1 LAITORINIK 13 - BUKUIT NE TILIL

Biretab maotiot ne ma kas it

¹ Ak ogeero, kinyo chitab Kamuktaindet eng’ Juda eng’ ng’olyotab Jehovah konyo Bet-el: ak kitononi Jeroboam eng’ ye negite kapkorosut kobeelei nyamdutik.

² Ak kiwaage kapkorosut eng’ ng’olyotab Jehovah, kole, Ee, kapkorosuni, kapkorosuni, kamwa Jehovah ko u ni kole, Keero, tun kisikyin lakwet gotab Daudi, ne kiguure kainennyi Josia; ak kogoitoenen inendet tisiikab komoswek che tororen, che beelenen nyamdutik, ak tun beelei eng’ inye kowekab bik.

³ Ak kiibor kaborunet eng’ betunoto kole, Ni kaborunet ne kamwa Jehovah: keero, betoksei kapkorosut, ak kotumdagei orek che mi baragunnyi.

⁴ Ak kingogas laitoriat ng’alekab chitab Kamuktaindet, ne kiwaage kapkorosut eng’ Bet-el, kochuul anyun Jeroboam eunnyi eng’ kapkorosut kong’werer kole, Onam inendet. Ak kiyaam eunoto kiga chuul, ne mata komuch koaruny kogeny.

⁵ Kobetak kapkorosut agine, ak kotumdagei orek eng’ kapkorosunoto, ko u kaborunet ne kaga kobor chitab Kamuktaindet eng’ ng’olyotab Jehovah.

⁶ Ak kiwolji laitoriat chitab Kamuktaindet kolenji, Igaigai Jehovah Kamuktaindeng’ung’, ak isaiywa, si koweek eunnyu kogeny kosob. Ak kisa chitab Kamuktaindet Jehovah, ak kiweek eutab laitoriat kogeny kosob, ak koigei kit ne ka u eng’ tai.

⁷ Ak kilenji laitoriat chitab Kamuktaindet, Nyo kebe ga, iwe imuuny, ak agonin melekto.

⁸ Ak kilenji chitab Kamuktaindet laitoriat, Agot ngot igona kebebertab gong’ung’, ko magibendi go tuwai, ama amisiei anan aee beek eng’ olito:

⁹ amu kang’ata ng’olyotab Jehovah ko u noto, kole, Amat iam amit anan iee beek, anan iweegege oret ne kebunu.

¹⁰ Kwo anyun kobun oret age, ma weegege oret ne kibunu konyonei Bet-el.

¹¹ Kimenyei maotiot ne os nganasetab Bet-el; ak kinyo age eng’ werikyik komwachi inendet boisionik tugul che kiga yai chitab Kamuktaindet betunoto eng’ Bet-el; ng’alek che kiga mwachi laitoriat, komwachi kwandanywa ng’alechato agichek.

¹² Ak kilenji ichek kwandanywa, Kabun ano? Ak kiga keer werikyik oret ne kabun chitab Kamuktaindet ne kibunu Juda.

¹³ Ak kilenji werikyik, Oiitawa sigiriet. Koiitochi inendet anyun sigiriet: ak kilany.

¹⁴ Ak kiisub chitab Kamuktaindet, ak kinyor kotebyei eng’ ketit kel: ak kilenji inendet, Tos, i chitab Kamuktaindet no kebunu Juda? Ak kile, A inendet.

¹⁵ Kolenji anyun inendet, Nyo kebe ga tuwai, iamisie.

¹⁶ Ak kile, Mamuchi keweeige tuwai, anan kebe go tuwai: ama ame amit anan kee beek tuwai eng’ oli:

¹⁷ amu kagimwawa eng’ ng’olyotab Jehovah kele, Amat iam amit anan iee beek eng’ oloto, anan iweegege oret ne kebune.

¹⁸ Ak kilenji inendet, A maotiot agane ko u inye; ak kang’alalwa malaikaiyat eng’ ng’olyotab Jehovah kole, Imutu inendet konyo gong’ung’, si koamis ak koee beek. Ago kimwachi lembech.

¹⁹ Koweek anyun ak inendet, kwo koamis eng’ gonnyi ak koee beek.

²⁰ Ak ye kita koamisiei, konyonji ng’olyotab Jehovah maotiondonoto kiimutu inendet koweek:

²¹ ak kimwachi eng’ kutit ne o chitab Kamuktaindet ne kibunu Juda, kolenji, Kamwa Jehovah ko u ni, kole, Amu kaibistoe ng’olyotab Jehovah, ama irib ng’atutietab Jehovah Kamuktaindeng’ung’ ne kang’atin,

²² ago keweeige, ak iamisie ak iee beek eng’ ole kaga mwaun kolenjin, Amat iam amit anan iee beek; maitei mustang’ung’ kereritab kwanisieguk.

²³ Ak kingo kagoamis ak koeeiso, koiitochi inendet sigiriet maotiondoni kaweechi inendet.

²⁴ Ak kingo kakwa, konyor ng’etundo inendet eng’ oret, ak kobar inendet: ak kigiwirji mustanyi oret, ak kitonone sigiriet ye negite musto; kitonone ng’etundo agine ye negite musto.

²⁵ Ak ogeero, kisiirto bik eng’ yoto, ak kogeer musto ne kagiwirji oret, ak ng’etundo ne kitononi eng’ ye negite musto: ak kiba komwaita eng’ nganaset ole kimenyei maotiondonoto os.

²⁶ Ak kingogas maotiondonoto kole, Inendet ko chitab Kamuktaindet, ne kaga bistoe ng’olyotab Jehovah: ko noto anyun, kaigochi Jehovah inendet ng’etundo, ne kagerer inendet ak kobar, ko u ng’olyotab Jehovah ne kiga mwachi inendet.

²⁷ Ak kimwachi werikyik kolenji, Oiitawa sigiriet. Ak kiito.

²⁸ Kiwa anyun ak konyor mustanyi ko kagiwirji oret, ak sigiriet ak ng’etundo kotonondos eng’ ye negite musto: ma am ng’etundo musto, anan kobar sigiriet.

²⁹ Ak kisut maotiondonoto mustab chitab Kamuktaindet, ak konde sigiriet barak, ak koib koweekta: ak konyo nganasetab maotiondonoto os, konyo korir, ak kotub inendet.

³⁰ Ak kiinde musoto kererinnyi; ak korirji inendet, kole, Bwa tupchennyu!

³¹ Ak kingo kagotub inendet, komwachi werikyik kolenji, Tun kaamee, otupcha kererini kagitupchi chitab Kamuktaindet; onde kowekyuk korupgei ak chechik.

³² Amu isuldoi iman mwaet ne kimwa eng’ ng’olyotab Jehovah, ne kawaage kapkorosut eng’ Bet-el, ak gorik tugul che bo komoswek che tororen che mi nganasokab Samaria.

³³ Kingobata nito, ko ma week Jeroboam eng’ orennyi ne ya, ago kiyai kogeny tisiik eng’ bik tugul che bo komoswek che tororen: kiitaban age tugul ne kimach, si kobiit tisiik che bo komoswek che tororen:

³⁴ ak kiek kii tengekto eng’ gotab Jeroboam, si koisto kobet, ak kong’em kogesgei eng’ ng’ony.