1 KORINTOEK 5 - BUKUIT NE TILIL

Ibetab ge ne ya ne siirei

¹ Mwaat komie kele mitei ibetab ge kwenung’wong’, ibetab ge ne mami agot eng’ Bororiosiek, kele ibegei chi ak osotiotab kwandanyi.

² Ak omendosi, ama agot oarogense, si kobiit keisto eng’ kwenung’wong’ inendet ne kiyai kioto.

³ Amu ane iman, ko mamite eng’ borto, ago amite eng’ tamirmiriet, kaaruokyi anyun inendet ne kiyai kiito ko u noto, ko u ye amite,

⁴ ye koyumge eng’ kainetab Kiptaiyandennyo Jesu, koboto tamirmiriennyu, ak kamuktaetab Kiptaiyandennyo Jesu,

⁵ ogochi Setani chito ne u noto si keng’em borto, si tun kesor tamirmiriennyi eng’ betutab Kiptaiyat Jesu.

⁶ Ma kararan kalosuneng’wong’ bo ge. Tos mongen ole igutu mermerek tutigin kererutiet komugul?

⁷ Ounde mermerek che bo keny, si kobiit oegu kererutiet ne leel, ko u ye mami mermerek eng’ okwek. Amu kigeeny agine aruennyo ne bo Paska, noto ko Kristo:

⁸ noto anyun ongerib igorta, ma eng’ mermerek che bo keny, anan eng’ mermerekab yaitiet ak tengekto, ago eng’ makatiat ne ma kinde mermerek che matinyei kenisiet ak bo iman.

⁹ Kiasirwak eng’ baruennyu ale amonamge ak bik che soksei;

¹⁰ mamwae ale otabanege mising’ che soksei che bo ng’onyuni, anan kipkeinik anan rebik, anan che saei kanamonik; amu nda u noto ta kanyoljok omande eng’ ng’ony:

¹¹ ago nguno asirwok, ale amonamge ak chi age tugul ne kiguure tupchet, ne soksei, anan kipkeiyat, anan ne saei kanamonik, anan ne chubisiei, anan kibogityot, anan rebindet; amat oamjine ak chito ne u noto, achicha.

¹² Amu amage nee aruokyi ichek che mitei sang’? Tos moruokyini okwek ichek che mitei go?

¹³ Ago ichek che mitei sang’ koruokyin Jehovah choto. Oiste anyun chichoto sogoran eng’ kwenung’wong’.