶ Ak kigeer ribikab Saul eng’ Gibea ne bo Benjamin; ak ogeero, kibetyo bichoto chang’; ak kiyesta, koba komosi ak komosi.

¹⁷ Kolenji anyun Saul bik che kimi koboto inendet, Oiit bik nguno, ak ogeer chito ne kakwa eng’ achek. Ak kingo kagoit, ogeero, kima komi Jonatan ak chito ne kiipchinoti karik.

¹⁸ Ak kilenji Saul Aija, Ibu moingetab Kamuktaindet konyo yu. Amu kimi moingetab Kamuktaindet koboto lagokab Israel eng’ betusiechoto.

¹⁹ Ak ye kita kong’alaljin Saul tisiindet, koeet bolatet kotesak eng’ nganasetab Pilistik: ak kilenji Saul tisiindet, Iste eung’ung’.

²⁰ Ak kiiyumgei bik tugul che kimi ak Saul koboto inendet, ak kobwa luget: ak ogeero, kibar chi tugul chito ne kitokyigei, ak kieet mising’ barisiet.

²¹ Ak kiweek Hebranik che kimi koboto Pilistik ko u ye ki u eng’ tai, che kiga togosta koboto icheget koba nganaset, kobun korotinwek che kiga yiem; konamgei choto agichek koboto Israelik che kimi koboto Saul ak Jonatan.

²² Ko u noto bik tugul che bo Israel che kiga unygei eng’ emetab tulonokab Epraim, kingogas kole kamwei Pilistik, koon agichek mising’ eng’ lugonoto.

²³ Kosor anyun Jehovah Israel eng’ betunoto: ak kilanda luget kwo Bet-aben.

²⁴ Ak kinyalilso Israel eng’ betunoto: ago kilenji Saul bik koyosio kole, Chubot chito ne amei amit age tugul kot koit koskoleny, ak keyaaktawa mugetut eng’ bunikyok. Ko ma chamjam anyun chi age tugul amit eng’ bichoto.

²⁵ Ak kiba bik tugul osnet; ak kimi kumik ng’ony.

²⁶ Ak kingoit bik osnet, ogeero, kosoi kumik: ago ma inde chi kut eng’ eunnyi; amu kiiywei bik kayosiet.

²⁷ Ago kima kas Jonatan ye king’atei kwanda bik eng’ kayosiet: kiiyogoito anyun kirokto ne kimi eunnyi, ak kotoore masamek, ak konde kutit; ak kiyatogis konyekyik.

²⁸ Kowol anyun age eng’ bik, kole, King’at kwandang’ung’ bik eng’ kayosiet, eng’ kimnatet kole, Chubot chito ne amei amitwogik eng’ betuni. Ak kiga kong’etyo bik.

²⁹ Kile Jonatan anyun, Kigoiim emet baba: asomok ale, ogeer ole kagiyatita konyekyuk, amu kachamjam kitigin eng’ kumiandani.

³⁰ Kotam nee nda kaga am bik tugukab bunikwak che kanyor ko u ye machei? Amu kata biitu baret ne o eng’ Pilistik.

³¹ Ak kibar Pilistik eng’ betunoto koboch Mikmas kot koit Aijalon: ak king’etyo bik mising’.

³² Ak kiruachi bik tuguk che kinyaban, ak kinam kechirek, ak tuga, koboto moek, ak koeny eng’ yoto: ak kiam bik banyechato koboto korotik.

³³ Yeityo komwachi ichek Saul kolenji, Keero, yachin bik Jehovah tengekto, amu amei banyek koboto korotik. Ak kile inendet, Kaoyai ng’alset: omilja koito ne o rani.

³⁴ Ak kile Saul, Oyeste oba kwenutab bik, ak olenji kogetwa chi tugul eitanyi, ak kogetwa chi tugul kechiriennyi, ak koeny eng’ yu, ak koam; si moyachi Jehovah tengekto ye oame koboto korotik. Ak kiget bik tugul, chi age tugul eitanyi konyo kemounoto, ak koeny eng’ yoto.

³⁵ Ak kiteekyi Saul Jehovah kaptisisiet: noto ko ki kaptisisiet ne bo tai ne kiteekyi Jehovah.

³⁶ Ak kile Saul, Ongechortege kisub Pilistik kemoi, ak kenyabane tuguk kot koeech, amat ongebagach chi agot agenge eng’ ichek. Ak kimwa ichek kole, Yai kit age tugul ne igeere ile mie eng’ inye. Yeityo komwa tisiindet kole, Ongerigu yu kerikyi Kamuktaindet.

³⁷ Ak kiteebe Saul Kamuktaindet kit ne yaei, kole, Achortege asub Pilistik? Tos indoi ichek eutab Israel? Ago ma wolji inendet eng’ betunoto.

³⁸ Ak kile Saul, Origu yu, okwek bounik tugul che bo bik; onai ak ogeer ole kabiitunda tengegi rani.

³⁹ Amu, ko u ye sobei Jehovah, ne soru Israel, ko agot ngot ko Jonatan werinnyu, komeei iman. Ago ma biit chi eng’ bik tugul ne kiwolji inendet.

⁴⁰ Yeityo komwachi Israel tugul kolenji, Otebe komosta agenge, ak ketebe ak Jonatan werinnyu komosta age. Ak kimwachi bik Saul kolenji, Yai kit ne igeere ile mie eng’ inye.

⁴¹ Komwachi anyun Saul Jehovah, Kamuktaindetab Israel, kolenji, Iboru imanit. Ak kiginam Jonatan ak Saul: ago kichililso bik.

⁴² Ak kile Saul, Oser barbarek nguno agobo ane ak Jonatan werinnyu. Ak kiginam Jonatan.

⁴³ Kilenji anyun Saul Jonatan, Mwawa kit ne koiyai. Ak kimwachi Jonatan inendet, kolenji, Koachamjam iman kumik tutigin eng’ walitab kirokto ne komi eunnyu; ak keero, amee.

⁴⁴ Ak kile Saul, Ingoyai Kamuktaindet ko u noto, ak koyai kotes kora: amu imee iman, Jonatan.

⁴⁵ Ak kilenji bik Saul, Tos meei Jonatan, ne koyai yetunoni o eng’ Israel? Achicha, ma u noto: ko u ye sobei Jehovah, ko maibutyin ng’ony agot agenge eng’ sumeekab metinnyi; amu kabois ak Kamuktaindet rani. Kisor bik anyun Jonatan, si mame.

⁴⁶ Kitogosta anyun Saul ko mata kosub Pilistik: ak kiba Pilistik oldanywa.

Kiboru eng’ nwagindo ng’alekab laitornatetab Saul

⁴⁷ Kingo kagonam anyun Saul laitornatet eng’ Israel, kobargei ak bunikyik tugul eng’ komosta age tugul, kibargei ak Moab, ak kobargei ak lagokab Amon, ak kobargei ak Edom, ak kobargei ak laitorinikab Soba, ak kobargei ak Pilistik: ak kiiterter ichek eng’ komosta age tugul ole kiweleljigei.

⁴⁸ Kiyai eng’ nyiganatet, ak kibar Amalegik, ak kosor Israel eng’ eunekab ichek che kiga koluul ichek.

⁴⁹ Werikab Saul anyun ko ki Jonatan, ak Isbi, ak Malkisua: ak kainaikab tibikyik tuwai ko ki chu: kainetab taita ko Merab, ak kainetab ne ming’in ko Mikal:

⁵⁰ ak kainetab osotiotab Saul ko ki Ainoam cheptab Aimaas: ak kainetab kiptaiyatab lugennyi ko ki Abner weritab Ner, imametab Saul.

⁵¹ Ak Kis ko ki kwandab Saul; ak Ner kwandab Abner ko ki weritab Abiel.

⁵² Ak kibiit luget ne korom agobo Pilistik eng’ betusiek tugul che bo Saul: ak kingogeer Saul chito age tugul ne kim, anan ko chito age tugul ne nyigan, komut inendet kotebe oldanyi.