1 KORINTOEK 7 - BUKUIT NE TILIL

Ng’alek che iimi bich agobo katunisiet, agobo che tom kotunis, ak agobo betetab lol

¹ Nguno anyun agobo tuguk che kiosirwa: ko mie eng’ muren ama twa kobogorio.

² Ago, amu ng’olyotab soksosiek, ko ingotebi chi age tugul ak osotiondennyi, ak ingotebi osotiot age tugul ak manong’otiondennyi.

³ Ingogochi manong’otiot osotiondennyi ko u ye nyoljin: ak ko u noto agine osotiot eng’ manong’otiot.

⁴ Matinyei osotiot inegei kamugo eng’ bortanyi, ago manong’otiot: ak ko u noto agine manong’otiot, matinyei kamugo eng’ bortanyi, ago osotiot.

⁵ Amoetege okwege, kobate ye kochamnyechi eng’ betusiek alak, si onyoru boroindo ne bo saet, si otuiyege kogeny, si mayomak Setani amu motinye ribetab ge.

⁶ Ago amwae ni amu chamjinet, ma ng’atutiet.

⁷ Ago kata achame koigei bik tugul ane. Ago tinyei chi age tugul konunennyi ne bunu Jehovah, age ko u ni, ak age ko u no.

⁸ Ago amwachini che tom kotunis ak mosogik, alenjini, Mie eng’ ichek ngo tebi ko u ane.

⁹ Ago ngo matinyei ribetab ge, ko ingotunis ichek: amu kaigai kotunis kosiir maget ne lalei.

¹⁰ Ago ang’ate che kigotungei ago ma ane, ago Kiptaiyat, ale, Amat kobagakta osotiot manong’otiondennyi

¹¹ (ago ngot kometo, komat kitun, anan kogasyin ak manong’otiondennyi); ak amat kometo manong’otiot osotiondennyi.

¹² Ago amwachini bik alak, ago ma Kiptaiyat, ale, ngo tinyei ne ketupche age tugul osotiot ne maiyanat, ak kochamei kotebi ak inendet, komat kometo.

¹³ Ak kobogoriot ne tinyei manong’otiot ne maiyanat, ak kochamei kotebi ak inendet, ko mat kometo manong’otiondennyi.

¹⁴ Amu kitilili manong’otiot ne maiyanat eng’ osotiot, ak kitilili osotiot ne maiyanat eng’ manong’otiot: nda ma u noto ta ma tililen lagokwok; ago tililen ichek nguno.

¹⁵ Ago ngwo ne maiyanat, ko ingwo: ma ratat ne ketupche mureno anan kwony eng’ ng’alek che u chu: ago kiguurech Jehovah eng’ kalyet.

¹⁶ Amu inaitoi ano inye, ee, osotiondoni, ngo tos mesuru manong’otiondeng’ung’? Anan inaitoi ano inye, ee manong’otiondoni, ngo tos mesoru osotiondeng’ung’?

¹⁷ Ago, ko u ye kigopchechi Kiptaiyat chi age tugul, ko u ye kigoguur Jehovah age tugul, ingotebi ko u noto. Ak ang’ate anyun ko u noto eng’ kanisosiek tugul.

¹⁸ Tos kigiguur chi age tugul ko kagimuratan? Ko mat koigei ne tom kimuratan. Tos kigiguur chi age tugul kotom kimuratan? Ko mat ko ta kimuratan.

¹⁹ Ma kiy kamuratanet, ak ngo ma kimuratan ko ma kiy; ago kerib ng’atutikab Jehovah.

²⁰ Ingoteb chi age tugul ko u ole kiteptoi ye kingeguurei.

²¹ Tos kigiguurin ko i otwogin? Ko mat iimge: ago ngimuchi itiagage, ko mie iboisie.

²² Amu inendet ne kigiguur eng’ Kiptaiyat, ko otwogin, ko chito ne itiagat ne bo Kiptaiyat: ko u noto, inendet ne kigiguur kotiagat, ko otwogetab Kristo.

²³ Kigialak eng’ kamanutiet; amat oegu otwogikab bik.

²⁴ Tupchosiechu, ingoteb chi age tugul ak Jehovah ko u ole kiteptoi ye kingeguurei.

²⁵ Matinye anyun ng’atut eng’ Kiptaiyat agobo bergeinik: ago amwae ko u ole ageertoi, ko u chi ne kigonyor rirenetab Kiptaiyat aek ne kiyani.

²⁶ Abwati anyun ale mie nito, amu bichiindo ne mitei nguno, ale mie koteb chi ko u ole teptoi nguno.

²⁷ Tos, kigeratyin osotiot? Mecheng’ kitiachin. Tos, itiagat eng’ osotiot? Mecheng’ anyun osotiot.

²⁸ Ago, ngot itunisie, ko ma iyai tengek; ak ngitun bergeiyat, ko ma yai inendet tengek. Ago nyoru che u choto nyalilda eng’ borwek: ak amache ale si moiimge.

²⁹ Ago amwae ni, anyun, che kitupche, ale, kagonwagitu betusiek; si kotebi, koboch nguno, che tinyei osotik ko u che matinyei;

³⁰ ak icheget che rirtos, koigei che marirtos; ak icheget che boiboen, koigei che ma boiboen; ak icheget che alisiei, koigei che matinyei kiy;

³¹ ak icheget che boisie ng’ony, koigei che maboisie mising’: amu siirtoi itondab ng’onyuni.

³² Amu amache ale otiagage eng’ kaiimutik. Inendet ne ma itunis kochirjirenjin tuguk che bo Kiptaiyat, ole imuchi kobaibaita Kiptaiyat:

³³ ago inendet ne kigotunis kochirjirenjin tuguk che bo ng’ony, ole imuchi kobaibaita osotiondennyi.

³⁴ Ak mi terjinet agine eng’ osotiot ak bergeiyat. Inendet ne ma kitun kochirjirenjin tugukab Kiptaiyat, si koek ne tilil eng’ borto ak eng’ tamirmiriet: ago inendet ne kigitun kochirjirenjin tugukab ng’ony, ole imuchi kobaibaita manong’otiondennyi.

³⁵ Amwae nito anyun agobo keluneng’wong’; ma si atoorjok mestet, ago agobo noto ne nyolu, si kobiit ochuuljige Kiptaiyat ko motinye kiy ne iimok.

³⁶ Ago ngobwati chi age tugul kole mayachin bergeiyandennyi ne nyolu, ak ngo kagosiirto kororonindab ming’inatennyi, ak ngo mi kiy ne nyoljin, koyai ko u ye machei; ma yai tengek; ingotungei.

³⁷ Ago inendet ne lumdaatgei eng’ muguleldanyi, ko matinyei birjino, ago imuchi koboi magutikyik, ak kagotil ko u nito eng’ muguleldanyi, korib bergeiyandennyi, ko kayai ne mie.

³⁸ Noto anyun, inendet ne igoitoi bergeiyandennyi kitun koyaei ne mie; ak inendet ne ma igoito kitun koyaei ne mie kosiir.

³⁹ Ratat osotiot kota kosobei manong’otiondennyi: ago ngo me manong’otiot, kotiagat inendet kotun chito ne kacham mosoganato: eng’ Kiptaiyat kityo.

⁴⁰ Ago baibai kosiir ngo teb ko u ye konye, ko u ye abwati: ak alen atinye agane Tamirmirietab Jehovah.