1 PETERO 4 - BUKUIT NE TILIL

Esioetab tengekto

¹ Noto anyun ko u ye kinyalil Kristo eng’ borto, ogermenge anyun eng’ kabwatonato; amu kigitiach eng’ tengekto inendet ne kinyalil eng’ borto;

² si ko mata osopche eng’ borto eng’ betusiekwok che ng’etunotin eng’ magutik che yaach che bo bik, ago si osopche eng’ magetab Jehovah.

³ Amu kigoyam betusiek che kigosiirto kosulda magetab Bororiosiek, ye kiobendoti eng’ magutik che yaachen, ak kasetab miat, eetab maiyek, ak wasang’natet, ak saetab kanamonik che etei ng’atutik:

⁴ tuguk che keerei ichek kole kwong’et amu moruachini osubi kimargatinoto koboto ichek, si komwaitaenak yaitio:

⁵ che tun tetyin ng’alek inendet ne chobot koruokyi che soptos ak che kigobek.

⁶ Amu nito ko kigiamji logoiywek che miach agot che kigobek, si kobiit kiruokyi eng’ borto ko u ye kiruokyin bik, ago si kosopcho eng’ tamirmiriet ko u ye sobei Jehovah.

⁷ Ago kagorik kagesunetab tuguk tugul: noto anyun oegu che oribege, ak oripse eng’ saet:

⁸ ne siirei tuguk tugul ko ochamnye mising’ okwege; amu tuchei chamnyet chang’indab tengekwogik:

⁹ otaachge okwege eng’ okwege ama eng’ kang’unyng’unyet:

¹⁰ ko u ye kigonyor chi age tugul kagochinet oboisiechinege, ko u ribik che miachen che bo chang’indab mieindab Jehovah;

¹¹ ngo ng’alali chi, kong’alal ko u arorutikab Jehovah; ngo boisiei chi, kobois eng’ kimnatet ne igochin Jehovah: si kobiit kitoror Jehovah eng’ tuguk tugul eng’ Jesu Kristo, ne nenyi torornatet ak kimnatet koigeny ak koigeny. Amen.

Kigonech kenyalilye agobo Kristo

¹² Chamanichu, amokwong’ eng’ tiemisiet ne bo mat ne mi kwenung’wong’, ne nyonjinok si kobiit kotiemak, ko u ye kaityok kiy ne okwong’e:

¹³ ago oboiboitu, ko u ye o yamdoikab nyalilwogikab Kristo; si tun oboiboitu eng’ boiboiyet ne o eng’ ng’ang’etab lilindanyi agine.

¹⁴ Ngechurok eng’ kainetab Kristo, ko oboiboi; amu tebenok Tamirmirietab lilindo ne Tamirmirietab Jehovah.

¹⁵ Amat konyalil age eng’ okwek amu rumin, anan ko chorin, anan ko ne yaei yaitio, anan ko chi ne indogei ng’alekab bik alak;

¹⁶ ago nginyalil chi amu Kristianindet, ko mat kolilan; ingotoror Jehovah eng’ kainanito.

¹⁷ Amu kagoit betut ne kitaune kiruoget gotab Jehovah: ak ngot ketaunenech achek, kotam nee kagesunetab ichek che magase it logoiywek che miach che bo Jehovah?

¹⁸ Ak ngot ko bichii kesor chi ne bo imanda, ko tun koegu nee eng’ ne ma bo imanda ak kiptengekyot?

¹⁹ Noto anyun ingogoito sobonwekwak che nyalildos ko u magetab Jehovah kogochi eng’ yaet ne mie Yaindet ne kiyani, korib.