1 LAITORINIK 2 - BUKUIT NE TILIL

Meetab Daudi

¹ Kirik anyun betusiek che mee Daudi; ak king’at werinnyi Solomon kolenji,

² Kawe oret ne bendi bik tugul che bo ng’ony: kimitu anyun, ak iegu muren.

³ Ak irib kayomisetab Jehovah Kamuktaindeng’ung’, iwendote ortinwekyik, irib konetisiosiekyik, ak ng’atutikyik, ak kiruogutikyik, ak baornatosiekyik, ko u choto kigisir eng’ Ng’atutietab Musa, si kiberurin eng’ tugul che iyae, eng’ oldo tugul ole iwendi,

⁴ si kobiit kogimit Jehovah ng’olyondennyi ne kimwa agobo ane, kole, Ngot korib lagoguk ortinwekwak, kobendat eng’ tainnyu eng’ imanit eng’ mugulelwekwak tugul ak eng’ sobonwekwak tugul, ko u ye kimwa kole mabetenen chito ne tebe ng’echeretab laitornatet ne bo Israel.

⁵ Ak kogeny ingen aginye kit ne kiyaiywa Joab weritab Seruia, kit ne kiyachi kiptainik aeng’ che bo lugosiekab Israel, Abner weritab Ner, ak Amasa weritab Jeter, che kibar, ak kotumda korotikab luget eng’ betusiekab kalyet, ak konde korotikab luget birenet ne kiga rategei, koboto kweonik che kimi kelyekyik.

⁶ Yai anyun ko u ng’omnateng’ung’, amechamji kolil eng’ kalwalekyik eng’ kalyet.

⁷ Ago rire werikab Barsilai Gileadindet, ak ingoek ichek alak che amisie meseng’ung’: amu kibwa ole ami ye kiamwee Absalom ng’etab komet.

⁸ Ak keero, mi koboten Simei weritab Gera, Benjaminindet, ne bo Baurim, ne kichuba eng’ chubet ne ng’wan eng’ betut ne kiawendi Maanaim: ago kichorgei kotorokwa eng’ Jordan, ak kiayosiechi inendet eng’ Jehovah alenji, Mabarin eng’ rotwetab chok.

⁹ Ara anyun, amat ile, matinyei ng’ogisto, amu i chito ne ng’om; ak imuchi inai kit ne kanyoljin iyachi, ak ichoorune kalwalekyik korotik koba oldab che kigobek.

¹⁰ Ak kiru Daudi koboto kwanisiekyik, ak kigitupchi nganasetab Daudi.

¹¹ Ak betusiek che kilaitorane Daudi Israel, ko ki kenyisiek artam: kilaitoran kenyisiek tisab eng’ Hebron, ak kilaitoran eng’ Jerusalem kenyisiek sosom ak somok.

¹² Ak kitebe Solomon ng’echeretab laitornatet ne bo Daudi kwandanyi; ak kigigimit bounatennyi mising’.

Kebarei Adonija ak Joab, ak kigimiti laitornatetab Solomon

¹³ Kinyo anyun Adonija weritab Hagit ole mi Bat-seba kametab Solomon. Ak kile, Inyone eng’ kalyet? Ak kile, Anyone eng’ kalyet.

¹⁴ Ak kile kogeny, Atinye kit ne amache amwaun. Ak kilenji, Mwa anyun.

¹⁵ Ak kile, Ingen ile ki nenyu bounatet, ak kigeera Israel tugul, kole alaitoran: ago kiwalak bounatet, ak kigobunji werit ne kitupche: amu ki nenyi kobunu Jehovah.

¹⁶ Ara anyun, asomin kit agenge, amat ietena. Ak kilenji, Mwa anyun.

¹⁷ Ak kile, Asomin ale ng’alalji laitoriat Solomon, (amu maesioun,) ale kogona Abisag Jepsunamindet atun.

¹⁸ Ak kile Bat-seba, Mie; ang’alaljineun laitoriat.

¹⁹ Kiwa anyun Bat-seba ole mi laitoriat Solomon, kwo kong’alaljinechi Adonija. Ak king’eet laitoriat kotorok inendet, ak kong’urukyi, ak kotebe ng’echerennyi ne bo laitornatet, ak king’at keib ng’echeretab laitornatet kotebe kametab laitoriat; ak kitebe kamennyi eunnyi ne bo tai.

²⁰ Yeityo kole, Asomin kiy agenge ne ming’in; amat ietena. Ak kilenji laitoriat inendet, Som anyun, kamennyu: amu maetenen.

²¹ Ak kile, Ingigochi Adonija ng’etab komet Abisag Jepsunamindet kotun.

²² Ak kiwol laitoriat Solomon kolenji kamet, Amu nee si isomji Adonija Abisag Jepsunamindet? Somji inendet bounatet agine; amu inendet ko tupchennyu ne o; somji inendet ak Abiatar tisiindet, ak Joab weritab Seruia.

²³ Koyosio anyun laitoriat Solomon eng’ Jehovah kole, Ingoyaiywa Kamuktaindet ko u noto, ak kotes, ngot ko ma mwa Adonija ng’olyondoni agobo sobondanyi.

²⁴ Noto anyun ko u ye sobei Jehovah, ne kiigimita, ak kondea ng’echeretab laitornatet ne bo Daudi baba, ak ne kiteekwa got, ko u ye kiiyomis inendet; kebarei Adonija iman rani.

²⁵ Ak kiiyokto laitoriat Solomon Benaia weritab Jeoiada; ak kiwa kobar inendet.

²⁶ Ak kilenji laitoriat Abiatar tisiindet, Ui Anatot, ole mi mbareniguk; amu nyoljinin imee: ago mabarin rani, amu kiibe moingetab Kiptaiyat Jehovah eng’ taitab Daudi baba, ak kiginyalilin eng’ tuguk tugul che kiginyalile baba.

²⁷ Koon anyun Solomon Abiatar si mata koek tisiindetab Jehovah; si kobiit kosulda ng’olyotab Jehovah, ne kimwa agobo gotab Eli eng’ Silo.

²⁸ Ak kiit ng’alek oldab Joab: amu kiga kosub Joab Adonija, agot nganda kima isub Absalom. Ak kimwechi Joab Emaitab Jehovah, ak konam kuinoikab kaptisisiet.

²⁹ Ak kigimwachi laitoriat Solomon kelenji, Kagomwechi Joab Emaitab Jehovah, ak ogeero, mi ye bo kaptisisiet. Kiiyokto anyun Solomon Benaia weritab Jeoiada, kolenji, Ui ibar.

³⁰ Ak kiit Benaia Emaitab Jehovah, ak kolenji inendet, Kamwa laitoriat ko u ni, kole, Mong’u. Ak kile, Achicha; amechini yuto. Ak kiipchi Benaia laitoriat ng’olyot kogeny, kolenji, Kamwa Joab ko u ni ak kawolwa ko u ni.

³¹ Ak kilenji laitoriat inendet, Yai ko u ye kagomwa, ak ibar inendet ak itub; si kobiit iiste korotik, che kitumda Joab buch, eng’ ane ak eng’ gotab baba.

³² Ak weekyin Jehovah korotikyik metinnyi, amu kibar bik aeng’ che ki bo iman ak ko koigoi kosiir inendet, ak kibar ichek eng’ rotwetab chok, ama ingen kwandanyu Daudi, choto ko Abner weritab Ner, kiptaiyatab lugetab Israel, ak Amasa weritab Jeter, kiptaiyatab lugetab Juda.

³³ Weekyingei anyun korotikwak metitab Joab, ak metowekab iyotennyi koigeny: ago mi kalyet koigeny ne bunu Jehovah, gab Daudi ak iyotennyi, ak gonnyi ak ng’echerennyi ne bo laitornatet.

³⁴ Kotogosta anyun Benaia weritab Jeoiada, kwo kokwer inendet ak kobar; ak kigitupchi gonnyi eng’ ong’atet.

³⁵ Ak kiinde laitoriat Benaia weritab Jeoiada koboi luget kogeer inendet: ak kiinde laitoriat Sadok tisiindet kogeer Abiatar.

³⁶ Ak kiiyokto laitoriat keguur Simei konyo ole mi inendet, ak kolenji, Teekyigei got eng’ Jerusalem, ak imeny oloto, amat iwe ui.

³⁷ Amu eng’ betut ne imandoi ak ilandoe kererutab Kedron, inai anyun komie ile imee iman: tebe korotiguk meting’ung’.

³⁸ Ak kilenji Simei laitoriat, Mie mwaonoto: ko u ye kamwa kiptaiyandennyu laitoriat, koyaei otwogindeng’ung’ ko u noto. Ak kimeny Simei Jerusalem betusiek che chang’.

³⁹ Ak kingobata kenyisiek somogu, komwei otwogik aeng’ che bo Simei koba oldab Akis, weritab Maaka laitoriatab Gat. Ak kigimwachi Simei kelenji, Keero, mi otwogiguk Gat.

⁴⁰ Ak king’eet Simei, ak koiito sigiriennyi, ak kwo Gat agoi oldab Akis, kocheng’ otwogikyik: ak kiwa Simei komut otwogikyik eng’ Got.

⁴¹ Ak kigimwachi Solomon kelenji, Kokwa Simei eng’ Jerusalem, kwo Gat, ak kogoweek.

⁴² Ak kiiyokto laitoriat keguur Simei, ak kolenji inendet, Kima alenjin iyosie eng’ Jehovah, ak ateeun alenjin, Nai komie ile, eng’ betut ne imandoi, ak iwendote eng’ oldo age tugul, imee iman? Ak kiilenja, Mie mwaonito kaagas.

⁴³ Amu nee anyun si merib kayosietab Jehovah, ak ng’atutiet ne kiang’atin?

⁴⁴ Kimwachi kogeny laitoriat Simei kolenji, Ingen inye tengektang’ung’ tugul ne mi muguleldang’ung’; ne kiiyachi Daudi baba? Noto anyun weekyin Jehovah tengektang’ung’ meting’ung’.

⁴⁵ Ago kiberuri laitoriat Solomon, ak kigimiti koigeny bounatetab ng’echeretab laitornatet ne bo Daudi eng’ taitab Jehovah.

⁴⁶ King’at anyun laitoriat Benaia weritab Jeoiada; ak kimanda kobar; kome anyun. Ak kigigimit bounatet eng’ eutab Solomon.