1 KORINTOEK 15 - BUKUIT NE TILIL

Ng’eetyetab bik che kigobek

¹ Aboruok anyun, che kitupche, nguno, logoiywek che miach che kiaamwok, choto kiotaach, choto agichek che otonone,

² kisorunenok choto agichek; eng’ ng’alek che kiaamwok, ngot onam komie, ngot ko kima oyan buch.

³ Amu kiagonok eng’ tai noto kiataach agane, ale kime Kristo agobo tengekwogikyok, ko u ye mwaei sirutik,

⁴ ak kigitub; ak kiging’eet eng’ betutab somok ko u ye mwaei sirutik;

⁵ ak kimong’ji Kepa; ye ibata, komong’ji taman ak aeng’;

⁶ yeityo komong’ji tupchosiek che siirei bogol mut komi tugul, che ta komi agoi kora che chang’ eng’ ichek, ago kigoruiyo alak;

⁷ yeityo komong’ji Jakobo; ye ibata, komong’ji che kiyoktoi tugul;

⁸ ak let eng’ tugul, komong’ja agane, ko u ne kigios.

⁹ Amu a ne ming’in eng’ che kiyoktoi, ne ma nyolu keguurena ne kiyoktoi, amu kiaus kanisetab Jehovah.

¹⁰ Ago eng’ mieindab Jehovah a u kit ne a u: ak mieindanyi ne kigigona ko maek buch; ago kiaboisie mising’ asiir ichek tugul: ago ma ane, ago mieindab Jehovah ne kimi kobota.

¹¹ Ngo ane anyun, anan ngo ichek, keamdoi ui tugul, ak u noto kioyan ak okwek.

¹² Ara anyun, ngeamdoi Kristo kele kiging’eet komong’ eng’ che kibek, ko teptoi ano si komwaei alak eng’ kwenung’wong’ kole mami ng’eetyet ne bo che begu?

¹³ Ago ngot ko mami ng’eetyet ne bo che begu, ko kaga ma king’eet Kristo agine:

¹⁴ ak ngo kima king’eet Kristo, ko buch anyun amdaennyo, ko buch kagine kayaneng’wong’.

¹⁵ Ee, ak kagenyoruech kele ki baorinik che bo lembech che bo Jehovah; amu kigebaorian agobo Jehovah kele kiing’eet Kristo: ne kaga ma ing’eet Jehovah, ngot ko maging’eeti che begu.

¹⁶ Amu ngot ko maging’eeti che begu, ko kima king’eet Kristo agine:

¹⁷ ak ngo kima king’eet Kristo, ko buch kayaneng’wong’; ko ta omi eng’ tengekwogikwok.

¹⁸ Noto anyun, icheget che kigoruiyo eng’ Kristo ko kigolusyo.

¹⁹ Ngot ko kogimang’u Kristo eng’ soboni kityo, ko kaga ki bik che tinyei rirek kosiir tugul.

²⁰ Ago kiging’eet anyun Kristo komong’ eng’ che kibek, tongoaniat ne bo icheget che ruitos.

²¹ Amu ko u ye kibunu meet chi, ko kibunu chi agine ng’eetyet ne bo che begu.

²² Amu ko u ye begu tugul eng’ Adam, ko u noto tun kisoobi tugul eng’ Kristo.

²³ Ago chi tugul eng’ komostanyi: Kristo ko tongoaniat; ye ibata ko ichek che bo Kristo, eng’ nyonunennyi.

²⁴ Ye ibata koit anyun let, ye tun igoito inendet bounatet kogochi Jehovah, inendet Kwanda; ye tun kagowong’ bounatet tugul ak kimnatet tugul ak kamuktaet.

²⁵ Amu kanyol kolaitoran inendet matiny, agoi konde bunikyik tugul keldebesaikab kelyekyik.

²⁶ Bunyot ne bo let ne tun king’emei ko meet.

²⁷ Amu, kigonde tuguk tugul keldebesaikab kelyekyik kogas it inendet. Ago ye mwaei kole kindoi tuguk tugul kogas it inendet, kotoogu kele maboto inendet ne kiinde tuguk tugul kogas it.

²⁸ Ak ye tun kaginde tuguk tugul kogas it inendet, eng’ betunoto anyun kinde Werit agine kogas it inendet, si koek Jehovah tugul eng’ tugul.

²⁹ Anan yaei nee anyun che kigibatisanji che kigobek? Ngot ko kaga maging’eeti iman che begu, ko kalya anyun si kibatisan choto agobo ichek?

³⁰ Ko amu nee anyun si kemi ng’oiyondit sait age tugul?

³¹ Abaoriani eng’ kalosunonoto mi eng’ okwek, che kitupche, ne atinye eng’ Kristo Jesu Kiptaiyandennyo ale, amee betut age tugul.

³² Ngo kigibarge ak tiong’ik eng’ Epeso ko u biteetab bik, atinye borot nee anyun? Ngo kaga maging’eeti che begu, ongeamisie ak kee, amu kibegu mutai.

³³ Among’ kiberberak: Ng’emei choronok che yaach atepto ne mie.

³⁴ Ogosu eng’ imanda, amat oyai tengek; amu maingen alak Jehovah: amwae ni si agonok olilan.

³⁵ Ago mwaei chi age, kolen, King’eetitoi ano che kigobek? Ak bwanei eng’ borto ne u nee?

³⁶ Inye ne i berber, noto ne igole inyendet, ko masobei, ngot ko mame:

³⁷ ak noto ne igole, ko megole borto ne tun biitu, ago keswot buch, abere biitune nganok, anan tuguk alak;

³⁸ ago igochin Jehovah borto ko u ye iboiboi inendet, ak kogochin keswot age tugul bortanyi inegei.

³⁹ Banyek tugul ko ma agenge: ago mi alak che bo bik, ak alak che bo tiong’ik, ak alak che bo taritik, ak alak che bo njirenik.

⁴⁰ Mitei borwek che bo kipsengwet, ak mitei borwek che bo ng’ony: ago terjin telunatet ne bo choto bo kipsengwet ak telunatet ne bo choto bo ng’ony.

⁴¹ Mitei lilindo ne bo asista, ak lilindo age ne bo arawet, ak lilindo age ne bo kecheik; amu terjin kecheiyat age ak kecheiyat age eng’ lilindo.

⁴² Ko u noto agine ng’eetyetab che begu. Kigolei eng’ ng’emisiet; king’eeti ko ma komi ng’emisiet:

⁴³ kigolei ko mami teegisto; ak tun king’eeti eng’ telunatet: kigolei eng’ nyalulet; ak tun king’eeti eng’ kamuktaet:

⁴⁴ kigolei borto ne kigisiktoi; king’eeti borto ne bo tamirmiriet. Ngo mi borto ne kigisiktoi, komi agine ne bo tamirmiriet.

⁴⁵ Ko u noto agine, kigisir kele, Kiek chito ne bo tai, Adam, chito ne sobei. Kiek Adam ne bo let tamirmiriet ne igoitoi sobondo.

⁴⁶ Ago maindoi noto bo tamirmiriet, ago noto bo borto; ye ibata ko noto bo tamirmiriet.

⁴⁷ Chito ne bo tai ko bo ng’ony, bo ng’ung’unyek: chito ne bo aeng’ ko bo kipsengwet.

⁴⁸ Ko u ole teptoi ne bo ng’ung’unyek, u choto agichek che bo ng’ung’unyek: ak ko u ole teptoi ne bo kipsengwet, u choto agichek che bo kipsengwet.

⁴⁹ Ak ko u ye kigiib itondab chitab ng’ung’unyek, ko tun kiibe itondab chitab kipsengwet agine.

⁵⁰ Amwae ni anyun, tupchosiechu, ale maimuchi banyek ak korotik konyor bounatetab Jehovah; amaimuchi ne nunei konyor ne manunei.

⁵¹ Ogeero, amwawok ung’otiet: Magiruitosi achek tugul, ago kiwalech achek tugul,

⁵² eng’ ne matia, eng’ kamismisetab konda, eng’ iriaget ne bo let: amu cheei iriaget, si king’eet che kigobek ko ma kotinyei nunet, ak kewalech.

⁵³ Amu kanyol kolaach ne nunei, ne manunei, ak kanyol kolaach nito meei ne mameei.

⁵⁴ Ago ye tun kagolaach nito nunei, ne manunei, ak ko kagolaach nito meei ne mameei, kosulda anyun mwaet ne kigisir kele, Kagelugui meet eng’ kabelisiet.

⁵⁵ Ee, meet, mi ano kabelisieng’ung’? Ee, meet, mi ano ng’wanindang’ung’?

⁵⁶ Ng’wanindab meet ko tengek; ak kimnatetab tengek ko ng’atutik:

⁵⁷ ago kigochini Jehovah kongoi, ne konech kabelisiet eng’ Kiptaiyandennyo Jesu Kristo.

⁵⁸ Noto anyun, che kitupche che achame, ogimegitu, among’ king’eak, oyae otese kotugul boisietab Kiptaiyat, amu ongen ole ma bo buch boisieng’wong’ ne uui eng’ Kiptaiyat.