1 SAMUEL 12 - BUKUIT NE TILIL

Komwachin Samuel saisere Israelik

¹ Ak kilenji Samuel Israel tugul, Ogeero, kiagas ng’alekwok eng’ tuguk tugul che kiomwawa, ak kiacheng’wok laitoriat ne boiywok.

² Ak ogeero, wendoti laitoriat eng’ taing’wong’: ak koaositu, ak koabunji kalwalek; ak ogeero, mi werikyuk kobotok: ak kiawendote eng’ taing’wong’ koboch ming’inatennyu agoi betuni.

³ Ami yu: omwa ng’olyo eng’ taitab Jehovah, ne ongenja, ak eng’ taitab nenyi ne kigiil: kiarebe ng’o tennyi? Anan kiarebe ng’o sigiriennyi? Anan kiaberber ng’o? Kiaus ng’o? Anan kianam eng’ eutab ng’o tuguk che kigoigoisie, si atuge konyekyuk? Si aweekwok tuguchoto.

⁴ Ak kile, Ma iberberech, anan iusech, anan inam eng’ eutab chi kiy age tugul.

⁵ Ak kilenji ichek, Baoriat Jehovah agobo okwek, ak baoriat eng’ betuni nenyi ne kigiil, kole, ma onyoru kiy eng’ eunnyu. Ak kile, Baoriat inendet.

⁶ Ak kimwachi Samuel bik kolenji, Jehovah ne kileweni Musa ak Aron, ak ko ine ne kiimutu kwanisiekwok kotogos eng’ emetab Misri.

⁷ Otononse anyun nguno, si kobiit ateeiywok eng’ taitab Jehovah agobo boisionik tugul che bo imanda che bo Jehovah, che kiyaiywok ak kwanisiekwok.

⁸ Ye kingonyo Jakobo Misri, ak korirji kwanisiekwok Jehovah, koyok anyun Jehovah Musa ak Aron, che kiimong’ kwanisiekwok eng’ Misri, ak kogochi komeny olito.

⁹ Ago kiutie Jehovah Kamuktaindenywa, ak kialdochi ichek eutab Sisera, kiptaiyatab lugetab Hasor, ak kialdochi eutab Pilistik, ak eutab laitoriatab Moab, ak kibargei ak ichek.

¹⁰ Ak kirirji Jehovah kolenji, Kigeyai tengekto, amu kigebagakte Jehovah, ak keot Baalik ak Astarot: ago soruech nguno eng’ eutab bunikyok, si keotin.

¹¹ Kiiyok Jehovah Jeru-baal, ak Bedan, ak Jepta, ak Samuel, ak kosoruok eng’ eunekab bunikwok eng’ komosta age tugul, ak kiomeng’isie eng’ kalyet.

¹² Ak kingogeer Nahas laitoriab lagokab Amon, konyo obarge, olenja, Achicha, boiywech laitoriat: ago ki laitoriandeng’wong’ Jehovah Kamuktaindeng’wong’.

¹³ Ogeer anyun laitoriat ne kiolewen, ne kiosom: ak ogeero, kagonde Jehovah laitoriat koboiywok.

¹⁴ Ngot oiywei Jehovah, ak oot inendet, ak ogas it kutinnyi, amobistoe ng’atutietab Jehovah, ak ngot oegu okwek ak laitoriat agine ne koboiywok, kasubikab Jehovah Kamuktaindeng’wong’, komieitu anyun:

¹⁵ ago ngot ko mogas it kutitab Jehovah, ago ngot obistoe ng’atutietab Jehovah, konyalilok eutab Jehovah anyun, ko u ye kiinyalil kwanisiekwok.

¹⁶ Otononse anyun si ogeer kii o, ne machei koyai Jehovah ogeere.

¹⁷ Tos ma betusiekab kesisietab nganok rani? Aguure Jehovah si koyok tulet ak ropta; si onai ak ogeer ole o tengektang’wong’, ne kioyai eng’ taitab Jehovah, amu kiosomjige laitoriat.

¹⁸ Koguur anyun Samuel Jehovah; ak kiiyok Jehovah betunoto tulet ak ropta: ak kiiywei bik tugul Jehovah ak Samuel mising’.

¹⁹ Ak kilenji bik tugul Samuel, Saiywech achek otwogiguk Jehovah Kamuktaindeng’ung’, si ma kibegu: amu kogetesyi tengekwogikyok tugul yaitioni, kesomjige laitoriat.

²⁰ Ak kilenji Samuel bik, Amoiywei: kioyai iman yaitioni tugul: ago amomaste obagach osub Jehovah, ago oot Jehovah eng’ mugulelwekwok tugul;

²¹ amomaste osub tugukab buch che maimuchi kotoret kiy anan kosor, amu buch.

²² Amu mabagaktoi Jehovah bikyik amu kainennyi ne o: amu kicham Jehovah koyaak oegu bikyik.

²³ Ago ingolooit eng’ ane, amayachi Jehovah tengek, abagakte asaiywok: ago anetok eng’ oret ne mie ne nyolu.

²⁴ Oiywei Jehovah kityo, ak oot inendet eng’ imanit eng’ mugulelwekwok tugul: ak obwat ole te tuguk che eechen che kigoyaiywok.

²⁵ Ago ngot ko ta oyai yaitiet, kigeswok, okwek ak laitoriandeng’wong’.