1 LAITORINIK 22 - BUKUIT NE TILIL

Koboktoi Ahab kobokyin Ramotgilead. Meetab Ahab

¹ Ak kitebi kenyisiek somok ko mami luget kwenutab Suria ak Israel.

² Ak eng’ kenyitab somok, kochorgei Jeosapat laitoriatab Juda konyo oldab laitoriatab Israel.

³ Ak kilenji laitoriatab Israel otwogikyik, Ongen ole nenyo Ramot-Gilead, kitebye, ama kibendi kerebe eng’ eunekab laitoriatab Suria?

⁴ Ak kilenji inendet Jeosapat, Ichame kebe tuwai kebarge ak Ramot-Gilead? Ak kilenji Jeosapat laitoriatab Israel, A u kit ne i u, ak u bikyuk biguk, ak u mbartanyisiekyuk mbartanyisieguk.

⁵ Ak kilenji Jeosapat laitoriatab Israel, Asomin ale teeb eng’ ng’olyotab Jehovah rani.

⁶ Koyum anyun laitoriatab Israel maotik, olo bo bik bogol ang’wan, ak kolenji ichek, Awe kebarge ak Ramot-Gilead, anan atebi? Ak kilenji, Togoste; amu indoi Kiptaiyat eutab laitoriat.

⁷ Ago kile Jeosapat, Tos mami maotiotab Jehovah age yu si keteepse inendet?

⁸ Ak kilenji laitoriatab Israel Jeosapat, Ta komi chito agenge ne kimuchi keteepse eng’ Jehovah, Mikaia weritab Imla: ago aweche inendet; amu mamaoteni tuguk che miachen agobo ane, kobate yaitiet. Ak kile Jeosapat, Amat komwa laitoriat ko u no.

⁹ Kiguur anyun laitoriatab Israel kiptaiyat age ak kolenji, Ui imutu Mikaia weritab Imla ichogune.

¹⁰ Ak kiga tebe laitoriatab Israel ak Jeosapat laitoriatab Juda chi tugul ng’echerennyi ne bo laitornatet, kolaachi ngoroikwak che bo laitornatet, eng’ ole bara eng’ ole kibunei eng’ ormarichetab Samaria: ak kimaoteni maotik tugul eng’ tainywa.

¹¹ Ak kiyachigei Sedekia weritab Kenaana kuinoikab karik, ak kole, Kamwa Jehovah ko u ni, kole, Itoortoe chuto Suriek, kot kogesgei.

¹² Ak kimaotenso maotik tugul ko u noto agichek, kole, Togoste Ramot-Gilead, ak ibor: amu indoi Jehovah ngnasanato eutab laitoriat.

¹³ Ak king’alalji inendet chito ne kiga kiyokto koguur Mikaia, kolenji, Keero, kamwachi ng’alek che miach laitoriat ng’alekab maotik eng’ kutit agenge: asomin ale, ingoigei ng’olyondeng’ung’ ng’olyotab age eng’ ichek, ak ing’alal ng’alek che miach.

¹⁴ Ak kile Mikaia, ko u ye sobei Jehovah, ko kit ne mwawa Jehovah, amwae noto.

¹⁵ Ak kingoit inendet ole mi laitoriat, kolenji laitoriat inendet, Mikaia, kibe Ramot- Gilead kebarge, anan kitebi? Ak kiwolji inendet kolenji, Togoste, ak ibor; ak indoi Jehovah nganasanato eutab laitoriat.

¹⁶ Ak kilenji laitoriat, Ayosieun konyil ata ale, amat imwawa kiy age kobate imanit eng’ kainetab Jehovah?

¹⁷ Ak kile, Kiageer Israel tugul ko kaiyesta eng’ tulonok ko u kechirek che matinyei mestowot: ak kimwa Jehovah kole, Matinyei chuto kiptaiyat; ingoweek chi tugul kwo gonnyi eng’ kalyet.

¹⁸ Ak kilenji laitoriatab Israel Jeosapat, Kamamwaun ale, mamaoteni tuguk che miach agobo ane, kobate yaitiet?

¹⁹ Ak kile Mikaia, Kas anyun ng’olyotab Jehovah; kiageer Jehovah kotebyei eng’ ng’echerennyi ne bo laitornatet, ak kitononi luget tugul ne bo kipsengwet eng’ eunnyi ne bo tai ak ne bo katam.

²⁰ Ak kile Jehovah, Ng’o ne iberberi Ahab, si kwo kotogosta ak kome eng’ Ramot- gilead? Ak kimwa age ko u ni; komwa age ko u ni.

²¹ Ak kimong’ tamirmiriet age ak kotonon eng’ taitab Jehovah, ak kole, Aberberi.

²² Ak kimwachi Jehovah inendet kolenji, Iberbertoi ano? Ak kile, Awendi ak aegu tamirmiriet ne kenisiei eng’ kutuswekab maotikyik tugul. Ak kimwa inendet kole, Iberberi inendet, ak iterter: ui anyun, ak iyai ko u noto.

²³ Ara anyun, keero, kainde Jehovah tamirmiriet ne kenisiei kutuswekab maotichuguk tugul; ak kagomwa Jehovah yaitiet agobo inye.

²⁴ Korik anyun Sedekia weritab Kenaana, ak korabach Mikaia matanda, ak kolenji, Kabun ano tamirmirietab Jehovah ak konyo kong’alalun?

²⁵ Ak kile Mikaia, Keero, igeere eng’ betunoto, tun iwendi got ne bo orit iunyege.

²⁶ Ak kimwa laitoriatab Israel kole, Onam Mikaia, ak oweekte omutyi Amon bounindetab nganaset, ak Joas weritab laitoriat;

²⁷ ak kolenji, Kamwa laitoriat ko u ni, kole, Onde chichi korgoret, ak obae amitwogikab nyalilda, ak beekab nyalilda, agoi aweeige eng’ kalyet.

²⁸ Ak kile Mikaia, Ngot iweeige iman eng’ kalyet, ko kaga ma ng’alalena Jehovah. Ak kile, Ogas okwek bik tugul.

²⁹ Kitogosta anyun laitoriatab Israel ak Jeosapat laitoriatab Juda koba Ramot- gilead.

³⁰ Kilenji laitoriatab Israel Jeosapat, Awalege aegu age, ak awe luget; ago ilaach inye ngoroiguk che bo laitornatet. Kowalgei anyun laitoriatab Israel koek age, ak kwo luget.

³¹ Kiga ng’at laitoriatab Suria kiptainik sosom ak aeng’ che bo karisiekyik, kolenji, Amat obarge ak ne ming’in anan ko ne o, kobate laitoriatab Israel inegei.

³² Ak kingogeer kiptainichoto bo karisiek Jeosapat, kole, Iman, nito laitoriatab Israel; ak kiwelelgei kobargei ak inendet: ak kiwaach Jeosapat.

³³ Ak kingogeer kiptainikab karisiek kole ma laitoriatab Israel ni, koweek, mata kosub inendet.

³⁴ King’i chito age kwangennyi kosapsapchi, ak kitiech laitoriatab Israel ole tuiyechin karikyik che kiilaachi: kolenji anyun chito ne kweriei karinnyi, Imuta amanda eng’ ole mi luget; amu kagiguotena mising’.

³⁵ Ak kitesak luget betunoto: ak kigiti laitoriat eng’ karinnyi kotokyigei Suriek, ak kime koskoleny: ak kiitenden korotik eng’ ng’otobet koba kobun kelutab karit.

³⁶ Ak kibiit waagat eng’ luget komugul komachei kororokto asista, kele, Ingwo chi tugul nganasennyi, ak kwo chi tugul emennyi.

³⁷ Kome anyun laitoriat, ak kigisut konyo Samaria; ak kitub ichek laitoriat eng’ Samaria.

³⁸ Ak kiun bik karit eng’ tamboiyotab Samaria; ak kimel sesenik korotikyik; (kiunegei yoto chepkugonik;) ko u ng’olyotab Jehovah ne kimwa.

³⁹ Ak boisionik che ng’etunotin che bo Ahab ak tuguk tugul che kiyai, ak gotab kelekab belek ne kiteech, ak nganasok tugul che kiteech, ko tos ma sirotin eng’ bukuitab ateptab betusiek ne bo laitorinikab Israel?

⁴⁰ Koru anyun Ahab ak kwanisiekyik; ak kilaitoran Aasia werinnyi kogeer inendet.

Jeosapat, laitoriatab Juda, ak Aasia, laitoriatab Israel

⁴¹ Ak kitoi kolaitoran Jeosapat weritab Asa eng’ Juda eng’ kenyitab ang’wan ne bo Ahab laitoriatab Israel.

⁴² Ki bo Jeosapat kenyisiek sosom ak mut ye kitau kolaitorani; ak kilaitoran kenyisiek tiptem ak mut eng’ Jerusalem. Ak kigiguure kamennyi Asuba cheptab Sili.

⁴³ Ak kiwendote ortinwek tugul che bo Asa kwandanyi; ma masta eng’ ortinwechato, kiyai ne mie eng’ taitab Jehovah: agos kima kiisto komoswek che tororen; kita koenyei bik tiseiywek, ak kobeelei nyamdutik eng’ komoswechato tororen.

⁴⁴ Ak kiyai kalyet Jeosapat ak laitoriatab Israel.

⁴⁵ Ak boisionik che ng’etunotin che bo Jeosapat, ak kimnatennyi ne kiibor, ak ole kiyaita lugosiek, ko tos ma sirotin eng’ bukuitab ateptab betusiek ne bo laitorinikab Juda?

⁴⁶ Ak kiisto eng’ emet sodomik che kiga ng’et eng’ betusiekab kwandanyi Asa.

⁴⁷ Ak kima komi laitorianda Edom: ki laitoriat chito ne kirubei laitoriat.

⁴⁸ Kiyai Jeosapat melisiekab Taris si koba Opir koib tahabu: ago ma ba; amu kibutok melisiechoto eng’ Esion-geber.

⁴⁹ Kolenji anyun Aasia weritab Ahab Jeosapat, Chamji otwogikyuk koba ak otwogiguk eng’ melisiek. Ago ma cham Jeosapat.

⁵⁰ Ak kiru Jeosapat ak kwanisiekyik, ak kigitupchi ole kigitupchi kwanisiekyik eng’ nganasetab Daudi kwandanyi: ak kilaitoran Jeoram werinnyi kogeer inendet.

⁵¹ Kitoi kolaitoran Aasia weritab Ahab eng’ Israel eng’ Samaria, eng’ kenyitab taman ak tisab ne bo Jeosapat laitoriatab Juda, ak kilaitoran kenyisiek aeng’ eng’ Israel.

⁵² Ak kiyai yaitiet eng’ taitab Jehovah, ak kowendote ortinwekab kwandanyi, ak ortinwekab kamennyi ak ortinwekab Jeroboam weritab Nebat, ne kiibeete Israel si koyai tengekto.

⁵³ Ak kiot Baal, ak kogutung’ji, ak kotach Jehovah, Kamuktaindetab Israel, konerech, ko u tuguk tugul che kiga yai kwandanyi.