1 LAITORINIK 17 - BUKUIT NE TILIL

Kobaei chepkuginik Elija. Kong’eeti Elija weritab mosoget

¹ Ak kilenji Elija Tisbindet ne ki bo bik che kimenyei Gilead, Ahab, Ko u ye sobei Jehovah, Kamuktaindetab Israel, ne atonone tainnyi, ko mabiitu rewot anan ko ropta kenyisiechu, kobate ko u ng’olyondennyu.

² Ak kinyonji inendet ng’olyotab Jehovah, kolenji,

³ Ui eng’ yu, ak itokyige komostab kong’asis, ak iunyge eng’ kererutab Kerit, ne tokyingei Jordan.

⁴ Ak iee beekab kererunato; ak kaang’at chepkuginik kobain eng’ yoto.

⁵ Kwo anyun ak koyai ko u ng’olyotab Jehovah: amu kiwa ak komeny ye negite kererutab Kerit, ne tokyingei Jordan.

⁶ Ak kiipchi inendet makatinik ak banyek chepkuginik karon, ak koipchi makatinik ak banyek koskoleny; ak kiee beekab kererunato.

⁷ Ak ki eng’ betusiek che matia koteny kererunato, amu kimata korobon emet.

⁸ Kinyonji inendet ng’olyotab Jehovah kolenji,

⁹ Ng’eet, ak iwe Sarepat, ne bo Sidon, ak imeny oloto: keero, kaang’at mosoget eng’ oloto kobain.

¹⁰ Kong’eet anyun, ak kwo Sarepat; ak kingoit ormarichetab nganaset, keero, kimi yoto kwondo koyumi kwenik: ak kiguur inendet, ak konyo kolenji, Asomin ale, ibwa beek eng’ teret ne ming’in, aee.

¹¹ Ak ye kita kowendi koibu, koguur inendet, kolenji, Asomin ale, ibwa makatiat kitigin eng’ eung’ung’.

¹² Ak kile, Ko u ye sobei Jehovah Kamuktaindeng’ung’, ko matinye makatiat, kobate busiekab eut che mi teret, ak mwaita kitigin ne mi sotet ne ming’in: ak keero, abute kwenik aeng’, si kekwang’jinege ak werinnyu, si keam, ak kebegu.

¹³ Ak kilenji Elija inendet, Ameiywei; ui, ak iyai ko u ye kaimwa: ago kwang’wa korok makatiat kitigin, ak iibwa komong’, yeityo okwang’jige ak wering’ung’.

¹⁴ Amu kamwa Jehovah, Kamuktaindetab Israel ko u ni, kole, Maigesugei busiek eng’ teronoto, anan kobek mwaita eng’ sotonoto ming’in, kot koit betut ne iyokyin Jehovah ropta ng’ony.

¹⁵ Ak kiwa koyai ko u mwaetab Elija: ak kiam amitwogik, kwonyoto, ak Elija, koboto gotab kwonyoto, eng’ betusiek che chang’.

¹⁶ Ma igesgei busiek eng’ teret, anan kobek mwaita eng’ sotet ne ming’in, ko u ng’olyotab Jehovah, ne kimwa eng’ Elija.

¹⁷ Ak kingobata tuguchu, komian lakwetab kwonyoto, ne inendet ko chebioset ne bo got; ak kigoromit mianoto, kot ko ma kobusi.

¹⁸ Ak kilenji Elija, Kiting’ege nee ak inye, chitab Kamuktaindet? Koinyo oli ami si kong’ang’ak tengektanyu, ak ibar werinnyu!

¹⁹ Ak kilenji inendet, Kona wering’ung’. Ak kitaach Elija lakwet eng’ tegetab mosogonato, ak koganab, ak komut kwo got age ne mi barak, ole kimenyei, ak komogonji itogunnyi.

²⁰ Ak kirirji Jehovah, kole, Ee Jehovah, Kamuktaindennyu, keipchi kogeny yaitiet mosogani ami gonnyi, ibare werinnyi?

²¹ Ak kiitoegei lakwet konyil somok, ak korirji Jehovah kolenji, Ee Jehovah, Kamuktaindennyu, asain ale, ingoweekyigei lakwani sobondanyi kogeny.

²² Ak kigas Jehovah kutitab Elija; ak kiweekyigei lakwet sobondanyi kogeny, ak kisob.

²³ Ak kiganab Elija lakwet, ak komut kochorgei eng’ goyoto konyo got ne bo ng’ony, ak kogochi kamet: ak kile Elija, Keero, sobei wering’ung’.

²⁴ Ak kilenji kwonyoto Elija, Kaanai nguno ale i chitab Kamuktaindet, ak ko bo iman ng’olyotab Jehovah ne mi kuting’ung’.