1 KORINTOEK 14 - BUKUIT NE TILIL

Konunoikab maoinatet, ak che bo kutuswek

¹ Osub chamnyet; ak ocheng’ mising’ konunoik che bo tamirmiriet, ago ne siirei ko oamde logoiywek.

² Amu inendet ne ng’alali eng’ kutit ne magigasei ko mang’alaljin bik, ago Jehovah; amu magasei chi; ago mwaei ung’otik eng’ tamirmiriet.

³ Ago inendet ne amdoi kong’alaljin bik ng’alekab teekset, ak kagimitet, ak kagaigaet.

⁴ Inendet ne ng’alali eng’ kutit koteechegei inegei; ago inendet ne amdoi koteechei kaniset.

⁵ Amakwok anyun okwek tugul ong’alal eng’ kutuswek, ago ne siirei ko oamde: ak o inendet ne amdoi kosiir inendet ne ng’alali eng’ kutuswek, kobate koweech, si kobiit koteegak kaniset.

⁶ Ago nguno anyun, che kitupche, ngot anyonjok ang’alale kutuswek, atoretenok nee, ngot ko mang’alalwok eng’ ng’ang’et, anan eng’ naet, anan eng’ amdaet, anan ko eng’ konetisiet?

⁷ Agot tuguk che masoptos, che cheitos, anan ndurerut anan ketubet, ngo ma ibesio cheosiekwak, kenaitoi ano ne kiguutei anan ne kibutei?

⁸ Amu ngo chei iriaget cheet ne magiguitos, ko ng’o ne chobegei agobo luget?

⁹ O u noto ak okwek, ngot ko motwegu eng’ ng’alek che nyamnyum kegas, kenaitoi ano kit ne kagemwa? Amu ong’alaljini ola buch.

¹⁰ U kele, mitei kutuswek che chang’ che terotin eng’ ng’ony, ama mi ne matinyei kit ne iboru.

¹¹ Ngot ko mangen anyun kit ne mwaei tuguchoto, aegu bunotyot eng’ inendet ne ng’alali, ak inendet ne ng’alali, koegu bunotyot eng’ ane.

¹² O u noto ak okwek, ko u ye omache mising’ koniunoikab tamirmiriet, ocheng’ eng’ kagiiletab ge tuguk che igochin kaniset koteegak.

¹³ Noto anyun, inendet ne ng’alali eng’ kutit, ingosa si koweech ng’alek.

¹⁴ Amu ngasa eng’ kutit ne magigasei, kosaei tamirmiriennyu, ago matinyei logoek ng’omnatennyu.

¹⁵ Nee anyun? Asae eng’ tamirmiriet, ak asae eng’ ng’omnatet agine; atieni eng’ tamirmiriet, ak atieni eng’ ng’omnatet agine.

¹⁶ Amu ngo ma u noto, ko ngiberuri eng’ tamirmiriet, komwaitoi ano Amen ye igoitoi kongoi, inendet ne tebe ole mi che ma inetgei amu manaei kit ne kimwae?

¹⁷ Amu iman, igoitoi inye kongoi komie, ago manyor nin age kit ne imuchi koteech inendet.

¹⁸ Amwachini Jehovah kongoi, ale ang’alale kutuswek kosiirok okwek tugul:

¹⁹ ago achame amwa ng’alek mut eng’ ng’omnatennyu eng’ kanisa, si anet bik alak agichek, kosiir amwa ng’alek elfusiek taman eng’ kutit ne magigasei.

²⁰ Che kitupche, amoegu lagok eng’ ng’omnatet: ago oegu lagok che nyerotin eng’ yaitio, ago oegu che kaoeegitu eng’ ng’omnatet.

²¹ Kigisir eng’ Ng’atutiet kele, Ang’alaljini bichu eng’ bik che bo kutuswek alak, ak eng’ kutuswekab toek; ak agot ngo u noto ko magasa, mwaei Kiptaiyat.

²² Noto anyun kutuswek ko bo kaborunet, ma eng’ ichek che iyanotin, ago eng’ icheget che maiyanotin: ago amdaet ko bo kaborunet, ma eng’ che maiyanotin, ago eng’ ichek che iyani.

²³ Noto anyun ngoyumgei kaniset komugul, ak kong’alal tugul eng’ kutuswek che magigasei, ak ngo bwa go bik che ma inetgei, anan ko che maiyanotin, ko tos mamwaei kole o kibion?

²⁴ Ago ngo amda tugul, ak konyo go chi agenge ne maiyanat, anan ko ne ma inetgei, koger kong’ tugul inendet, ak koruokyin tugul inendet:

²⁵ ak king’anyei ung’otikab muguleldanyi; ak kobutyi ng’ony anyun kong’uruk kolos Jehovah, komwaei kolen mi Jehovah kwenung’wong’ iman.

Ye kiyumge, ko mie koteegogis tuguk tugul

²⁶ Nee anyun, che kitupche? Ye oyumge, kotinyei age tugul tiendab kalosunet, ak konetisiet, ak ng’ang’utiet, ak kutit ne magigasei, ak kaweegetab ng’alek. Ingoyaogis tuguk tugul koteegogis.

²⁷ Ngo ng’alal chi age tugul eng’ kutit ne magigasei, kong’alal aeng’u, anan ko che masiirei somok, ak ingorupgei; ak ingoweech chito age:

²⁸ ago ngo mami weegindetab ng’alek, ko ingosis eng’ kanisa; ak ingong’alaljigei inegei ak Jehovah.

²⁹ Ak ingong’alalso maotik aeng’u anan ko somok; ingoguiyo alage.

³⁰ Ago ngeng’ang’ji ng’olyo age ne tebyei eng’ yoto, ko ingosis ni ka bo tai.

³¹ Amu omuchi okwek tugul oamde agenge agenge, si kobiit konetgei tugul, ak konyor kagaigaet tugul;

³² ak kase it tamirmirikab maotik maotik;

³³ amu Jehovah ko ma Jehovah ne bo bolatet, ago bo kalyet. Ko u eng’ kanisosiek tugul che bo che tililen,

³⁴ ingosisyo kobogorisiek eng’ kanisosiek: amu magichamjin icheget kong’alal; ago ingogas it, ko u ye mwaei ng’atutik.

³⁵ Ak ngo machei ichek konetgei kiy, ko ingoteebe manong’otaikwak eng’ ga: amu kalilano ngo ng’alal kobogoriondo eng’ kaniset.

³⁶ Nee anyun? Tos okwek che kimong’unenok ng’olyotab Jehovah? Anan kibwanjok okwege?

³⁷ Ngobwati chi age tugul kole maotiot, anan ko chi ne mi eng’ atebetab tamirmiriet, ko ingonai tuguk che asirwok, kole choto ko ng’atutietab Kiptaiyat.

³⁸ Ago ngo maingen chi age tugul kiy, ko ingoek kimanaiyat.

³⁹ Noto anyun, che kitupche, ocheng’ mising’ oamde, amat oet keng’alal eng’ kutuswek che magigasei.

⁴⁰ Ago ingoyaogis tuguk tugul ko u ye nyolu ak eng’ chobet ne mie.