1 LAITORINIK 10 - BUKUIT NE TILIL

Korutochin laitoriatab Seba Solomon

¹ Ak kingogas laitoriatab Sheba, ne ki kwondo, kalosunetab Solomon agobo kainetab Jehovah, konyo kotiem inendet eng’ teebutik che uuen.

² Ak kinyo Jerusalem koboto bik che chang’, ak tambesik che ibei tuguk che ng’uu ne anyiny, ak tahabusiek che chang’, ak koik che bo kamanutiet ne o: ak kingoit ole mi Solomon kong’alal ak inendet agobo tuguk tugul che kimi muguleldanyi.

³ Ak kiwolji Solomon inendet teebutikyik tugul: kima biit kiy age tugul ne ung’at eng’ laitoriat ne ma mwachi inendet.

⁴ Ak kingo kagogeer laitoriandanato bo Sheba ng’omnatet tugul ne bo Solomon, ak got ne kiga koteech,

⁵ ak amitwogikyik, ak ole teptoi otwogikyik, ak tononet ne tononjin boisiet kiboitinikyik, ak ngoroikwak, ak bikyik che ipchin tuguk che eei, ak kagochinoikyik che kiigoitoi eng’ gotab Jehovah: kogesgei anyun kimnatennyi.

⁶ Ak kilenji kwonyoto laitoriat, Bo iman ng’alechu kiagase eng’ emennyu agobo boisioniguk, ak ng’omnateng’ung’.

⁷ Ago kimayan ng’alechato kot anyo, ak kagogeer konyekyuk: ak keero, kima it agot kebeber che kiga kimwawa: siirei ng’omnateng’ung’ ak berurtang’ung’ kalosunet ne kigagas.

⁸ Boiboi biguk, boiboi otwogichuguk, chu tonondos eng’ taing’ung’ kotugul, ak kogasei ng’omnateng’ung’.

⁹ Iberurot Jehovah Kamuktaindeng’ung’, ne kibaibait eng’ inye, ak kondein ng’echeretab laitornatetab Israel: amu kicham Jehovah Israel koigeny, koyain anyun iegu laitoriat, si iyai kiruoget ak imanda.

¹⁰ Ak kiigochi kwonyoto Solomon talentaisiek bogol ak tiptem che bo tahabu, ak nyamdutik che ng’uu ne anyiny, che chang’ mising’; ak koik che bo kamanutiet ne o: kimata keip kogeny nyamdutik che ng’uu ne anyin ng’isiat che te choto che kiigochi laitoriatab Sheba laitoriat Solomon.

¹¹ Ak kiib agichek melisiekab Hiram, che kiibu tahabu eng’ Opir, ketikab almug che chang’ kot ak koik che bo kamanutiet ne o, che kiibune Opir.

¹² Ak kiyae laitoriat ketichato bo almug, tolochikab gotab Jehovah, ak gotab laitoriat, kiyae kogeny ketichato ketubosiek ak kibugandinik che bo bik che tieni: mata keib ketikab almug che u choto kogeny, amata kegeer agoi rani.

¹³ Ak kiigochi laitoriat Solomon laitoriatab Sheba kiy age tugul ne kimach, kiy age tugul ne kisom, ko ma boto choto che kiigochi Solomon kwonyoto eng’ aiyebindab laitornatennyi. Kiweektagei anyun, kwo emennyi, inendet koboto otwogikyik.

Magornatosiekab Solomon

¹⁴ Ak nyigisindab tahabu che kiipchi Solomon eng’ kenyit agenge ko ki talentaisiek bogol lo ak tamanwogik lo ak lo che bo tahabu,

¹⁵ ama boto che kialdooti bik, ak che kiyae mung’aret chemung’arainik, ak che bo laitorinik tugul che bo bik che burugotin, ak che bo bounikab emet.

¹⁶ Ak kiyai laitoriat Solomon long’onik che eechen bogol aeng’ che bo tahabu che kigitany: kigiyae long’et agenge ne o sekelisiek bogol lo che bo tahabu.

¹⁷ Ak kiyai long’onik che mengechen bogol somok che bo tahabu che kigitany; kigiyae long’et agenge ratilisiek somok che bo tahabu: kigonore laitoriat long’onichoto gotab osnetab Lebanon.

¹⁸ Ak koyai kogeny laitoriat ng’echeret ne o ne bo laitornatet eng’ kelekab belek, ak koliige tahabu che kororon mising’.

¹⁹ Kimi tuguk long’eiywot ne kitinyei tuguk lo che kigitiegoti ketogosyin ng’echeretab laitornatet, ak ki kitainganat ng’echeronato komostab batai: ak kimi ketik komosi ak komosi che tiiegei eunek, ak itonwek aeng’ che bo ng’etunyik eng’ komosi ak komosi, eng’ ye negite ketichato kitiie eunek.

²⁰ Ak kitonondos itonwek tamanu ak aeng’ che bo ng’etunyik eng’ komoswek tuwai eng’ long’eiywondonoto kitinyei tuguk lo che kitiegoti ketogostoi: kima komi age ne kergei ak noto ne kigiyai eng’ bororiet age tugul.

²¹ Ki bo tahabu tuguk tugul che keeise che bo laitoriat Solomon, ak tuguk tugul che kigiboisie eng’ gotab osnetab Lebanon ko ki bo tahabu che tililen: kima komi agot agenge ne bo feda; kima ko kiy feda eng’ betusiekab Solomon.

²² Amu kitinyei laitoriat eng’ nyanjet melisiek che bo Tarsis koboto melisiek che bo Hiram: kiibu melisiek che bo Tarsis konyil agenge eng’ kenyisiek somok tahabu, ak feda, ak kelekab belek, ak tisok, ak taritik che kiguure tausi.

²³ Kisiir anyun laitoriat Solomon laitorinik tugul che bo ng’ony eng’ magornatet ak ng’omnatet.

²⁴ Ak kicheng’ ng’ony komugul kogeer Solomon, kogas ng’omnatennyi, ne kigainde Kamuktaindet muguleldanyi.

²⁵ Ak kiib chi tugul kagochinennyi, tugukab feda, ak tugukab tahabu, ak ngoroik, ak karikab luget, ak nyamdutik, ak mbartanyisiek ak nyumbusiek, koitet ne kigigonu eng’ kenyit age tugul.

²⁶ Ak kiiyum Solomon karisiekab luget ak bik che lanyei mbartanyisiek: ak kitinyei karisiek elfut ak bogol ang’wan ak bik che lanyei mbartanyisiek elfusiek taman ak aeng’ che kiinde nganasokab karisiek, ak che kimi ole mi laitoriat eng’ Jerusalem.

²⁷ Kiyai laitoriat feda eng’ Jerusalem koigei koik, ak kiyai taragonik koigei mogoonik che mi emet ne soi, eng’ chang’indo.

²⁸ Ak mbartanyisiechato che kitinyei Solomon ko kigigetune Misri; ak kitaach chemung’arainikab laitoriat eng’ akwotisiek, kitaach akwet age tugul eng’ alyennyi.

²⁹ Ak kimong’u karit eng’ Misri eng’ alyetab sekelisiek bogol lo che bo feda, ak mbartanyit ko ki sekelisiek bogol ak konom: ak ki u noto eng’ laitorinik tugul che bo Hitik, ak laitorinik che bo Suria, kogetu icheget.