1 SAMUEL 11 - BUKUIT NE TILIL

Kosoru Saul Jabes-gilead eng’ eutab Amonik

¹ Kitogos anyun Nahas Amonindet, konyo koteech taitab Jabes-gilead: ak kilenji bik tugul che bo Jabes Nahas, Ongiyomisge, si keotin.

² Ak kilenji Nahas Amonindet ichek, Ayae arorutionoto kobotok eng’ ng’olyondoni, ale, kebalu konyekwok tugul che bo tai, ak ande koek tewernatet eng’ Israel tugul.

³ Ak kilenji boisiekab Jabes inendet, Konech betusiek tisab, si kiyokte bik koba kiwotosiek tugul che bo Israel: si ngot ko mabiit chi ne soruech, kemong’u kebwa olo imi.

⁴ Koit anyun bik che kiga kiyokto, Gibea ne bo Saul, ak komwachi bik ng’alechuto kogas: ak kiwaach bik tugul ak koririo.

⁵ Ak ogeero, kinyo Saul kosubu eik eng’ mbar; ak kile Saul, Kaam nee bik si koririo? Ak kimwachi inendet ng’alekab bikab Jabes.

⁶ Ak kinyonji Saul Tamirmirietab Kamuktaindet eng’ kimnatet, ye kingogas ng’alechato, ak kilalyo neregekyik kot.

⁷ Kinam anyun eik aeng’ che bo chogit, ak kotonaton, ak koyoktae bik koba komoswek tugul che bo Israel, kole, Chi age tugul ne mamong’u kosubu Saul ak Samuel, keyachin eikyik ko u nito. Ak kiibutyi bik kamuisetab Jehovah, ak kimong’ koigei chichak.

⁸ Ak kiit ichek eng’ Besek; ak kiek lagokab Israel elfusiek bogol somok, ak kiek bikab Juda elfusiek sosom.

⁹ Ak kilenji bichoto kiga kiyok, chu kiga bwa, Omwachini bikab Jabes-gilead ko u ni, olenjini, Tun mutai, ko kang’wanit asista, onyoru sorunet. Ak kibwa bichoto kiga kiyok ak komwachi bikab Jabes; ak kiboiboitu.

¹⁰ Kile anyun bikab Jabes, Kibwane mutai ole omi, oyaiywech tuguk tugul che ogeere ole mie eng’ okwek.

¹¹ Ak kingoeech kopcheune Saul bik kweanaik somok; ak kiit kwenutab nganaset eng’ ripset ne bo karon, ak kibar Amonik kot kong’wanit asis: ak kiyesta che kiga ng’et, kot ko mata kenyorji aeng’ komosta agenge.

¹² Ak kilenji bik Samuel, Ng’o ni kilen, Boiywech Saul? Imutu bichoto kebar.

¹³ Ak kile Saul, Magibarei chi agot agenge eng’ betuni: amu kagoyai rani Jehovah sorunet eng’ Israel.

¹⁴ Kilenji anyun Samuel bik, Obwa kebe Gilgal kebe kigimit laitornatet eng’ yoto.

¹⁵ Ak kiba bik tugul Gilgal: ak kiyai Saul eng’ oloto koek laitoriat eng’ taitab Jehovah eng’ Gilgal; ak kieny eng’ oloto tiseiywek che bo kagochinoikab kalyet eng’ taitab Jehovah; ak kibaibaitu mising’; Saul ak bik tugul che bo Israel eng’ oloto.