1 LAITORINIK 16 - BUKUIT NE TILIL

Ela, Simri ak Omri, laitorinikab Israel

¹ Ak kinyonji ng’olyotab Jehovah Jeu weritab Hanani agobo Baasa kolenji,

² Ko u ye kiatororin imong’une temburiek, ak ayain iegu bounindetab bikyuk Israel; ak koiwendote ortinwekab Jeroboam, ak koigochi bikyuk koyai tengekto, kotacha eng’ tengekwogikwak anerech:

³ keero, abuktoi Baasa agestoi ak gonnyi; ak ayai gong’ung’ koigei gotab Jeroboam weritab Nebat.

⁴ Inendet ne bo gab Baasa ne mechin nganaset, koamei sesenik; ak inendet ne mechin timin, koamei taritik che bo barak.

⁵ Ak boisionik che ng’etunotin che bo Baasa, ak tuguk che kiyai, ak kimnatennyi, ko ma sirotin eng’ bukuitab ateptab betusiek ne bo laitorinikab Israel?

⁶ Ak kiru Baasa ak kwanisiekyik, ak kigitupchi Tirsa; ak kilaitoran Ela werinnyi kogeer inendet.

⁷ Ak kinyonji ng’olyotab Jehovah kogeny maotiot Jeu weritab Hanani agobo Baasa ak gonnyi, amu yaitiet tugul ne kiyai eng’ taitab Jehovah, kotach inendet eng’ boisionikab eunekyik kot konerech, amu kiigei gotab Jeroboam, ak amu kibar inendet.

⁸ Kitau Ela weritab Baasa kolaitorani eng’ Israel, eng’ Tirsa; eng’ kenyitab tiptem ak lo ne bo Asa laitoriatab Juda, ak kilaitoran kenyisiek aeng’.

⁹ Ak kichaam inendet otwogindennyi Simri, kiptaiyatab kebebertab karisiekyik: kimi Tirsa, koeeisei kot ko kiga kobogit eng’ gotab Arsa, ne kibou got eng’ Tirsa:

¹⁰ ak kiwa go Simri kokwer inendet, ak kobar, eng’ kenyitab tiptem ak tisab ne bo Asa laitoriatab Juda; ak kilaitoran kogeer inendet.

¹¹ Ak kingotoi kolaitoran, ko kata kotebe ng’echerennyi ne bo laitornatet, kobar gotab Basa tugul: ma ituukyi inendet lakwet agot agenge ne werit, anan ko ne bo tilionutikyik, anan ko ne bo choronokyik.

¹² Kibar anyun Simri got tugul ne bo Baasa, ko u ng’olyotab Jehovah ne kimwa agobo Baasa, eng’ maotiot Jeu.

¹³ Amu tengekwogik tugul che bo Baasa, ak tengekwogikab Ela werinnyi, che kiyai, che kiibeete Israel si koyai tengekto, kotach Jehovah Kamuktaindetab Israel konerech, eng’ boisionikwak che bo buch.

¹⁴ Ak boisionik che ng’etunotin che bo Ela, ak tuguk tugul che kiyai, ko ma sirotin eng’ bukuitab ateptab betusiek ne bo laitorinikab Israel?

¹⁵ Kilaitoran Simri betusiek tisab eng’ Tirsa, eng’ kenyitab tiptem ak tisab, ne bo Asa laitoriatab Juda. Ak kiga teech bik kotokyingei Gibeton, ne ki bo Pilistik.

¹⁶ Ak kigas bichoto kimi nganaset kelen, kogochaamso Simri, ak kogobar laitoriat: koyai anyun Israel tugul Omri, kiptaiyatab luget, koek laitoriatab Israel, eng’ betunoto eng’ nganaset.

¹⁷ Ak kiwa Omri kotogosta eng’ Gibeton, komi Israel tugul koboto inendet, ak koyiem Tirsa.

¹⁸ Ak kingogeer Simri kole, kagenam nganaset, kwo irimet orit ne bo gotab laitoriat, ak kobeeldagei gotab laitoriat ak kime,

¹⁹ amu tengekwogikyik che kiyai, koyai yaitiet eng’ taitab Jehovah, kowendate ortinwekab Jeroboam, ak tengektanyi ne kiyai, kobeete Israel si koyai tengekto.

²⁰ Ak boisionik che ng’etunotin che bo Simri, ak chaamsennyi ne kichaamso, ko ma sirotin eng’ bukuitab ateptab betusiek ne bo laitorinikab Israel?

²¹ Kopcheiyo anyun bikab Israel koek kebeberwek aeng’: kiisub Tibni weritab Ginat bik kebeber, koyai inendet koek laitoriat; ak kiisub Omri kebeberta age.

²² Ago kiiterter bik che kiga isub Omri bik che kiga isub Tibni weritab Ginat: kome anyun Tibni, kolaitoran Omri.

²³ Kitoi Omri kolaitoran eng’ Israel eng’ kenyitab sosom ak agenge ne bo Asa laitoriatab Juda, ak kilaitoran kenyisiek taman ak aeng’: kilaitoran kenyisiek lo eng’ Tirsa.

²⁴ Ak kial tulwetab Samaria ne bo Semer eng’ talentaisiek aeng’ che bo feda; ak kiteech tulwonoto, ak komwaitae kainetab nganaset ne kiga teech, kainetab Semer, chito ne ki bo tulwonoto bo Samaria.

²⁵ Ak kiyai Omri ne ya eng’ taitab Jehovah, ak kiyai yaitiet kosiir bik tugul che kiindoune inendet.

²⁶ Amu kiwendote ortinwek tugul che bo Jeroboam weritab Nebat, ak tengekwogikyik che kiibeete Israel si koyai tengekto, kotach Jehovah Kamuktaindetab Israel konerech, eng’ boisionikwak che bo buch.

²⁷ Ak boisionik che ng’etunotin che bo Omri che kiyai ak kimnatennyi ne kiibor, ko ma kisir eng’ bukuitab ateptab betusiek ne bo laitorinikab Israel?

²⁸ Koru anyun Omri ak kwanisiekyik, ak kigitupchi Samaria: ak kilaitoran Ahab werinnyi kogeer inendet.

Ahab, laitoriatab Israel

²⁹ Ak kitoi kolaitoran Ahab weritab Omri eng’ Israel, eng’ kenyitab sosom ak sisiit, ne bo Asa laitoriatab Juda: ak kilaitoran Ahab weritab Omri eng’ Israel eng’ Samaria kenyisiek tiptem ak aeng’.

³⁰ Ak kiyai Ahab weritab Omri yaitiet eng’ taitab Jehovah kosiir bik tugul che kiindoune inendet.

³¹ Ak kigeer inendet ko kit ne ming’in kowendote tengekwogikab Jeroboam weritab Nebat, kwo anyun kotun Jesebel cheptab Etbaal laitoriatab Sidonik, ak kwo koot Baal ak kogutung’ji.

³² Ak kiteekyi Baal kapkorosut eng’ gotab Baal, ne kiga teech eng’ Samaria.

³³ Ak kiyai Ahab Asera; ak kiyai Ahab tuguk alak; kotes kotach Jehovah, Kamuktaindetab Israel, konerech, kosiir laitorinik tugul che bo Israel che kiindoune inendet.

³⁴ Ak kiteech Hiel Bet-elindet Jeriko eng’ betusiekyik: ak kilume lumeiywondennyi meetab Abiram taitanyi, ak kolumda ormarichokyik eng’ meetab werinnyi Segub towennyi; ko u ng’olyotab Jehovah, ne kimwa eng’ Josua weritab Nun.