1 PETERO 2 - BUKUIT NE TILIL

¹ Oiste anyun yaitiet tugul, ak ng’alset tugul, ak chombilisiosiek, ak ng’etkonda, ak ng’alalet age tugul ne ya,

² omach mising’ chego che bo ng’omnatetab tamirmiriet, che matinyei ng’alset, ko u manyurunik, si kobiit onerie agoi yetunet;

³ ngo kiochamjam ole Kiptaiyat ko bo mieindo:

⁴ obwanjini inendet koita ne sobei, ne kiesio bik iman, ago lewenot eng’ Jehovah, ne chamat mising’,

⁵ ak okwek, che o koik che soptos, kiteechok oegu gotab tamirmiriet, oegu che boisiei eng’ tiseinatet ne tilil, si ogoite korosekab tamirmiriet, che taachaksei eng’ Jehovah eng’ Jesu Kristo.

⁶ Amu mi eng’ siret kole, Ogeero, kande Sion koita ne o ne bo luita, ne lewenot, ne chamat mising’: Ak inendet ne iyani, ko maililani.

⁷ Eng’ okwek anyun che oyani ko chamat mising’ inendet: ago eng’ ichek che maiyani, ko, Koita ne kiesio teegik, Kigiyai koyata koek metitab luita;

⁸ ak ko, Koita ne inachi bich, ak ko ruandet ne riichei bich; amu kinachi ichek eng’ ng’olyot, amu magase it: kiginde ichek agobo noto.

⁹ Ago okwek ko o bororiet ne kigelewen, o che boisiei eng’ tiseinatet ne bo kaplaitoriat, bororiet ne tilil, bik che bunjin Jehovah, si kobiit obarte telunatosiek che bo inendet ne kiguurok omong’une mesundeito omong’ji lapkeiyennyi ne kikweng’e.

¹⁰ Okwek che kima ko o bororiet eng’ tai, ago nguno ko o bororietab Jehovah: che kima osich rirenetab ge, ago nguno ko kaosich rirenetab ge.

¹¹ Chamanichu, asomok ko u ye o toek ago o kiprutoinik, ale oistoege magutik che bo borto, che bortos ak sobondo;

¹² okwek che otinye atebet ne nyolu eng’ kwenutab Bororiosiek: si nganda itaamok ko u yaikab yaitio, kotoror Jehovah eng’ betutab rutochinet eng’ boisionikwok che miach che keerei.

Kanyol kegas it bounikab emet

¹³ Ogas it kit age tugul ne ng’atei bik amu Kiptaiyat: agot ngo laitoriat, ne bou tugul;

¹⁴ anan ko bounik, che iyogu inendet agobo mugetut ne yaakyin yaikab yaitio, ak agobo kalosunet eng’ ichek che yaei ne mie.

¹⁵ Amu u noto magetab Jehovah, ale oger eng’ yautik che miach abusnatetab bik che berberen:

¹⁶ ko u che itiogotin, amoboisie katiaknateng’wong’ ko u kit ne otektoe yaitiet, ago oboisie ko u otwogikab Jehovah.

¹⁷ Oteech bik tugul. Ocham che otupche. Oiywei Jehovah. Oteech laitoriat.

Kit ne u boisietab otwogik

¹⁸ Okwek che o otwogik, ogas it kiptainikwok eng’ kaiyweisiet tugul; ma che miachen ak che taloen kityo, ago ogas it che kolgol agichek.

¹⁹ Amu chamaksei nito, ngot komuita chi eng’ arogenosiek kobwati Jehovah, ye kinyalili ama yai kiy ne ya.

²⁰ Amu teegis nee, ngot oyai tengek ak kebirok, ak omuitoi? Ago ngot oyai ne mie, ak onyalil, ak omuitoi, ko chamaksei nito eng’ Jehovah.

²¹ Amu kigiguurjok nito: amu kinyalil Kristo agine agobo okwek, kobagakwok kaborunet, si kobiit osub tiegutikyik:

²² inendet ne kima yai tengek, ama kinyorji kutinnyi ng’alset:

²³ ne ye kingeng’emji kut, ko ma ng’em kut; ye kingonyalil, ko ma imuiso; ago kiigochigei inendet ne iruochi eng’ imanda:

²⁴ inendet ne kiib tengekwogikyok eng’ bortanyi eng’ ketit barak, si kesopche eng’ imanda; achek che kiga kebekyi tengekwogik; kigisoobenok birutikyik.

²⁵ Amu kiobetooti ko u kechirek; ago kaoweekyigei Mestowot ak ko Ribindetab sobonwekwok.