1 KORINTOEK 16 - BUKUIT NE TILIL

Kayumanik agobo kibananok eng’ Jerusalem

¹ Nguno anyun agobo kayumanik agobo bik che tililen, ko u ye kiang’at kanisosiek che bo Galatia, oyai ak okwek ko u noto.

² Ingogonor chi age tugul eng’ okwek eng’ betut ne bo tai ne bo wigit, ko u che te che kanyor, si mabiit kayumisiet ye tun anyo.

³ Ak ye tun aitu, ayokte alak tugul che kiolewen koboto baronok, koib tuguk che bo aiyebindang’wong’ koba Jerusalem.

⁴ Ak ngot ko nyolu awa agane, kebe tugul.

Ng’alekab Paulo inegei, ak saisere

⁵ Ago anyonjinok, ye kaabunote Makedonia; amu abunoti Makedonia;

⁶ ago abere anyone ketebi ak okwek eng’ betusiek alak anan agot eng’ betusiekab kaititiet, si kobiit omonorseiwa okwek eng’ bandanyu eng’ komosta age tugul ole awendi.

⁷ Amu mamache ageerok nguno asiirtoi eng’ oret; amu amang’u ale atebi kobotok ne matia, ngo cham Kiptaiyat.

⁸ Ago ta atebe Epeso agoi betutab Pentekost;

⁹ amu kogiyatwa kurget ne o ne nyoljin boisionik, ak mi bunik che chang’.

¹⁰ Ngot anyun konyo Timoteo, ko ingoteb kobotok ama eng’ kaiyweisiet; amu boisiei inendet eng’ boisietab Kiptaiyat, ko u ye ayae agane:

¹¹ amat kosas chi inendet anyun. Ago omonorsechi inendet eng’ bandanyi eng’ kalyet si konyo ole ami: amu ageni inendet koboto che kitupche.

¹² Ago eng’ ng’alekab Apolo ne kitupche, kiasom inendet mising’ ale konyonjok koboto tupchosiek: ak kima ko magennyi agot kitigin konyo nguno; ago ta konyonei ye tun nyor boroindo.

¹³ Oripse, olumdege mising’ eng’ kayanet, otebi ko u murenik, ogimegitu.

¹⁴ Ingoyaak eng’ chamnyet tugul che oyae.

¹⁵ Asomok anyun mising’, che kitupche (ongen che bo gotab Stepana, ole icheget tongoanik che bo Akaya, ak kichuljigei koboisiechi che tililen),

¹⁶ ale ogas it okwek che u chu, ak chi age tugul ne toreti eng’ boisiet ak ne birtoegei boisiet.

¹⁷ Ak abaibai eng’ nyonunetab Stepana ak Portunato ak Akaiko: amu kiinyiitwa ichek noto ne rarunot eng’ komostang’wong’.

¹⁸ Amu kiimuung’ji tamirmiriennyu ak neng’wong’: onai anyun komie ichek che u choto.

¹⁹ Igatok kanisosiekab Asia. Igatok Akula ak Priska mising’ eng’ Kiptaiyat, koboto kaniset ne mi gonywa.

²⁰ Igatok tupchosiek tugul. Ogatge eng’ ng’ututet ne tilil.

²¹ Kagatennyu nito ane Paulo eng’ eunnyu.

²² Ngot ko machamei chi age tugul Kiptaiyat, ko ingoek ne chubot. Maran-atha.

²³ Ingotebi kobotok mieindab Kiptaiyat Jesu Kristo.

²⁴ Ingoteb chamnyennyi kobotok tugul eng’ Kristo Jesu. Amen.