1 KORINTOEK 13 - BUKUIT NE TILIL

Chamnyet ko konunet ne o kosiir tugul

¹ Agot ndang’alale kutuswekab bik ak che bo malaikaisiek, amatinye chamnyet, ko kaegu sugunwet ne cheei, anan sanitab sugunwet ne bolei.

² Ak ngot atinye konunetab maoinatet, ak angen ung’otik tugul ak naet tugul, ak ngatinye kayanet tugul, kot amuch autoe tulonok, ago matinye chamnyet, ko a buch.

³ Ak ngot agoite tugukyuk tugul abae kibananok, ak ndagoite bortanyu kebeel, ago matinye chamnyet, ko magelwa kiy.

⁴ Muitoi chamnyet, ak ko tala; ama tinyei chamnyet ng’etkong’, malosegei chamnyet, ama menei,

⁵ ama yaei ne ma nyolu, ama cheng’jingei chechik inegei, ama iiti tagisiet, ama iiti yaitio;

⁶ mabaibai eng’ ne ma bo imanda, ago baibai eng’ imanit;

⁷ sisei eng’ tuguk tugul, iyani tuguk tugul, imang’u tuguk tugul, muitoi eng’ tuguk tugul.

⁸ Mararu chamnyet agoi: ago ngo mitei maoinatosiek, kotun igesugei; ngo mi kutuswek che terotin, kotun sistos; ngo mi naet, kotun igesugei.

⁹ Amu kingen eng’ kebeberta, ak keamdoi eng’ kebeberta:

¹⁰ ago ye tun nyo ne igesunotgei, kogesgei anyun kebeberta.

¹¹ Ye kingo a lakwa, ko kiang’alali ko u lakwa, kiaguitosi ko u lakwa, kiabwati ko u lakwa: nguno, ko kaaegu chito ne o, ko kaamete tugukab lakwandit.

¹² Amu nguno kegeere eng’ kioit, eng’ tamirmiron; ago tun ko togoch eng’ togoch: nguno angen eng’ kebeberta; ago tun anae ko u ye kigenaa.

¹³ Ago tebyei nguno kayanet, kamang’unet, chamnyet, chuto somok; ago ne o eng’ chuto ko chamnyet.