1 KORINTOEK 9 - BUKUIT NE TILIL

Koesiogei Paulo

¹ Tos ma atiagat? Ma a ne kiyoktoi? Tos kima ageer Jesu Kiptaiyandennyo? Tos ma o boisiennyu okwek eng’ Kiptaiyat?

² Ak ngot ko ma a ne kiyoktoi eng’ alak, ko a ne kiyoktoi eng’ okwek: amu ng’oksetab kayoktoinatennyu ko okwek eng’ Kiptaiyat.

³ Nito anyun ne asorunege eng’ icheget che kina.

⁴ Tos magitinye kimnatet keam ak kee?

⁵ Tos magitinye kimnatet kimutate osotiot ne iyanat, ko u alak che kiyoktoi, ak tupchosiek che bo Kiptaiyat, ak Kepa?

⁶ Anan anege kityo ak Barnaba, che magitinye kimnatet kebagakte boisiet?

⁷ Tos ng’o askarindet ne boisie tugukyik? Ng’o ne minei logoek, ne maamei logoekyik? Anan ng’o ne iyagi akwet, ama luei chego che bo akwet?

⁸ Tos amwae tuguchu ko u biteetab bik? Anan mamwaei agine Ng’atutiet choto?

⁹ Amu kigisir eng’ Ng’atutietab Musa kele, Amerat kutitab eito ye tiechei bek koborie. Tos ibwati Jehovah mising’ agobo eik,

¹⁰ anan mwaei kityo amu achek? Ee, kigisir amu achek: amu inendet ne ibatisiei, ko nyolu kobatis eng’ kamang’unet, ak inendet ne borei koborei komang’u kole sige kiy.

¹¹ Ngo kigigoljok tugukab tamirmiriet, ko tos kiy ne o ngeges tugukwok che bo borto?

¹² Ngot kotinyei bik alak yamdaet eng’ kamugonito koboiywok, ko tos ma ki siirtoot? Ago ma kiboisie achek kamugonito; ago kimuitoi eng’ tuguk tugul, si ma kigirinde logoiywek che miach che bo Kristo.

¹³ Tos mongen ole icheget che boisiei agobo tuguk che tililen koamei tuguk che bo hekalut, ak icheget che ribei kaptisisiet kotinyei kebebertanywa koboto kaptisisiet?

¹⁴ King’at ko u noto Kiptaiyat kole icheget che amdooti logoiywek che miach kosoptos eng’ logoiywek che miach.

¹⁵ Ago tom aboisie tuguchoto agot agenge: amasire tuguchu ale keyaiywa ko u noto: amu kata kaigai ame kosiir kowal chi torornatennyu koek buch.

¹⁶ Amu ngaamde logoiywek che miach, ko matinye kiy ne alosunege; amu kanyol ayai ko u noto; bwa eng’ ane ngot ko maamde logoiywek che miach.

¹⁷ Amu ye ayai ni eng’ magennyu anege, atinye melekto: ago ngo ma bo magennyu anege, atinye ripset ne kigiyanwa.

¹⁸ Nee anyun melektanyu? Noto ko ni, ye aamdoi logoiywek che miach, ayae logoiywechoto miach koek ne maboto melekto, si maboisie kamugennyu mising’ eng’ logoiywek che miach.

Kogiiljingei Paulo komutyi bik Kristo

¹⁹ Agot ngo kiatiagat eng’ bik tugul, ko kiayaige aek ne ratat agobo tugul, si kobiit anyor che siirtoot.

²⁰ Ak eng’ Yahudik, ko kiaige Yahudiot, si kobiit anyor Yahudik; eng’ icheget che mi eng’ Ng’atutiet, ko kiaige agane ne mi eng’ Ng’atutiet, ama kele ami anendet eng’ Ng’atutiet, ago si kobiit anyor icheget che mi eng’ Ng’atutiet;

²¹ eng’ icheget che mami eng’ Ng’atutik, ko kiaige agane chi ne mami Ng’atutik, ma kele mami eng’ Ng’atutik eng’ Jehovah, ago ami eng’ Ng’atutik eng’ Kristo, si anyor ichek che mami eng’ Ng’atutik.

²² Eng’ che nyalulyotin kiaegu ane ne nyalulat, si tamangab anyoru che nyalulyotin: kiaegu tuguk tugul eng’ bik tugul, tamangab amuch asor alak eng’ oret age tugul.

²³ Ak ayae tuguk tugul amu logoiywek che miach, si kobiit anyor yamdaet eng’ choto.

Nyolu kogiilgei bik che machei kobor eng’ sobenywa ne bo Kristo agobo katerteret

²⁴ Mongen ole icheget che ibelegei eng’ labatet koruaei tugul, ago agenge ne nyoru konunet? Oruai anyun, si onyoru.

²⁵ Ak chi age tugul ne igiilegei eng’ ureriosiek, koribegei eng’ tuguk tugul. Yaei anyun ichek noto si konyor kutwet ne ng’emaksei; ago achek ko ne ma ng’emaksei.

²⁶ Alabati anyun ko u noto, ma ko u ne tinyei saget, ayae anyun kabeletab ge ko u noto, ma ko u chi ne birei ola buch:

²⁷ ago abire bortanyu, ak abou inendet: si ma ye kaamji bik alak, kotun keesia.