1 LAITORINIK 1 - BUKUIT NE TILIL

Betusiek che bo let che bo laitoriat Daudi, ak kieeti Solomon

¹ Kiga koosit anyun laitoriat Daudi, kiga kotar kenyisiek che chang’; ak kituch ichek inendet eng’ ngoroik, ago ma kas lalang’indo.

² Kilenji anyun otwogikyik inendet, Ingecheng’ji kiptaiyandennyu laitoriat bergeiyat ne ta ko ming’in, kotonon eng’ taitab laitoriat, korib; ak ingoru eng’ tegeng’ung’, si kosich kiptaiyandennyu laitoriat lalang’indo.

³ Kocheng’ anyun chepto ne kararan eng’ komoswek tugul che bo Israel, ak kinyor Abisag Jepsunamindet, ak komutyi laitoriat.

⁴ Ak ki kararan cheboto mising’; ak kirib laitoriat, ak koboisiechi inendet; ago ma ituiyogei laitoriat ak inendet.

⁵ Kiieetgei Adonija weritab Hagit, kole, Aegu laitoriat: ak kichopchigei karisiek ak che lanyei mbartanyisiek, ak bik konom che ruaei kondoe inendet.

⁶ Ago ma iim inendet kwandanyi eng’ betut age tugul, kole, Amu nee si iyai ko u nito? Ak ki muren ne kararan kot agine; ak kirubu Absalom.

⁷ Ak king’alal ak Joab weritab Seruia, koboto Abiatar tisiindet: ak kiisub Adonija kotoret inendet.

⁸ Ago kima komi koboto Adonija, Sadok tisiindet, ak Benaia weritab Jeoiada, ak maotiot Natan, ak Simeri, ak Rei, ak bik che nyigonen che ki bo Daudi.

⁹ Ak kieny Adonija kechirek ak tuga ak che akwaen eng’ ole negite koitab Soelet, ne mi ole negite En-rogel; ak kiguur tupchosiekyik tugul werikab laitoriat, ak bik tugul che bo Juda otwogikab laitoriat:

¹⁰ ago maguur maotiot Natan, ak Benaia, ak bik che nyigonen, ak Solomon ng’etab kamet.

¹¹ Komwachi anyun Natan Batseba kametab Solomon, kolenji, Tom igas kele laitorani Adonija weritab Hagit, amaingen Daudi kiptaiyandennyi?

¹² Nyo anyun, asomin ale, ngang’omitin, si kobiit isoru sobondang’ung’, ak sobondab wering’ung’ Solomon.

¹³ Ui go ole mi Daudi, ak ilenji inendet, Tos kima iyosiechi inye kiptaiyandennyu, ee laitoriat, otwogindeng’ung’ ne chepto, ilenji, Laitorani iman Solomon wering’ung’ ko kaamee, tebe ng’echerennyu ne bo laitornatet? Amu nee anyun si kolaitoran Adonija?

¹⁴ Keero, ye ta ong’alali ak laitoriat, anyo go agane, asubun, anyo agimit ng’aleguk.

¹⁵ Kiwa anyun Bat-seba orit agoi go ole mi laitoriat: ak kiga koosit laitoriat mising’; ak kiboisiechin Abisag Jepsunamindet laitoriat.

¹⁶ Ak kiing’uruk Bat-seba kogutung’ji laitoriat. Ak kile laitoriat, Imache nee?

¹⁷ Ak kilenji inendet, Kiiyosie inye kiptaiyandennyu eng’ Jehovah Kamuktaindeng’ung’, kiiyosiechi otwogindeng’ung’ ne chepto, ilenji, Laitorani iman Solomon wering’ung’ ko kaamee, tebe ng’echerennyu ne bo laitornatet.

¹⁸ Ak nguno anyun, keero, laitorani Adonija; amengen inye kiptaiyandennyu laitoriat:

¹⁹ ak kagoeny tuga ak che akwaen ak kechirek ng’isiat, ak koguur werik tugul che bo laitoriat, ak Abiatar tisiindet, koboto Joab kiptaiyatab luget: ago ma kuur Solomon otwogindeng’ung’.

²⁰ Ak keerin konyekab Israel tugul, inye kiptaiyandennyu laitoriat, imwachi ne tebe ng’echeretab laitornatet ne bo kiptaiyandennyu laitoriat ko kagome.

²¹ Anan ngot ko ma u noto, ko ye kagoru kiptaiyandennyu laitoriat koboto kwanisiekyik, kiita ane ak werinnyu Solomon keegu ngelelik.

²² Ak keero, ye kita kong’alali ak laitoriat, konyo go maotiot Natan.

²³ Ak kigimwachi laitoriat kelenji, Keero, maotiot Natan. Ak kingonyo inendet taitab laitoriat, kong’uruk eng’ taitab laitoriat kot kotiing’e togennyi ng’ony.

²⁴ Ak kile Natan, Kiptaiyandennyu, ee laitoriat, kiimwa ile, Tun laitorani Adonija ko kaamee, ak kotebe ng’echerunnyu ne bo laitornatet?

²⁵ Amu kachortagei rani, ak kagoeny tuga ak che akwaen ak kechirek ng’isiat, ak kagoguur werik tugul che bo laitoriat, ak kiptainikab luget, ak Abiatar tisiindet; ak keero, amisiei ak koeeisei eng’ tainnyi, ak kolen, Ingosob laitoriat Adonija.

²⁶ Ago, ma kuura agot ane otwogindeng’ung’, ak Sadok tisiindet, ak Benaia weritab Jeoiada, ak otwogindeng’ung’ Solomon.

²⁷ Tos kiyai kii kiptaiyandennyu laitoriat, ama iborji otwogiguk inendet ne tebe ng’cheretab kiptaiyandennyu laitoriat ko kagome?

²⁸ Kowol anyun laitoriat Daudi kole, Oguurwa Bat-seba. Ak kinyo taitab laitoriat ak kotonon eng’ taitab laitoriat.

²⁹ Ak kiiyosio laitoriat kole, Ko u ye sobei Jehovah, ne kigotiach sobondanyu komong’une ng’oiyondit tugul,

³⁰ ko u ye ayosieun iman eng’ taitab Jehovah Kamuktaindetab Israel, ale, Laitorani iman Solomon wering’ung’, ko kaamee, ak kotebe ng’echerennyu ne bo laitornatet kogeera; ayae ko u noto iman rani.

³¹ Kong’uruk anyun Bat-seba kotiing’e toget ng’ony, ak kogutung’ji laitoriat, kole, Ingosob kiptaiyandennyu laitoriat Daudi koigeny.

³² Ak kile laitoriat Daudi, Oguurwa Sadok tisiindet, ak maotiot Natan, ak Benaia weritab Jeoiada. Ak kibwa taitab laitoriat.

³³ Ak kilenji laitoriat ichek, Omut otwogikab kiptaiyandeng’ung’, ak ogochi Solomon werinnyu kolany nyumbunnyu, ak omutu kochorgei konyo Gion:

³⁴ ak ingoiil inendet eng’ oloto Sadok tisiindet ak maotiot Natan koek laitoriat ne bou Israel: ak koguut iriaget ak ole, Ingosob laitoriat Solomon.

³⁵ Yeityo otogosu osubu inendet, ak konyo kotebe ng’echerennyu ne bo laitornatet; amu egu laitoriat kogeera: ak kaande inendet koek bounindet ne bou Israel ak Juda.

³⁶ Ak kiwolji Benaia weritab Jeoiada laitoriat kolenji, Amen: ingomwa agine Jehovah Kamuktaindetab kiptaiyandennyu laitoriat, ko u noto.

³⁷ Ko u ye kimi Jehovah koboto kiptaiyandennyu laitoriat, ko ingoteb koboto Solomon ko u noto, ak koyai ng’echerennyi ne bo laitornatet koeet kosiir ne bo kiptaiyandennyu laitoriat Daudi.

³⁸ Kichortagei anyun Sadok tisiindet, ak maotiot Natan, ak Benaia weritab Jeoiada, ak Keretik, ak Peletik, ak kogochi Solomon kolany nyumbutab laitoriat Daudi, ak komut inendet kwo Gion.

³⁹ Ak kiinem Sadok tisiindet laletab mwaita eng’ Emait, ak koiil Solomon. Ak kiguut iriaget; ak kile bik tugul, Ingosob laitoriat Solomon.

⁴⁰ Ak kitogos bik tugul kosub inendet, ak kiguut bik ndurerusiek, ak koboiboitu eng’ boiboindo ne o, kot kobotan emet amu cheenywa.

⁴¹ Ak kigas Adonija ak toek tugul che kimi ak inendet ye kingo kagoges amisiet. Ak kingogas Joab cheetab iriaget, kole, Bo nee bolatoni kawa barak eng’ nganaset?

⁴² Ye kita kong’alali, ogeero, koit Jonatan weritab Abiatar tisiindet: ak kile Adonija, Nyo go; amu i chi ne nyigan, ak iibu logoiywek che miach.

⁴³ Ak kiwolji Jonatan Adonija kolenji, Kagoyai iman kiptaiyandennyo laitoriat Daudi Solomon koek laitoriat:

⁴⁴ ak kagoyokto laitoriat Sadok tisiindet, ak maotiot Natan, ak Benaia weritab Jeoiada, ak Keretik, ak Peletik, koba ak inendet, ak kagochi inendet kolany nyumbutab laitoriat:

⁴⁵ ak kagoiil Sadok tisiindet ak maotiot Natan Solomon koek laitoriat eng’ Gion: ak kagotogos eng’ oloto kogasonugei, kot kogululen nganaset kogeny. Noto bolatet ne kogase.

⁴⁶ Ak kogeny tebe Solomon ng’echeretab laitornatet ne bo bounatet.

⁴⁷ Ak kogeny kabwa otwogikab laitoriat koberur kiptaiyandennyo laitoriat Daudi, kole, Ingoyai Kamuktaindeng’ung’ kainetab Solomon kogararanit kosiir neng’ung’, ak koyai ng’echerennyi ne bo laitornatet koeet kosiir neng’ung’: ak kiing’uruk laitoriat eng’ itok.

⁴⁸ Ak kogeny, kamwa laitoriat ko u ni kole, Iberurot Jehovah, Kamuktaindetab Israel, ne kagonde chito kotebe ng’echerennyu ne bo laitornatet eng’ betuni, kogeerei konyekyuk.

⁴⁹ Ak kiarogenso toek tugul che bo Adonija, ak king’eetyo, ak kwo chi tugul orennyi.

⁵⁰ Ak kiiyweis Adonija amu Solomon; ak king’eet, ak kwo, kwo konam kuinoikab kaptisisiet.

⁵¹ Ak kigimwachi Solomon, kelenji, Keero, iywei Adonija laitoriat Solomon; keero, kagonam kuinoikab kaptisisiet, kole, Ingoyosiewa laitoriat Solomon rani kole, mabarei otwogindennyi eng’ rotwetab chok.

⁵² Ak kile Solomon, Ngot koborgei koek chito ne mie, ko maibutyi ng’ony agot agenge eng’ sumeekyik: ago ngot kenyorji inendet yaitiet, komeei.

⁵³ Kiiyokto anyun laitoriat Solomon, ak kigimut inendet konyo kochorgei eng’ kaptisisiet. Ak kinyo ak kogutung’ji laitoriat Solomon: ak kilenji Solomon inendet, Ui gong’ung’.