1 LAITORINIK 6 - BUKUIT NE TILIL

Teeksetab hekaluta Solomon

¹ Ak kingobata kenyisiek bogolwogik ang’wanu ak tamanwogik sisiit koboch ngab kobwa Israel komong’ eng’ emetab Misri, eng’ kenyit ne bo ang’wan ne bo laitornatetab Solomon ne kibou Israel, eng’ arawetab Sip, noto arawet ne bo aeng’, kotoi koteech gotab Jehovah.

² Ak got ne kiteekyi laitoriat Solomon Jehovah ko ki kakwautik tamanwogik lo che bo eut koindanyi, ak tebeesindo ko ki kakwautik tiptem che bo eut, ak kakwautik sosom che bo eut koindab tononennyi.

³ Ak keterut eng’ taitab hekalutab got ko ki kakwautik tiptem che bo eut, koindanyi ko u tebeesindab got; ki kakwautik taman che bo eut tebeesindanyi eng’ taitab got.

⁴ Ak kiyachi got tirisiok che kigiyai kong’walng’walgei.

⁵ Ak kiteech gorik alak che mi barak eng’ got, koyiem inatutab got, konamatgei ak inatusiekab got eng’ komoswek tugul, eng’ hekalut ak got ne bo orit: ak kiteech gorik alak che mi got taban eng’ komoswek tugul:

⁶ kiek tebeesindab got ne bo ng’ony kakwautik mut che bo eut, ak kiek tebeesindab got ne bo kwenut kakwautik lo, ak kiek tebeesindab got ne bo somok kakwautik tisab: amu kiteech kit ne u mireiywot kotobon sang’ eng’ inatutab got eng’ komoswek tugul, si manamgei ketik ak inatusiekab got.

⁷ Ak kingeteechei goyoto ko kigiteege koik che kiga kechob eng’ ole kibale: ak kima komi cheetab kiriswet anan ko ne bo aiywet anan ko ne bo karna age tugul ne kiboisie, ne kigigas eng’ goyoto keteechei.

⁸ Kimi komostab tai kurgetab gorik che bo kwenut ne bo got: ak kigitogostae long’eiywot ne kiing’aatgei kot koit gorik che bo kwenut, ak kong’eete che bo kwenut agoi che bo somok.

⁹ Kiteech anyun got ak kiiges; ak kitete got bambanik ak kosiebe baoinikab taragonik.

¹⁰ Ak kiteech gorik che bo barak konamatgei ak got tugul, ki bo age tugul kakwautik mut kwo barak: ak kitonone got kimurtoinikab taragonik.

¹¹ Ak kinyonji ng’olyotab Jehovah Solomon, kolenji,

¹² Eng’ goi iteeche, ko ngot iwendote konetisiosiekyuk, ak iyai kiruogutikyuk, ak irib ng’atutikyuk tugul iwendote; agimit anyun ng’olyondennyu eng’ inye, ne kiamwachi Daudi kwandang’ung’.

¹³ Ak amenye kwenutab lagokab Israel, ak mametoi bikyuk Israel.

¹⁴ Kiteech anyun Solomon got ak kiiges.

¹⁵ Ak kiteech inatusiekab got che bo orit eng’ baoinikab taragonik; koboch got ng’ony kot koit inatusiekab tabotet, koliige ketik ole bo orit: ak kitete got ng’ony baoinikab birbirinik.

¹⁶ Ak kiteech kakwautik tiptem eng’ komosta ne bo let ne bo got eng’ baoinikab taragonik koboch ng’ony agoi inatusiek: kiteege choto orit, koek got ne bo orit, noto ko ole tilil mising’.

¹⁷ Ak ki kakwautik artam koindab got, noto ko hekalut ne mi tai.

¹⁸ Ak kimi taragonik got orit, che kigiwai kosich mulonok ak taptok che yesiotin: ki bo tugul taragonik; kima komi koita ne kitoogu.

¹⁹ Ak kichob got ne bo orit eng’ kwenutab got orit, si konde yoto moingetab arorutietab Jehovah.

²⁰ Ak ki kakwautik tiptem koindab goyoto bo orit, ak ki kakwautik tiptem tebeesindo, ak ki kakwautik tiptem koindo ne bo tononennyi; ak kiiliige tahabu che tililen: ak kiiliige kapkorosut taragonik.

²¹ Ak kiiliige got orit tahabu che tililen; ak kirat sirimwekab tahabu kobun taitab goyoto bo orit; ak kiiliige tahabu.

²² Ak kiiliige got kumugul tahabu, kot kogesgei got tugul: kiiliige agine tahabu kapkorosut komugul ne bo goyoto bo orit.

²³ Ak kiyai kerubisiek aeng’ che bo ketikab emitik eng’ ole tilil, ne age tugul ko kakwautik taman che bo eut kwo barak.

²⁴ Ak ki kakwautik mut che bo eut kebepchet agenge ne bo kerubit: ak ki kakwautik mut che bo eut kebepchet age ne bo kerubit, koboch walitab kebepchet age agoi walitab kebepchet age ko ki kakwautik taman che bo eut.

²⁵ Ak ki kakwautik taman kerubit age: ki aechin eng’ kakwaet kerubisiechoto tuwai ak ki kergei.

²⁶ Ki kakwautik taman koindab tononetab kerubit age, ak ki u noto che bo kerubit age.

²⁷ Ak kiinde kerubisiechoto got ne bo orit: ak kiga iitagei kebebaikab kerubisiechoto, kot kotiiny kebepchetab age inatut age, ak kitiiny kebepchetab kerubit age inatut age; ak kitiinygei kebebaikwak eng’ kwenutab got.

²⁸ Ak kiiliige kerubisiechoto tahabu.

²⁹ Ak kiwai inatusiek tugul che bo got komoswek tugul, eng’ kerubisiek che kigiwaat ak tironik ak taptok che yiesiotin eng’ go orit ak sang’.

³⁰ Ak kiiliige tahabu ng’onyutab got orit ak sang’.

³¹ Ak kiyachi kereiywekab kurgotik che bo ketikab emitik, ole kibunei kebendi got ne bo orit: ki kebeberta agenge eng’ mut rateiywotab tugatuk koboto tugatugik.

³² Kiyai anyun kereiywek aeng’ che bo emitik; ak kiwai itonwekab kerubisiek ak che bo tironik ak che bo taptok che yiesiotin eng’ kurgotichoto, ak koliige tahabu; ak kotuge tahabu kerubisiechoto, ak kotuge tahabu tironik.

³³ Ak kiyachi ko u noto ole kichutei kebendi hekalut, tugatugikab ketikab emitik, koek kebeberta agenge eng’ ang’wan ne bo inatut;

³⁴ ak kiyai kereiywek aeng’ che bo kurgotik che bo birbirinik; ki arung’oksei kebeberwek aeng’ che bo kereiywot agenge, ak ki arung’oksei kebeberwek aeng’u che bo kereiywot age.

³⁵ Ak kiwai eng’ choto itonwekab kerubisiek ak che bo tironik ak che bo taptok che yiesiotin: ak kiiliige tahabu che kigibirji konamgei ak wautichoto.

³⁶ Ak kiteech seremut ne bo orit eng’ ortinwek somok che bo koik che kigiwai, ak oret agenge ne bo ketikab taragonik.

³⁷ Kigilumei got ne bo Jehovah eng’ kenyit ne bo ang’wan, eng’ arawetab Sip.

³⁸ Ak kiigesgei got koboto kebeberwekyik tugul eng’ kenyitab taman ak agenge eng’ arawetab Bul, noto ko arawetab sisiit, ak ko u tugul che kiga king’at agobo goyoto. Kiteech anyun goyoto eng’ kenyisiek tisab.