1 KORINTOEK 12 - BUKUIT NE TILIL

Besiotin konunoik che bo Tamirmiriet, ak ko agenge

¹ Nguno anyun agobo konunoik che bo tamirmiriet, che kitupche, ko mamache oegu che mongen.

² Ongen ole kingota ko o Bororiosiek, ko kigiretok obe oldab kanamonichoto che matwegu, ko u ye kigindoiywok.

³ Noto anyun agonok oguiye ole, mami chi ne ng’alali eng’ Tamirmirietab Jehovah ne mwaei kole, Jesu ko chubot; ama mi chi ne imuchi komwa kole, Jesu ko Kiptaiyat, kobate eng’ Tamirmiriet ne Tilil.

⁴ Nguno anyun, komitei konunoik che besiotin, ago agenge Tamirmiriet.

⁵ Ak mitei ripsosiek che besiotin, ago agenge Kiptaiyat.

⁶ Ak mitei boisionik che besiotin, ago agenge Jehovah, ne yaei tuguk tugul eng’ tugul.

⁷ Ago kigochin chi tugul kaborunetab Tamirmiriet si kobiit kotoretegei.

⁸ Amu kigochin chito age ng’olyotab ng’omnatet eng’ Tamirmiriet; ak kigochin age ng’olyotab naet, eng’ Tamirmirionoto:

⁹ kigochin age kayanet, eng’ Tamirmirionoto; ak kigochin age konunoikab kasoobet, eng’ Tamirmirionoto agenge;

¹⁰ ak kigochin age boisionikab kamuget; ak age maoinatet; ak age kabesietab tamirmirik: ak age kutuswek che terotin; ak age weeksetab kutuswek:

¹¹ ago boisie chuto tugul Tamirmiriet ne noto agenge, kopchechin age tugul ko u ye makyin.

Kaborunet ne bunu borto

¹² Amu ko u ye agenge borto, ak kotinyei kebeberwek che chang’, ak kebeberwek tugul che bo borto, agot ngo chang’, ko borto agenge; ko u noto agine Kristo.

¹³ Amu eng’ Tamirmiriet agenge ko kigibatisanech achek tugul keegu borto agenge, ngo Yahudik anan Yunanik, ngo ratotin, anan kotiagotin, ak kigigonech achek tugul kee eng’ Tamirmiriet agenge.

¹⁴ Amu borto, ko ma kebeberta agenge, ago chang’.

¹⁵ Ngot komwa keldo kole, Amu ma a eut, ko ma bo borto; tos ma bo borto amu noto?

¹⁶ Ak ngot komwa itit kole, Amu ma a konda, ko ma bo anyun borto; ko tos ma bo borto amu noto?

¹⁷ Nda borto komugul ko konda, ko ta mi ano kastaet? Nda borto komugul ko itit, ko tos mi ano kang’utoet?

¹⁸ Ago nguno ko kigonde Jehovah kebeberwek, age tugul eng’ ichek, eng’ borto, ko u ye kicham inendet.

¹⁹ Ak nda tugul ko kebeberta agenge, ta mi ano borto?

²⁰ Ago nguno ko kebeberwek ichek che chang’, ago agenge borto.

²¹ Amaimuchi konda kolenji eut, Mamagenen kiy: anan kogeny, maimuchi metit kolenji kelyek, Mamagenok kiy.

²² Ago ne siirei mising’ ko, kebeberwechoto bo borto che u kele nyalulyotin, ko choto che nyolu:

²³ ak kebeberwechoto bo borto, che kiiti kele matia teegistanywa, ko choto che kilaakyin teegisto ne o kosiir; ak kebeberwekyok che matinyei kororonindo ko choto che tinyei kororonindo ne o kosiir;

²⁴ amu kebeberwekyok che tinyei kororonindo, ko mamachei kiy: ago kiituiyo Jehovah borto, kogochin teegisto ne o kosiir kebeberta kirarji;

²⁵ si mabiit kabesiet eng’ borto; ago si koripgei eng’ ripset agenge, kebeberwechoto, korib age age.

²⁶ Ak ngo nyalili kebeberta agenge, konyalildos kebeberwek tugul koboto noto; anan ngegonyiti kebeberta agenge, koboiboitu kebeberwek tugul koboto noto.

²⁷ Nguno anyun, okwek ko o bortab Kristo, ak o kebeberwekab boroto, age tugul eng’ okwek.

²⁸ Ak kigonde Jehovah alak eng’ kaniset, che bo tai ko che kiyoktoi, che bo aeng’ ko maotik, che bo somok ko konetik, yeityo ko kwong’utik, yeityo ko konunoikab kasoobet, toretosiek, kandoinatosiek, ak kutuswek che terotin.

²⁹ Tos tugul ko che kiyoktoi? Tos tugul ko maotik? Tos tugul ko konetik? Tos tugul ko yaikab kwong’utik?

³⁰ Tos tinyei tugul konunoikab kasoobet? Tos ng’alali tugul kutuswek che terotin? Tos iweechi tugul kutuswek?

³¹ Ago ocheng’ mising’ konunoik che eechen. Ak aboruok oret ne mie mising’ ne siirei tugul.