1 KORINTOEK 2 - BUKUIT NE TILIL

Ng’omnatosiekab bik ak ng’ang’utietab tuguk

¹ Ak ye kianyonjok, tupchosiechu, ko kima anyo eng’ anyinyindab ng’alalet anan ne bo ng’omnatet, anyo aboruok ung’otietab Jehovah.

² Amu kiabegechi ale mamache anai kiy age tugul eng’ kwenung’wong’ kobate Jesu Kristo, inendet ne kigigartat.

³ Ak kiami kobotok eng’ nyalulet, ak eng’ kaiyweisiet, ak eng’ botanet ne o.

⁴ Ak ng’alalennyu ak ng’olyondennyu ne kiaamdoi ko kima ko ng’alekab kagaigaet che bo ng’omnatet, ago eng’ kaborunetab Tamirmiriet ak ne bo kamuktaet:

⁵ si matonone kayaneng’wong’ ng’omnatetab bik, ago eng’ kamuktaetab Jehovah.

⁶ Ago kimwae ng’omnatet eng’ kwenutab che igesunotingei: ago ng’omnatet ne ma bo betusiechu, anan ne bo bounikab betusiechu, che machei koek buch:

⁷ ago kimwae ng’omnatetab Jehovah eng’ ung’otiet, noto ne kigeuny, ne kiga sib kong’at Jehovah agobo torornatennyo ye kitom kobiit ng’ony:

⁸ ne manaei agot agenge eng’ bounik che bo betusiechu: amu nda kiga nai, ta kima kogartati Kiptaiyatab torornatet:

⁹ ago ko u ye kigisir kele, Tuguk che kima keer konda, ama kas itit, Ak ne kima chut muguleldab chi, Tuguk alak tugul che kichopchi Jehovah icheget che chamei inendet.

¹⁰ Ago king’ang’wech Jehovah eng’ Tamirmiriet: amu isiachi Tamirmiriet tuguk tugul, agot tuguk che bo orit che bo Jehovah.

¹¹ Amu tos chi ng’o ne ingen tugukab chi, kobate tamirmirietab chichoto, ne mitei inendet? Ko u noto mami chi ne ingen tugukab Jehovah, kobate Tamirmiriet ne bo Jehovah.

¹² Ago kima kitaach tamirmiriet ne bo ng’ony, ago tamirmiriet ne bo Jehovah; si kenai tuguk che kigogonech Jehovah buch.

¹³ Tuguchoto agichek che kimwae, ma eng’ ng’alek che ineti ng’omnatetab chi, ago che ineti Tamirmiriet; kiroge tugukab tamirmiriet ak tugukab tamirmiriet.

¹⁴ Mataachei chito ne mi eng’ atebetab borto tuguk che bo Tamirmirietab Jehovah: amu berberindo eng’ inendet; ak temene kobesio tuguchoto, amu naoksei eng’ tamirmiriet.

¹⁵ Ago inendet ne mi eng’ atebetab tamirmiriet kobestos tuguk tugul, ago mami chi ne ibestos ole teptoi chichoto.

¹⁶ Amu ng’o ne kigonai kabwatutikab Kiptaiyat, si kobiit konet inendet? Ago kitinye achek kabwatutikab Kristo.