1 KORINTOEK 4 - BUKUIT NE TILIL

Jehovah ne bou che kiyoktoi

¹ Ingoiitech anyun chi kole ki kiboitinikab Kristo, ak ribik che bo ung’otikab Jehovah.

² Eng’ yuto anyun kogeny, kemage ribik kele koek chi age tugul ne kiyani.

³ Ago kit ne ming’in mising’ eng’ ane ale ogina okwek, anan eng’ kiruogetab chi: ee, maginege anege.

⁴ Amu mangenjige kiy: ago magiityina imanda eng’ noto: ago inendet ne kina ko Kiptaiyat.

⁵ Noto anyun amat oruokyi kiy kotom koit betut, agoi konyo Kiptaiyat, ne tun ng’anyei tuguk che ung’otin che bo mesundeito, ak kobarta kabwatutik che bo mugulelwek; si konyor chi age tugul anyun kalosunennyi eng’ Jehovah.

⁶ Nguno anyun che kitupche, kaayai tuguchu koek kayaniet eng’ ane ak Apolo agobo okwek; si kobiit onetge eng’ achek si mosiir tuguk che sirotin; si mamenegei chi agobo chi age, kotil let chito age.

⁷ Amu tos ng’o ne kayain iegu ne ter? Ak nee ne itinye inye ne kima itaach? Ago ngo kiitaache, ko amu nee si ilosuge, ko u ye kima itaache?

⁸ O nyiitotin, kooegu magore, koobou ama kimi: ee, achame ale obou, si kobiit kebou agachek kobotok.

⁹ Amu, alen, kigondeech Jehovah achek che kiyoktoi keegu che bo let eng’ tugul, ko u bik che kigiruokyi kobek: amu kigeyaech keegu che kigeerei eng’ ng’ony, ak eng’ malaikaisiek, ak eng’ bik.

¹⁰ Ki che berberen achek amu Kristo, ago o ng’omen eng’ Kristo; ki nyalulyotin achek, ago o kimen; otinye teegisto okwek, ago mateechech chi.

¹¹ Agot sainito ketinye rubet ak melelda ak kimi ach ngor ak kiluiluchech, ama kitinye ole kimenye;

¹² ak kibirtoige, keboisie eunekyok: ye king’emwech kut, kiberur; ye kiusech, kemuitoi;

¹³ ye kimwaitaenech yaitio, kigoigoi: kiyaech kegergeitu ak busagariekab ng’ony, tuguk che kibuktoi che kilaktoi, agoi nguno.

Kotigonet ne u ne bo kwanda ak kateunet

¹⁴ Masire tuguchu ale si olilanse, ago si atigonok ko u lagokyuk che achame.

¹⁵ Amu ndotinye ribik elfusiek taman eng’ Kristo, ago motinye kwanisiek che chang’: amu kiasichok eng’ Kristo Jesu eng’ logoiywek che miach.

¹⁶ Noto anyun asomok ale oegu kasubikyuk.

¹⁷ Kaayokwok anyun Timoteo amu ng’olyondonito, ne inendet ko lakwennyu ne achame ak iyani, eng’ Kiptaiyat, ne nyonei kabwatwok ortinwekyuk che mi eng’ Kristo, ko u ye anetoti komosta age tugul eng’ kaniset age tugul.

¹⁸ Mendos alak anyun, kolen abere manyonjinok.

¹⁹ Ago negit anyonjok, ngo cham Kiptaiyat; ak aguiye, ma ng’olyotab ichek che meniotin, ago kamugenywa.

²⁰ Amu bounatetab Jehovah ko ma eng’ ng’olyot, ago eng’ kamuget.

²¹ Nee ne omache anyun? Anyonjok ak kirokto, anan eng’ chamnyet ak tamirmirietab talasiet?