1 KORINTOEK 3 - BUKUIT NE TILIL

Kegerei kong’ kabesiosiek

¹ Kitemena anyun, che kitupche, ang’alalwok ko u bik che mi eng’ atebetab tamirmiriet, ago ko u bik che mi eng’ atebetab borto, ko u che manyurunik eng’ Kristo.

² Kiaguenak chego, ma abaenak amitwogik che uuen; amu kitom omuch; achicha, agot nguno kotom omuch;

³ amu ta omi eng’ atebetab borto: amu ko u ye mi kwenung’wong’ ng’etkonda ak boriet, tos momi eng’ atebetab borto, ak obendoti ko u biteetab bik?

⁴ Amu ye mwaei age kole, A bo Paulo; ak kolen age, A bo Apolo; tos ma o bik?

⁵ Nee anyun Apolo? Ko nee Paulo? Kiboitinik che kigonok oyan; ak ko u ye kiigochi Kiptaiyat age tugul.

⁶ Kiagole, kobisi Apolo; ago kiibit Jehovah.

⁷ Noto anyun matilei kiy ne kolei, anan ne ibisi; ago Jehovah ne ibiti.

⁸ Noto anyun, inendet ne kolei ak inendet ne ibisi ko agenge: ago tun nyoru age tugul melektanyi inegei ko u boisiennyi.

⁹ Amu ki kiboitinikab Jehovah che kiboisiei koboto inendet: okwek ko o mbaretab Jehovah, gotab Jehovah.

Ng’alek che tononjin konetik

¹⁰ Kialumde lumeiywot ko u teegindet ne o ne ng’om, ko u mieindab Jehovah ne kigigona; ak teechei chito age baragunnyi. Ago ingorib chi age tugul ole teektoi eng’ baragunnyi.

¹¹ Amu mami lumeiywot age ne imuchi chi kolumda kobate noto kigelum, noto Jesu Kristo.

¹² Ago ngo teech chi baragutab lumeiywondonoto eng’ tahabu, feda, koik che bo kamanutiet ne o, ketik, suswek, mobek;

¹³ tun king’anyei boisietab chi age tugul: amu tun ng’anyei betut, amu king’anyei eng’ mat; ak kotiem mat ole teptoi boisietab chi age tugul.

¹⁴ Ngo tebi boisietab chi age tugul ne kiteech baragunnyi, kotaachei inendet melekto.

¹⁵ Ngo lal boisietab chi age tugul, kobetos tugukyik: ago kisoru inendet; ago ko u ye kisoru eng’ mat.

¹⁶ Mongen okwek ole o hekalut ne bo Jehovah, ak menyok Tamirmirietab Jehovah?

¹⁷ Ak ngo ng’em chi age tugul hekalut ne bo Jehovah, kotun ng’emei Jehovah inendet; amu tilil hekalut ne bo Jehovah, okwek noto.

¹⁸ Amat koberbergei chi. Ngobwati chi age tugul eng’ kwenung’wong’ kole ng’om eng’ betusiechu, ko ingoek ne berber, si kobiit koek ne ng’om.

¹⁹ Amu ng’omnatet ne bo ng’onyuni ko berberindo eng’ Jehovah. Amu kigisir kele, Inendet ne namei che ng’omen eng’ ng’alsenywa:

²⁰ ak kogeny, Ingen Kiptaiyat kabwatutikab che ng’omen, kole buch.

²¹ Noto anyun amat kolosgei chi eng’ bik. Amu tuguk tugul ko chekwok;

²² ngo Paulo, anan Apolo, anan Kepa, anan meet, anan tuguk che mitei, anan tuguk che bwanei; tugul ko chekwok;

²³ ak o bo Kristo; ak Kristo ko bo Jehovah.