1 LAITORINIK 21 - BUKUIT NE TILIL

Mberetab sabibuk ne bo Nabot

¹ Ak kingobata tuguchoto, ko kitinyei Nabot Jesreelindet mbaretab sabibuk, ne kimi Jesreel, ne rikyin gotab Ahab laitoriatab Samaria.

² Ak kimwachi Ahab Nabot, kolenji, Kona mbareng’ung’ ne bo sabibuk, ayai koek kabungut, amu negite gonnyu; si ageerunenen mbaret age ne bo sabibuk ne kararan kosiir nito: anan ngot igeere komie eng’ inye, agonin kamanutiennyi eng’ siling’isiek.

³ Ak kilenji Nabot Ahab, Machamwa Jehovah agonin borotetab kwanisiekyuk.

⁴ Ak kinyo Ahab gonnyi eng’ muguleldo ne nyigis, ak konerechi amu ng’olyot ne kamwachi Nabot Jesreelindet: amu kiga lenji, Magonin borotetab kwanisiekyuk. Ak kiru eng’ itogunnyi, ak kolit olin, ak koesio koamis.

⁵ Ago kinyo Jesebel kwondanyi ole mi inendet, ak kolenji, Amu nee si ko mabaibai sobondang’ung’ ko u ni, kot ko memache iamisie?

⁶ Ak kilenji inendet, Amu kamwachi Nabot Jesreelindet alenji, Kona mbareng’ung’ ne bo sabibuk aal eng’ siling’isiek, anan ngot igeere ko mie eng’ inye, agonin mbaret age ne bo sabibuk kewale: ak kawol kole, Magonin mbarennyu ne bo sabibuk.

⁷ Ak kilenji Jesebel osotiondennyi inendet, Tos ibou nguno bororietab Israel? Ng’eet ak iamisie, ak ingobaibait muguleldang’ung’: agonin mbaretab sabibuk ne bo Nabot Jesreelindet.

⁸ Kosir anyun baronok eng’ kainetab Ahab, ak kong’och eng’ ng’oksetab Ahab, ak koyokyi baronochoto boisiek ak bik che toogunotin che kimi nganasennyi, che kimeng’jindos ak Nabot.

⁹ Ak kisir eng’ baronochoto kole, Omwaite karugutetab ge, ak onde Nabot taitab bik:

¹⁰ ak onde bik aeng’ tainnyi, werikab Belial, ak ongobaorian kotaam inendet, kole, Kechub inye Kamuktaindet ak laitoriat. Yeityo omut inendet kwo sang’, ak olach eng’ koik, kome.

¹¹ Ak kiyai bikab nganasennyi, boisiek ak bik che toogunotin che kimenyei nganasennyi, ko u ye kiga iyokyi baruet Jesebel, ko u ye kiga sir eng’ baronok che kiga iyokyi ichek.

¹² Kimwaita karugutetab ge, ak konde Nabot taitab bik.

¹³ Ak kibwa go bik aeng’u, werikab Belial, ak kotebi ng’ony eng’ tainnyi: ak kobaorian kotaam inendet, bichoto bo Belial, kogen agobo Nabot eng’ taitab bik, kole, Kachub Nabot Kamuktaindet ak laitoriat. Komut anyun inendet komaanda eng’ nganaset, ak kolach inendet eng’ koik, kome.

¹⁴ Kigoyokto anyun kemwachi Jesebel kelenji, Kagelach Nabot eng’ koik, ak kogome.

¹⁵ Ak kingogas Jesebel kole, kagelach Nabot eng’ koik, ak kagome, kolenji Jesebel Ahab, Ng’eet, nam mbaretab sabibuk ne bo Nabot Jesreelindet kobunjin, ni kietei kogonin ial eng’ siling’isiek: amu ma kosobei, kagome.

¹⁶ Ak kingogas Ahab kole kagome Nabot, kong’eet ak korekto kwo mbaretab sabibuk ne bo Nabot Jesreelindet, kwo konam kobunji.

¹⁷ Ak kinyonji ng’olyotab Jehovah Elija Tisbindet, kolenji,

¹⁸ Ng’eet chortege otuiye ak Ahab laitoriatab Israel, ne menyei Samaria: keero, mi mbaretab sabibuk ne bo Nabot ole kachorjigei kwo konam kobunji.

¹⁹ Ing’alalji inendet ilenji, Kamwa Jehovah ko u ni, kole, Kaibar ak kenam kobunjin? Ak imwachi ilenji, Kamwa Jehovah ko u ni, kole, Ole kimele sesenik korotikab Nabot, komele yoto sesenik korotiguk agichek.

²⁰ Ak kilenji Ahab Elija, Kainyorua-o, bunyodennyu? Ak kiwol kole, Ee, kaanyorun: amu kaialdege iyai yaitiet eng’ taitab Jehovah.

²¹ Keero, aibun yaitiet, ak abukten ibet, ak aiste eng’ gab Ahab lakwet age tugul ne werit, ak inendet ne kerat koboto ne itiagat eng’ Israel:

²² ak ayae gong’ung’ kogergeit ak gotab Jeroboam weritab Nebat, ak kogergeit ak gotab Baasa weritab Aija, amu taget ne kiitacha anerech, ak igochi Israel koyai tengekto.

²³ Ak kimwa Jehovah agobo Jesebel agine, kole, Amei sesenik Jesebel eng’ ye negite irimetab Jesreel.

²⁴ Amei sesenik inendet ne bo gab Ahab ne meei eng’ nganaset, ak ne meei eng’ timin koamei taritik che bo barak.

²⁵ (Ago kitom kobiit age ne kiigei Ahab ne kialdagei koyai yaitiet eng’ taitab Jehovah, ne kiing’eetyin Jesebel osotiondennyi.

²⁶ Ak kiyai tuguk che kiwechei mising’ eng’ kasubetab kanamonik, ko u tuguk tugul che kiyaei Amorik, che kion Jehovah eng’ taitab lagokab Israel.)

²⁷ Ak kingogas Ahab ng’alechato, kogerer ngoroikyik, ak kolaach kuniet, ak korugutgei, ak kosieb kuniet, ak kwo mutyo.

²⁸ Ak kinyonji ng’olyotab Jehovah Elija Tisbindet, kolenji,

²⁹ Igeere ole iming’indogei Ahab eng’ tainnyu? Amu iming’inegei eng’ tainnyu, ko maibu yaitiet eng’ betusiekyik: ago aipchini yaitiet gonnyi eng’ betusiekab werinnyi.