1 SAMUEL 10 - BUKUIT NE TILIL

Koiili Samuel Saul koek laitoriat

¹ Kiinem anyun Samuel chuboitab mwaita, ak korong’ji metinnyi mwaita, ak kong’utut inendet, ak kolenji, Ma inye ne kagoiilin Jehovah iegu bounindet ne bo borotennyi?

² Ye iwe rani eng’ yu ami, inyoru bik aeng’ eng’ ole bo kereritab Rael, eng’ kiwotetab Benjamin eng’ Selsa; ak komwaun bichoto kole, Kigenyor sigirocho kigewe icheng’ate: kogobagach kwandang’ung’ kabwatetab sigirok, ak kobwatak, kolen, Ayae nee agobo werinnyu?

³ Yeityo iwe tai eng’ yoto kot iit ketitab Tabor, ak nyorun eng’ yoto bik somogu kotogosyin oldab Kamuktaindet eng’ Bet-el, kanabi age arek somok che bo ng’oror, koibei age makatinik somok, koibei age sotetab divaik:

⁴ ak igatin, ak kogonin makatinik aeng’, che itaach eng’ eunywa.

⁵ Ye ibata iit tulwetab Kamuktaindet, ole mitei irimetab Pilistik: ak ye iit nganaset, ituiye maotik che kaiyumgei kochorugei eng’ ole toror kotinyei kibugandet, ak sugutit ne ming’in, ak ndurerut, ak ketubet eng’ tainywa; ak komaotenonu:

⁶ ak konyonjin Tamirmirietab Jehovah eng’ kimnatet, ak imaoten koboto ichek, ak kewalin iegu chito age.

⁷ Ak ye bwanjin kaborunoichu, iyai ko u ye kenyoru boroindo; amu mitei Kamuktaindet koboten.

⁸ Yeityo ichortege indoena iwe Gilgal; ak keero, achoruge ole imi, anyo agoite kagochinoik che kibeelei ak aeny tiseiywek che kagochinoikab kalyet: igenisie betusiek tisab, agoi aitu ole imi, ak aborun kit ne iyae.

⁹ Ak ye kingowelelgei kwo eng’ ole mi Samuel, kogochi Kamuktaindet inendet muguleldo age: ak kiisulda kaborunoichoto tugul eng’ betunoto.

¹⁰ Ak kingoit tulwet, ogeero, kotuiye inendet maotik che kigaiyumgei; ak kinyonji inendet Tamirmirietab Kamuktaindet eng’ kimnatet, ak kimaoten eng’ kwenunywa.

¹¹ Ak kingogeer inendet bik tugul che kiingen inendet eng’ tai, komaoteni ak maotik, kolenjigei bik, Nee ni kogonyonji weritab Kis? Bo Saul agine maotik?

¹² Ak kiwol age ne bo yoto, kole, Ak ko ng’o kwandanywa? Koek anyun kalewenet, kele, Bo Saul agine maotik?

¹³ Ak kingo kagoges maotenet, konyo ole toror.

¹⁴ Ak kiteebe imametab Saul ak otwogindennyi kolenji, Kigobe ano? Ak kile, Kiga kibe kecheng’ate sigirok: ak ye kingegeer kele mata kobiit, kebwa ole mi Samuel.

¹⁵ Ak kile imametab Saul, Kaigai imwawa kit ne komwaun Samuel.

¹⁶ Ak kilenji Saul imamennyi, Kimwawech komie kole, kigenyor sigirok. Ago agobo ng’alekab laitornatet, che kimwachi Samuel, ko ma mwachi inendet.

¹⁷ Ak kiguur Samuel bik koyumgei eng’ taitab Jehovah eng’ Mispa;

¹⁸ ak kilenji lagokab Israel, Kamwa ko u ni Jehovah Kamuktaindetab Israel, kole, Kiamutu Israel kotogos eng’ Misri, ak kiasoruok eng’ eunekab Misrik, ak eng’ eunekab bororiosiek tugul che kiusok:

¹⁹ ago kaoesie ra Kamuktaindeng’wong’, ne inendet ne soruok eng’ bichiinwekwok ak nyalilwogikwok tugul; ak kaolenji inendet, Achicha, ago inde laitoriat koboiywech. Obwa anyun taitab Jehovah obwanune bororiosiekwok ak elfusiekwok.

²⁰ Komut anyun Samuel bororiosiek tugul che bo Israel korik, ak kiginam bororietab Benjamin.

²¹ Yeityo komut bororietab Benjamin korik kobwanune ortinwekwak, ak kiginam oretab Matirik: ak kiginam Saul weritab Kis; ago kigicheng’ inendet, ko ma kinyor.

²² Kota koteebe Jehovah anyun kogeny, kolenji, Ta komi chi ne ta konyonei yu? Ak kiwol Jehovah kole, Kaung’egei tuguk.

²³ Ak kiruai koba komut inendet eng’ oloto; ak kingotonon eng’ kwenutab bik, ko ki koi kosiir chi tugul kong’eete tigigoikyik ak kotogosta.

²⁴ Ak kilenji Samwel bik tugul, Ogeer inendet ne kogolewen Jehovah, ole mami ne kergei ak inendet eng’ bik tugul? Ak kimwa bik tugul eng’ kutit ne o kole, Ingosob laitoriat.

²⁵ Yeityo komwachi Samuel bik kit ne u laitornatet, ak kisirji bukuit, ak kogonor eng’ taitab Jehovah. Ak kimwachi Samuel bik tugul koba, kwo chi tugul gonnyi.

²⁶ Ak kiwa Saul agine gonnyi eng’ Gibea; ak kiba koboto inendet murenik che nyigonen, che kiga twa Kamuktaindet mugulelwekwak.

²⁷ Ago kile werik alak che bo Belial, Sorundoech ano chichi? Ak kisas inendet, ama ipchi kagochinet. Ago kisis Saul.