1 LAITORINIK 8 - BUKUIT NE TILIL

Kitabani hekalut, ak saetab Solomon

¹ Kiiyum anyun Solomon boisiek che bo Israel, ak kandoik tugul che bo ortinwek, bounikab kwanisiekab lagokab Israel, kobwa ole mi laitoriat Solomon eng’ Jerusalem, koib moingetab arorutietab Jehovah kotogos eng’ nganasetab Daudi, ne noto ko Sion.

² Ak kiiyumgei bik tugul che bo Israel eng’ ole kimi laitoriat Solomon eng’ igorta, eng’ arawetab Etanim, ne arawetab tisab.

³ Ak kibwa boisiek tugul che bo Israel, ak kiganob tisiik moinget.

⁴ Ak kiib moingetab Jehovah, ak emait ne kituiyechin, ak terenik tugul che tililen che kimi Emait; kiib chuto tisiik ak Lawik kotogos.

⁵ Ak kimi taitab moinget, laitoriat Solomon ak tuiyet tugul ne bo Israel che kiga iyumgei eng’ ole mi inendet, koenyei kechirek ak eik, che kima kimuchi kerar anan kiit eng’ chang’indo.

⁶ Ak kiib tisiik moingetab arorutiet ne bo Jehovah, konyo ole tebe eng’ got orit ole tilil, ole tilil mising’, kureretab kebebaikab kerubisiek.

⁷ Amu kiga iito kerubisiek kebebaikwak kouur ole mi moinget, ak kituch kerubisiek moinget ak ketikyik che kiibe.

⁸ Ak ki koen ketichoto mising’; ak kitoogu walisiekwak eng’ ole tilil eng’ taitab got ne bo orit; ago kima ko toogu eng’ sang’: ak mi yoto agoi ra.

⁹ Kima komi kiy moingonoto orit kobate koik aeng’ che lebelen che kiindoi Musa eng’ Horeb, ye kingoyai Jehovah arorutiet ak lagokab Israel, ye kimong’u eng’ emetab Misri.

¹⁰ Ak kingomong’ tisiik eng’ ole tilil, konyi boldet gotab Jehovah,

¹¹ kot komata komuch tisiik kobois amu boldet: amu kinyi gotab Jehovah lilindab Jehovah.

¹² Kong’alal anyun Solomon kole, Kile Jehovah, menyei inendet mesundeito ne o.

¹³ Kaateegun iman got ne imenye, komostang’ung’ ne imenye koigeny.

¹⁴ Ak kiwelelgei laitoriat, ak koberur tuiyet tugul ne bo Israel: ak kitonon tuiyet tugul ne bo Israel.

¹⁵ Ak kile, Iberurot Jehovah, Kamuktaindetab Israel, ne king’alalji eng’ kutinnyi Daudi baba, ak kagosulda eng’ eunekyik kole,

¹⁶ Koboch betut ne kiamutu bikyuk Israel komong’ eng’ Misri, ko ma alewen nganas eng’ ortinwek tugul che bo Israel ateech got, si kobiit kotebe yoto kainennyu; ago kialewen Daudi koboi bikyuk Israel.

¹⁷ Ak kimi muguleldab baba Daudi kole koteekyi got kainetab Jehovah, Kamuktaindetab Israel.

¹⁸ Ago kilenji Jehovah kwandanyu Daudi, Amu kimi muguleldang’ung’ iteekyi got kainennyu, ko kiiyai kit ne mie ibwat ko u noto eng’ muguleldang’ung’:

¹⁹ ago ma inye ne teechei goyoto; ago wering’ung’ ne mong’une bortang’ung’, inendet ne teekyin kainennyu got.

²⁰ Ak kagogimit Jehovah ng’olyondennyi ne kimwa; amu kiabiitu ageer kwandanyu Daudi, ak atebe ng’echeretab laitornatet ne bo Israel, ko u ye kiiyomis Jehovah, ak koateekyi got kainetab Jehovah, Kamuktaindetab Israel.

²¹ Ak koachob eng’ yoto ole tebe moinget, ne mi arorutietab Jehovah orit, ne kiyai ak kwanisiekyok, ye kiimutu komong’ eng’ emetab Misri.

²² Ak kitonon Solomon eng’ taitab kaptisisietab Jehovah eng’ taitab tuiyet tugul ne bo Israel, ak koiito eunekyik kotokyi kipsengwet:

²³ ak kile, Ee Jehovah, Kamuktaindetab Israel, mami Kamuktaindet age ne u inye, eng’ barak kipsengwet, anan eng’ ng’ony orit; ne ribei kayomiset ak rirenet eng’ otwogiguk, che bendote taing’ung’ eng’ mugulelwekwak tugul:

²⁴ ne kiisuldochi otwogindeng’ung’ baba Daudi kit ne kigeyomisyi inendet: ee, kiimwa eng’ kuting’ung’, ak kaiyai eng’ eung’ung’ kosulda, ko u kit ne u rani.

²⁵ Ara anyun, ee Jehovah, Kamuktaindetab Israel, isuldochi otwogindeng’ung’ baba Daudi kit ne kiiyomisyi, ilenji, Mabetenen chito ne tebe ng’echeretab laitornatet ne bo Israel eng’ tainnyu; ngot korib lagoguk ortinwekwak, kobendate tainnyu ko u ye kiiwendote tainnyu.

²⁶ Ara anyun, ee Kamuktaindetab Israel, asain ale ingogimit ng’olyondeng’ung’, ne kiimwachi otwogindeng’ung’ baba Daudi.

²⁷ Ago tos meny Kamuktaindet ng’ony iman? Keero, mayamin kipsengwet itebe, anan ko kipsengwet ne bo kipsengwetisiek; ko ming’in ne tia anyun goi koateech!

²⁸ Ago konyit saetab otwogindeng’ung’, ak somennyi, kas, ee Jehovah, Kamuktaindennyu, rirek ak saet ne saei otwogindeng’ung’ eng’ taing’ung’ rani:

²⁹ si kobiit kogeer konyeguk goi kemoi ak bet, kogeer komosta ne kiimwa ile, Tebe yoto kainennyu: si igas saet ne saei otwogindeng’ung’ kotokyingei komosita.

³⁰ Ak igas sometab otwogindeng’ung’, ak biguk Israel, ye saei kotokyingei yuto: ee, kas anyun eng’ kipsengwet oldang’ung’ ole imenye; ak ye igas, inyochi kaat.

³¹ Ngot kolelji chi chitab kokwennyi, ak kebirji inendet koyosio, konyo koyosio eng’ taitab kaptisisieng’ung’ eng’ goi:

³² igas anyun eng’ kipsengwet, ak iyai, ak iruoksechi otwogiguk, igikyi inendet ne kalel, si inde kotebe metinnyi ortinwekyik; ak iityi imanda inendet ne bo iman, igochi inendet ko u imandanyi.

³³ Ye kibar biguk Israel eng’ taitab bunik, amu kigoyaun tengekto; ngot koweekyingei kogeny, ak kong’any kaineng’ung’, ak kosa, ak korirjin eng’ goi:

³⁴ igas anyun eng’ kipsengwet, ak inyochi kaat biguk Israel eng’ tengektanywa, ak imutu ichek kogeny kobwa emet ne kiigochi kwanisiekwak.

³⁵ Ye kerak kipsengwet, ak kobet ropta, amu kigoyaun tengekto; ko ngot kosa kotokyigei komosi, ak kong’any kaineng’ung’, ak koweek eng’ tengektanywa, ye inyalil ichek:

³⁶ igas anyun eng’ kipsengwet, ak inyochi kaat otwogiguk, eng’ tengektanywa ak ne bo biguk Israel, ye ineti ichek oret ne mie ne nyolu kobendate; ak iyokyi ropta emeng’ung’, ne kiigochi biguk koek borotenywa.

³⁷ Ngot kobiit rubet eng’ emet, anan ko koroito, ngot kobiit chelalitiet anan ko uchatet, chereng’endet anan ko kutit; ngot koyiem ichek bunikwak eng’ emetab nganasokwak; koroito age tugul anan ko mi miando age tugul ne biitu;

³⁸ ko saet anan ko somet age tugul ne kasom chi age tugul, anan ko ne kasom biguk tugul che bo Israel, ne naei chi age tugul miandab muguleldanyi, ak koiito eunekyik kotokyi goi:

³⁹ igas anyun eng’ kipsengwet oldang’ung’ ole imenye, ak inyochi kaat, ak iyai, ak iyaakyi chi age tugul ko u ortinwekyik tugul, ne inege muguleldanyi: (amu inye inyege ne ingen mugulelwekab werikab bik;)

⁴⁰ si kobiit koiywein betusiek tugul komenyei emet ne kiigochi kwanisiekyok.

⁴¹ Ak eng’ chito ne bo bororiosiek, ne ma bo biguk Israel, ngo nyo eng’ emet ne loo agobo kaineng’ung’;

⁴² (amu tun kasei ichek agobo kaineng’ung’ ne o, ak agobo eung’ung’ ne kim, ak eung’ung’ ne chuulat;) ye nyo ak kosa kotokyigei goi;

⁴³ igas eng’ kipsengwet oldang’ung’ ole imenye, ak iyai ko u tuguk tugul che kaguurjin chichoto bo bororiosiek; si kobiit konai kaineng’ung’ bik tugul che bo ng’ony, koiywein, ko u ye iywein biguk Israel, ak si kobiit konai kole goi kiateech kemwaitoe kaineng’ung’.

⁴⁴ Ngot koba biguk kobargei ak bunikwak, eng’ oret age tugul ne keyoktae, ak kosa Jehovah kotokyigei nganasani kiilewen, kotokyigei goi koateekyi kaineng’ung’:

⁴⁵ igas anyun eng’ kipsengwet saenywa ak somenywa, ak iyachi ichek kit ne machei.

⁴⁶ Ngot koyaun tengek, (amu mami chi ne mayaei tengek,) ak inerekyi, ak igochi ichek eunekab bunikwak, koluul ichek komut koba emetab bunik, ngot ko loo anan ko negit;

⁴⁷ ago ngot kobwatgei eng’ emet ne kigimut koek luulenik, ak kosik, ak korirjin eng’ emetab bik che kiimut ichek koluul, kole, Kigeyai tengekto, kigeyai kit ne imaasat, kigeyai kit ne ya kot;

⁴⁸ ngot koweekiyigei eng’ mugulelwekwak tugul ak eng’ sobonwekwak tugul, eng’ emetab bunikwak che kiluul ichek, ak kosain kotokyigei emenywa, ne kiigochi kwanisiekwak, nganaset ne kiilewen, ak got ne kiateekyi kaineng’ung’;

⁴⁹ igas anyun saenywa ak somenywa eng’ kipsengwet oldang’ung’ ole imenye, ak iyachi ichek kit ne machei;

⁵⁰ ak inyochi kaat biguk che kigoyaun tengekto, ak bistaosiekwak tugul che kigobistaenen; ak irire ichek eng’ taitab bik che kiimut ichek koluul:

⁵¹ amu ichek ko biguk, boroteng’ung’, che kiimutu komong’ eng’ Misri, eng’ kwenutab matab karnet:

⁵² si kobiit igeer sometab otwogindeng’ung’, ak sometab biguk Israel, igasyi ichek eng’ sait age tugul ne karirjin.

⁵³ Amu kiitaban ichek eng’ bik tugul che bo ng’ony, koek boroteng’ung’, ko u ye kiimwa eng’ Musa otwogindeng’ung’, ye kiimutu kwanisiekyok komong’ eng’ Misri, ee Kiptaiyat Jehovah.

⁵⁴ Ak kingo kagoges Solomon saet eng’ saoni ak somet ne kisaei Jehovah, kong’eet eng’ taitab kaptisisietab Jehovah, eng’ ole kigutung’e kotokyin eunekyik kipsengwet.

⁵⁵ Ak kitonon, ak koberur tuiyet tugul ne bo Israel eng’ kutit ne o kole,

⁵⁶ Iberurot Jehovah, ne kigogochi kamuung’et bikyik Israel, ko u tuguk tugul che kiga koaror: ma bet ng’olyot agot agenge eng’ arorutiennyi tugul ne mie, ne kiiaror eng’ otwogindennyi Musa.

⁵⁷ Ingoteb Jehovah Kamuktaindennyo kobotech ko u ye kimi ak kwanisiekyok: amat kobagaktech, anan kometech:

⁵⁸ si kobiit koyai mugulelwekyok kotokyigei inendet, kebendate ortinwekyik tugul, ak kerib ng’atutikyik, ak etanutikyik, ak kiruogutikyik, che king’at kwanisiekyok.

⁵⁹ Ak ingorikyi ng’alechuchuk Jehovah Kamuktaindennyo, bet ak kemoi, chu kasome eng’ taitab Jehovah, si kobiit koyachi otwogindennyi kit ne machei, ak kit ne machei bikyik Israel, ko u ye machei eng’ betut age tugul:

⁶⁰ si kobiit konai bik tugul che bo ng’ony kole, Jehovah ko Kamuktaindet; mami age.

⁶¹ Ingoek anyun mugulelwekwok che igesunotgei eng’ Jehovah Kamuktaindennyo, obendate ng’atutikyik, ak orib etanutikyik, ko u rani.

⁶² Ak kiigoito laitoriat koboto Israel tugul tiseiywek eng’ taitab Jehovah.

⁶³ Ak kiigoito Solomon tiseiywek koek kagochinoikab kalyet, che kiigochi Jehovah, tuga elfusiek tiptem ak aeng’, ak kechirek elfusiek bogol ak tiptem. Kotaban anyun laitoriat koboto lagok tugul che bo Israel, gotab Jehovah.

⁶⁴ Kiitilil betunoto laitoriat kwenutab seremut ne kimi taitab gotab Jehovah; amu yoto ole kiigoitoe inendet kagochinet ne kibeelei, ak kagochinet ne bo busiek, ak mwanik che bo kagochinoikab kalyet: amu ki ming’in kaptisisietab sugunwet ne kimi taitab Jehovah, ma yam kagochinet ne kibeelei, ak kagochinetab busiek, ak mwanikab kagochinoikab kalyet.

⁶⁵ Kiyai anyun Solomon igorta eng’ betusiechoto, koboto Israel tugul, tuiyet ne o, kong’eete ye kibunei kebendi Hamat agoi ainetab Misri, eng’ taitab Jehovah Kamuktaindennyo, betusiek tisab ak betusiek tisab, tugul ko betusiek taman ak ang’wan.

⁶⁶ Kimwachi bik koba eng’ betutab sisiit, ak kiiberur ichek laitoriat, ak koba emaisiekwak koboiboen, kogasotegei eng’ mugulelwekwak amu mieindo tugul ne kiyachi Jehovah Daudi otwogindennyi, ak Israel bikyik.