1 SAMUEL 1 - BUKUIT NE TILIL

Sigetab Samuel

¹ Kimi chito age ne bo Ramataim-sopim, ne bo emetab tulonokab Epraim, ak kainennyi ko ki Elkana, weritab Jeroam, weritab Eliu, weritab Tohu, weritab Sup, Epraimindet:

² ak kitinyei osotik aeng’; kainetab age ko ki Hana, kainetab age ko ki Penina: ak kitinyei Penina lagok, ago kima kotinyei Hana lakwa.

³ Ak kicham kotogostoi chichoto eng’ nganasennyi eng’ kenyit age tugul kowendi kosaei ak kogochin Jehovah ne bo lugosiek tiseiywek eng’ Silo. Ak kimi yoto werik aeng’ che bo Eli, Hopni ak Pineas, tisiikab Jehovah.

⁴ Ak kingoit betut ne igoitoi Elkana tiseiywek, kogochi Penina osotiondennyi, ak werikyik tugul ak tibikyik, kebeberwek:

⁵ ago kiigochi Hana kebeberwek aeng’: amu kichamei Hana, ago kiga rat Jehovah moennyi.

⁶ Ak kitach inendet ne kiting’e moiyet, kole si kogerer met, amu kiga rat Jehovah moennyi.

⁷ Ak ye kiyaei Elkana ko u noto eng’ kenyit age tugul, ye kitogostoi Hana kowendi gotab Jehovah, kotach inendet kwonyoto ko u noto; korir anyun, ak ma amis.

⁸ Ak kilenji inendet Elkana manong’otiondennyi, Hana, irirjini nee? Ak amu nee si meamisiei? Ak amu nee si koarogeni muguleldang’ung’? Ma a kaigai eng’ inye kosiir werik taman?

⁹ King’eet Hana anyun ye kingo kagoamis eng’ Silo, ak kingo kagoeeiso. Kitebyei Eli tisiindet eng’ ye bo tugatugietab kurget ne bo hekalutab Jehovah.

¹⁰ Ak kitinyei inendet ng’wanindo eng’ sobondanyi, ak kisa Jehovah, ak korir eng’ ng’wanindo.

¹¹ Ak kiyai kaarortaet ne kiarorto kole, Ee Jehovah ne bo lugosiek, ngot igeer nyalildab cheptang’ung’ ne otwoget, ak ibwata, ameutie cheptang’ung’ ne otwoget, ak igochi cheptang’ung’ ne otwoget werit, agochini anyun inendet Jehovah eng’ betusiekyik tugul kote kosobei, ama kicheru sumeekyik.

¹² Ak ye kita kosaei eng’ taitab Jehovah, kogeer Eli kutinnyi.

¹³ King’alali Hana eng’ muguleldanyi; kitwau kutinnyi, ago kima kegasei twegunennyi: kobwat anyun Eli kole alen kabogit.

¹⁴ Ak kilenji Eli, Ibogiti kot kotianit? Iste divaiguk.

¹⁵ Ak kiwol Hana kole, Achicha, kiptaiyandennyu, a kwondo ne tinyei tamirmiriet ne tinyei arogenet: ma aee divaik anan ko maiyek, ago karong’ji sobondanyu taitab Jehovah.

¹⁶ Meit cheptang’ung’ ne otwoget ile a cheptab Belial: amu koang’alal agoi rani eng’ chang’indab kang’unyng’unyennyu ak taget ne kitacha.

¹⁷ Kiwol anyun Eli kole, Ui eng’ kalyet: ak ingogonin Kamuktaindetab Israel someng’ung’ ne kesom inendet.

¹⁸ Ak kile inendet, Ingonyor otwogeng’ung’ mieindo eng’ taing’ung’. Kowa anyun kwonyoto, ak koamis, amata konyor togennyi arogenet kogeny.

¹⁹ Ak king’eetyo karon mising’, ak kogutuny eng’ taitab Jehovah, yeityo koweektagei agoi gonywa eng’ Rama: ak kituiyo Elkana ak Hana osotiondennyi, ak kiibwat Jehovah kwonyoto.

²⁰ Ak kingoit betut, komanach Hana, ak kisich werit; ak kiguure kainennyi Samuel, kole, Amu kiasom inendet eng’ Jehovah.

²¹ Ak kitogosta Elkana, koboto gonnyi tugul, kwo kogochi Jehovah tiseiywotab kenyit age tugul, ak koyaakta kaarortoennyi.

²² Ago ma togosta Hana, amu kilenji manong’otiondennyi, Mawendi kot aluge lakwet, si amut kwo taitab Jehovah, kwo kotebe oloto agoi.

²³ Ak kimwachi Elkana manong’otiondennyi kolenji, Yai ko u ye igeere ile mie; tebi kot iluge lakwet; ago ingogimit Jehovah ng’olyondennyi. Kiteb anyun kwonyoto kochuchun lakwennyi ne ki werit, kot koluge.

²⁴ Ak kingo kagoluge, komut, ak kikweri kirugik somok, ak epah agenge ne bo busiek, ak sotet agenge ne bo divaik, ak komut inendet kwo gotab Jehovah eng’ Silo: ak kita ko ming’in lakwanato.

²⁵ Ak kieny kirgit, ak komutyi Eli lakwet.

²⁶ Ak kimwa kwonyoto kole, Ee, kiptaiyandennyu, ko u ye sobei sobondang’ung’, inye, kiptaiyandennyu, a kwonyi kiatononi eng’ yu kiimi, asae Jehovah.

²⁷ Lakwani ne kiasome, ak kigogona Jehovah somennyu ne kiasom inendet:

²⁸ noto anyun, kaagochi inendet Jehovah; kote kosobei, ko kigigochi inendet Jehovah. Ak kigutung’ji Jehovah eng’ yoto.