1 SAMUEL 13 - BUKUIT NE TILIL

Kobaregei Saul ak Pilistik

¹ Kiga kotar Saul kenyisiek [sosom] ye kitau kolaitorani; ak kilaitoran kenyisiek aeng’ eng’ Israel.

² Ak kilewenjigei Saul murenik elfusiek somok che bo Israel; kimi elfusiek aeng’u eng’ choto koboto Saul eng’ Mikmas ak eng’ tulwetab Bet-el, ak kimi elfut agenge koboto Jonatan eng’ Gibea ne bo Benjamin: ak kiigochi bik che kiga ng’et kwo ga chi tugul.

³ Ak kibar Jonatan irimetab Pilistik ne kimitei Geba, ak kigas Pilistik. Kiguut Saul iriaget eng’ emet tugul, kolen, Ingogas Hebranik.

⁴ Ak kigas Israel tugul kole, kogobar Saul irimetab Pilistik, ak kole kigoek Israel ne kiwechei eng’ Pilistik. Ak kiiyumgei bik kosub Saul koba Gilgal.

⁵ Ak kiiyumgei Pilistik kobargei ak Israel, karisiek elfusiek sosom, ak bik elfusiek lo che lanyei mbartanyisiek, koboto bik che te ng’aniekab ngegutab nyanjet eng’ chang’indo: ak kitogos ak koteech Mikmas, ne tokyingei kong’asis eng’ Bet-aben.

⁶ Kingogeer bikab Israel kole mi eng’ bichiindo, (amu kinyalilso bik,) koung’gei anyun bik eng’ kebenonik, ak eng’ sondisiek, ak eng’ ruandosiek, ak eng’ keringonik, ak eng’ keringonik che mengechen.

⁷ Kiga kolandae Jordan Hebranik alage koba emetab Gad ak Gilead; ago kita komi Saul Gilgal: ak kiisub bik tugul inendet kobotanioti.

⁸ Ak kiigenis betusiek tisab, ko u ye kiga ng’at Samuel: ago kima nyo Samuel Gilgal: ak kiyesta bik koba eng’ ole mi inendet.

⁹ Ak kile Saul, Oibwa kagochinet ne kibeelei konyo yu, koboto kagochinoikab kalyet. Ak kiigoito kagochinonoto kibeelei.

¹⁰ Ak eng’ sainato kiigesune kagoitoetab kagochinet ne kibeelei, ogeero, koit Samuel; ak kimanda Saul kotorokta inendet, kwo kogat.

¹¹ Ak kilenji Samuel, Nee ne kaiyai? Ak kile Saul, Amu kageer ale kaiyesta bik koba eng’ ole ami, ak ma inyo eng’ betusiek che kiga king’at, ak ageer ko kogoyumgei Pilistik eng’ Mikmas;

¹² amwa anyun ale, Chorugei Pilistik nguno kobwanei ole ami eng’ Gilgal, ak tom asom chametab Jehovah: andege anyun amu noto, agoito kagochinet ne kibeelei.

¹³ Ak kilenji Samuel Saul, Keyai eng’ berberindo: ma irib ng’atutietab Jehovah Kamuktaindeng’ung’, ne king’atin: amu kata igimiti Jehovah laitornateng’ung’ eng’ Israel koigeny.

¹⁴ Ago nguno, ko ma kotebyei laitornateng’ung’: kagocheng’jigei Jehovah chito ne iboiboi muguleldanyi, ak kagonde Jehovah inendet koek bounindet ne bou bikyik, amu ma irib ng’olyot ne king’atin Jehovah.

¹⁵ Ak king’eet Samuel, kwo kotogosta eng’ Gilgal agoi Gibea ne bo Benjamin. Ak kiit Saul bik che kimi koboto inendet, koek murenik olo bo bogol lo.

¹⁶ Ak kitebe Saul ak Jonatan werinnyi ak bik che kimi ak inendet Geba ne bo Benjamin: ago kiteech Pilistik Mikmas.

¹⁷ Ak kimong’ luulik eng’ nganasetab Pilistik kopcheunegei somok: kibun kweanet age oret ne wendi Opra, agoi emetab Saul:

¹⁸ Kibun kweanet age oret ne wendi Bet-horon: kibun kweanet age oret ne bunei kiwotet ne ing’ururi atebwetab Seboim kotokyigei ong’atet.

¹⁹ Kima komitei kitang’indet emet komugul ne bo Israel: amu kile Pilistik, Si mayachigei Hebranik rotokab chok anan ng’otwek:

²⁰ ago kichortagei Israelik tugul koba ole mi Pilistik, kwo kolit chi tugul mogombennyi, ak rotwennyi, ak aiywennyi ak marunnyi;

²¹ ago kitinyei liteito ne bo marusiek, ak ne bo rotok, ak ne bo umaisiek, ak ne bo aonok; ak kolite kiplitok.

²² Ago kima biit eng’ betutab luget, rotwetab chok anan ko ng’otit eng’ eutab chi age tugul ne kimi koboto Saul ak Jonatan: ago kitinyei Saul ak Jonatan werinnyi chechuak.

²³ Ak kimanda lugetab Pilistik koba ole kibunei eng’ Mikmas.