1 KORINTOEK 6 - BUKUIT NE TILIL

Koibei bikab Kristo che ting’egei ng’alek, ng’alechato koba kapkiruok

¹ Tos kanyei age tugul eng’ okwek ne ting’e ng’olyo chitab kokwennyi kwo kapkiruok eng’ taitab che ma bo iman, ama eng’ taitab che tililen?

² Anan mongen ole tun iruokyin bik che tililen ng’ony? Ak ngot kotun oruokyini ng’ony, ko tos manyoljinok oruoch agobo tuguk che mengechen?

³ Tos mongen ole tun kiruokyini malaikaisiek? Siirei anyun ne tia, tuguk che bo soboni!

⁴ Ngot otinye ole kiruokyine tuguk che bo soboni, ko tos ondoi koek kiruogik ichek che magiiti kele kiy eng’ kaniset?

⁵ Amwae ni si agonok olilanse. Tos iman, mami chi ne ng’om eng’ kwenung’wong’ ne imuchi kotil ng’alek eng’ kwenutab tupchosiekyik,

⁶ ago imuti tupchet age tupchennyi kwo kapkiruok, ak ne siirei ko, eng’ taitab che maiyanotin?

⁷ Achicha, kagoek nguno lelut eng’ okwek, amu oruokyinige okwege. Amu nee si mochamdege kinyalilak? Kalya si mochamdege kerebenak tuguk?

⁸ Achicha, ago, okweget che oyae ne ya, ak orebisiei, agot eng’ tupchosiek.

⁹ Anan mongen ole matun nyoru icheget che ma bo iman bounatetab Jehovah? Amat kiberberak: mami eng’ che soksei, anan che saei kanamonik, anan che kibegei, anan chemulkwonyinik, anan chemogorgoinik,

¹⁰ anan chorik, anan kipkeinik, anan kibogitinik, anan che chubisiei, anan rebik, che nyoru bounatetab Jehovah.

¹¹ Ak ki u choto alak eng’ okwek: ago kigiunok, ago kigitabanak, ago kigiityok imanda eng’ kainetab Kiptaiyat Jesu Kristo, ak eng’ Tamirmirietab Jehovah nenyo.

Manamegei simdo ak sobetab chi ne bo Kristo

¹² Chamdaat tuguk tugul eng’ ane; ago ma tuguk tugul che nyolu. Chamdaat tuguk tugul eng’ ane; ago mamache koboiywa age tugul eng’ choto.

¹³ Bo amitwogik moet, ak bo moet amitwogik; ago tun yaei Jehovah tuwai koek buch, moet ak amitwogik. Ago borto, ko ma bo sokset, ago bo Kiptaiyat; ak Kiptaiyat, ko bo borto;

¹⁴ ak kiing’eet Jehovah Kiptaiyat, ak tun ing’eetech ak achek eng’ kamuktaennyi.

¹⁵ Tos mongen ole borwekwok ko kebeberwekab Kristo? Ara anyun aiste kebeberwekab Kristo, ak ayai koek kebeberwekab chepkugoniot? Achicha, ma u noto.

¹⁶ Anan, tos mongen ole inendet ne ituitos gei ak chepkugoniot ko borto agenge? Amu, mwaei inendet kole, Egu tuwai borto agenge.

¹⁷ Ago inendet ne ituitos gei ak Kiptaiyat ko tamirmiriet agenge.

¹⁸ Omwee ibetab ge. Tengek age tugul ne yaei chi komitei sang’utab borto; ago inendet ne yaei ibetab ge koyachin bortanyi tengekto.

¹⁹ Anan, tos mongen ole borwekwok ko hekalut ne bo Tamirmiriet ne Tilil ne mitei eng’ okwek, ne otinye eng’ Jehovah? Ama o bo ge okwege;

²⁰ amu kigialenak kamanutiet: otoror Jehovah anyun eng’ borwekwok.