1 LAITORINIK 4 - BUKUIT NE TILIL

Bounikab Solomon, ak kapkiruogennyi

¹ Ki laitoriat Solomon ne kibou Israel tugul.

² Ak chu ko ki bounik che kitinyei inendet; Asaria, weritab Sadok ko ki tisiindet;

³ Eliorep ak Aija, werikab Sisa, sirik; Jeosapat weritab Ailud, sirindetab tuguk che biitu;

⁴ ak kibou luget Benaia weritab Jeoiada; ak ki tisiik Sadok ak Abiatar;

⁵ ak kibou Asaria weritab Natan, kiptainik; ak ki tisiindet Sabud weritab Natan, ne ki choruetab laitoriat;

⁶ kibou got Aisar; ak kibou Adoniram weritab Abda aisurut.

⁷ Ak kitinyei Solomon kiptainik taman ak aeng’ che kibou Israel tugul, che kiipchin laitoriat amitwogik koboto gonnyi: kiging’at koib chi age tugul amitwogik eng’ arawet eng’ kenyit.

⁸ Ak chu kainaikwak: Ben-hur, eng’ emetab tulonokab Epraim:

⁹ Ben-deker, eng’ Makas, ak eng’ Saalbim, ak Bet-semes, ak Elon-bet-hanan:

¹⁰ Ben-hesed, eng’ Arubot; ki nenyi Soko, ak emet tugul ne bo Heper:

¹¹ Ben-abinadab, eng’ Napat-dor tugul; kiitun Tapat cheptab Solomon:

¹² Baana weritab Ailud, eng’ Taanak ak Megido, ak Bet-sean tugul ne negite Saretan, ne mi atebwetab Jesreel, koboch Bet-sean agoi Abel-meola, agoi koit bitetab Jokmeam:

¹³ Ben-geber, eng’ Ramot-gilead; ki chechik nganasokab Jair weritab Manase, che mitei Gilead; ki nenyi agine koretab Argob, ne mi Basan, nganasok che eechen tamanwogik lo che tinyei irimoik ak temeleiywekab sugunonik:

¹⁴ Ainadab weritab Ido, eng’ Maanaim:

¹⁵ Aimaas, eng’ Naptali; kiitun agine Basemat cheptab Solomon:

¹⁶ Baana weritab Husai eng’ Aser ak Bealot:

¹⁷ Jeosapat weritab Parua, eng’ Isakar:

¹⁸ Simei weritab Ela, eng’ Benjamin:

¹⁹ Geber weritab Uri, eng’ emetab Gilead, koretab Sihon laitoriatab Amorik ak ne bo Og laitoriatab Basan; ak ki kiptaiyat inegei ne kimi emonoto.

²⁰ Ki chang’ Juda ak Israel, ko u ng’aniek che mi nyanjet eng’ chang’indo, koamisiei ak koeeisei ak koboiboegei.

²¹ Ak kilaitorane Solomon bororiosiek tugul koboch Ainet agoi emetab Pilistik, ak agoi kiwotetab Misri: kiibu kagochinoik, ak kootei Solomon eng’ betusiek tugul che bo sobennyi.

²² Ak amitwogikab Solomon che bo betut agenge ko ki kerutik sosom che bo busiek che tambulul che bo nganok, ak kerutik tamanwogik lo che bo busiek;

²³ eik taman che akwaen, ak eik tiptem che kigetune akwotisiek, ak kechirek bogol, ko ma boto teweretinik, ak cheptirgichik, ak tiong’ik che u chemnyogosonik, ak ngogaik che akwaen.

²⁴ Amu kibou koret tugul ne bo Ainet komosi, koboch Tipsa agoi Gasa, kiboi laitorinik tugul che mi Ainet komosi: ak kichamdos ak bik che kimi komoswekyik tugul.

²⁵ Ak kimeng’is Juda ak Israel eng’ chametab ge, kitebe chi tugul kelutab ketinnyi ne bo sabibuk, ak mogoiywennyi, koboch Dan agoi Beer-seba, eng’ betusiek tugul che bo Solomon.

²⁶ Ak kitinyei Solomon gorik elfusiek artam che bo mbartanyisiekab karisiekyik, ak bik elfusiek taman ak aeng’, che lanyei mbartanyisiek.

²⁷ Ak kiipchi kiptainichoto laitoriat Solomon amitwogik, koboto tugul che kiamisie mesetab laitoriat Solomon, kiipchi chi tugul eng’ arawennyi: ma kany korarji kiy.

²⁸ Kiipchi sairik agichek ak mobek che bo mbartanyisiek ak tiong’ik che chepcheben koib kobwa ole mi kiptainik, chi tugul ko u ye kiging’at.

²⁹ Ak kiigochi Kamuktaindet Solomon ng’omnatet ak naet, che siirtootin mising’, ak boroindab muguleldo, ko u ng’aniek che mi ngegutab nyanjet.

³⁰ Ak kisiir ng’omnatetab Solomon ng’omnatetab bik tugul che bo kong’asis, ak ng’omnatet tugul ne bo Misri.

³¹ Amu ki ng’om kosiir bik tugul; kosiir Etan Esraindet, ak Heman, ak Kalkol, ak Darda, weritab Maol: ak kiyom toogunatennyi bororiosiek tugul che kiga yiem inendet.

³² Ak kimwa kalewenaik elfusiek somok: ak tienwogikyik ko ki elfut ak mut.

³³ Ak king’alal agobo ketik, koboch taragonik che mi Lebanon agoi husop che bitos eng’ inatut: king’alal kogeny agobo tiong’ik, ak taritik, ak tuguk che ichuutegei ng’ony, ak njirenik.

³⁴ Ak kibwa bik eng’ bororiosiek tugul kogas ng’omnatetab Solomon, kobun oldab laitorinik tugul che bo ng’ony, che kiga kas agobo ng’omnatennyi.