1 PETERO 3 - BUKUIT NE TILIL

Manong’otaik ak osotik

¹ U noto, osotichu, ogas it manong’otaikwok; si nganda magase it alak ng’olyot, kimuch kichuut ichek eng’ atebet ne mie ne bo osotikwak ama eng’ ng’olyot,

² ye keerei atebeng’wong’ ne tilil ne boto kaiyweisiet.

³ Amaek lelestanywa lelesta ne bo sang’, ne bo laetab sumeek, ak kalaagetab karikab tahabu, ak kalaagetab ngoroik;

⁴ ago ingoek chito ne ung’at ne bo muguleldo, eng’ lelesta ne ma ng’emaksei ne bo tamirmiriet, ne tala ak kosisei, ne eng’ taitab Jehovah ko bo kamanutiet ne o.

⁵ Amu kiyaei lelesta ko u noto agichek kwonyik che tililen chu ki bo keny, che kiimang’u Jehovah, ak kogase it manong’otaikwak:

⁶ ko u ye kigase it Sara Abraham, koguure inendet kiptaiyat: o lagokyik, ngot oyae ne mie, amoiywei kamuiset age tugul.

⁷ Okwek manong’otaichu, otebi ko u noto koboto osotikwok eng’ ng’omnatet, ogochini kwondo teegisto, amu inendet ko nyalulat eng’ muren, ko u ye tun onyoru tugul mieindab sobondo; si ma kiger sautikwok.

Rirenetab ge ne nyoljin bikab Kristo kobarta

⁸ Ne bo let anyun, ko oegu tugul che bo kabwatet agenge, che riregei, che chamdos ko u che tupcho, che ng’arng’arge, che iming’inegei:

⁹ che mayaaktoi yaitio eng’ yaitio, anan ko ng’emetab kut eng’ ng’emetab kut; ago oegu che iberurisiei; amu kigiguurjok nito, si onam kaberuret.

¹⁰ Amus, Inendet ne chamei sobondo, Ak kogeer betusiek che miachen, Ko ingorib ng’elyeptanyi si mamwa yaitio, Ak kutinnyi si mamwa ng’alset:

¹¹ Ak ingoistoegei yeitio, ak koyai ne mie; Ingocheng’ kalyet ak kosub.

¹² Amu tokyingei konyekab Kiptaiyat che bo imanda, Ak kogasei itikyik somenywa: Ago kirindoi togetab Kiptaiyat che yaei yaitio.

Nyalilda agobo imnda. Kaborunetab Kristo

¹³ Ak ng’o ne yaiywok ne ya, ngot omache mising’ kit ne mie?

¹⁴ Ago ngot onyalili agobo imanda, ko o boiboen: amoiywei kamuisenywa, anan oiimge:

¹⁵ ago ogonyit Kristo koek Kiptaiyat ne tilil eng’ mugulelwekwok: ak oegu che chobotin kotugul owolji chi tugul ne teebenok ng’olyo agobo kamang’unet ne mitei eng’ okwek, ago eng’ talasiet ak kaiyweisiet:

¹⁶ otinye kabwatet ne mie; si ye kitaamok, kigochin kolilan ichek che mwaitae ng’alek che yaach atebeng’wong’ ne mie eng’ Kristo.

¹⁷ Amu kaigai ngot ko noto magetab Jehovah, onyalilye amu oyae ne mie kosiir ye oyae ne ya.

¹⁸ Amu kime Kristo agine konyil agenge agobo tengekwogik, inendet ne bo imanda agobo che ma bo imanda, si kobiit komutyech Jehovah; ne kigibar eng’ borto, ago kigisoob eng’ tamirmiriet;

¹⁹ kiwa eng’ noto agine koamji tamirmirik che kimi korgoret,

²⁰ che kima kogase it eng’ tai, ye kiganyei muitaetab Jehovah eng’ betusiekab Noa, ye kingeyaei melit, ne kigisorune che ng’ering’ eng’ beek, choto ko ki bik sisiit:

²¹ kergeindab tuguchuto ko kabatisanet, ne soruok agine eng’ betusiechu, ma kele istoetab simdab borto, ago wolunetab kabwatet ne mie ne tokyingei Jehovah, eng’ ng’eetyetab Jesu Kristo;

²² ne kikwa kipsengwet ak komi eutab tai ne bo Jehovah; ak kigiyai malaikaisiek ak bounatosiek ak kimnatosiek kogas it inendet.