1 KORINTOEK 11 - BUKUIT NE TILIL

¹ Oegu kasubikyuk, ko u ye a kasubindetab Kristo.

Kituchei metitab kobogoriot eng’ tuiyosiekab kanisa

² Aloswok anyun nguno amu obwata eng’ tuguk tugul, ak oribe konetisiosiek ko u ye kiaroruok.

³ Ago amache onai, ole metitab muren age tugul ko Kristo; ak metitab kobogoriot ko muren; ak metitab Kristo ko Jehovah.

⁴ Muren age tugul ne saei anan koamdoi logoiywek ko kerat metit, ko kagotewer metinnyi.

⁵ Ago kobogoriot age tugul ne saei anan koamdoi logoiywek ko yatat metit, ko kagotewer metinnyi: amu kagergeit ak chi ne inemunot met.

⁶ Amu ngo ma tugot metitab kobogoriot, ko ingetilji agine sumeek: ago ngo kalilano eng’ kobogoriot ketilji sumeek anan kinem, ko ingotuch metinnyi.

⁷ Manyoljin iman muren koger metit, amu inendet ko kergeindo ak torornatetab Jehovah: ago kobogoriot ko torornatetab muren.

⁸ Amu kima bun mureno kobogorio; ago kibunu kobogoriot muren:

⁹ ak kogeny, kima kitoi keyai muren agobo kobogorio; ago kigiyai kobogorio agobo muren:

¹⁰ amu nito anyun konyoljin kobogorio kotinyei kaborunet ne bo bounatet eng’ metinnyi, amu malaikaisiek.

¹¹ Ago mami kobogoriondo ngo mami mureno, ak mami mureno ngo mami kobogoriot, eng’ Kiptaiyat.

¹² Amu ko u ye kibunu kobogoriot muren, ko u noto agine mureno kisichei kobogoriot; ago bunu tuguk tugul Jehovah.

¹³ Oruoch okwege: tos nyolu eng’ kobogoriot kosa Jehovah ko ma tugot metit?

¹⁴ Tos mainetok agine biteetab borto, kole, ngo tinyei mureno sumeek che koen, ko kalilanet eng’ inendet?

¹⁵ Ago ngo tinyei kobogoriot sumeek che koen, ko torornatet eng’ inendet: amu kigigochi sumeekyik kotugegei.

¹⁶ Ago ngo machei chi tiiyet, ko ma kitinye biteet ne u noto, anan eng’ kanisosiekab Jehovah.

Ma mie koam chi Igortab Kiptaiyat ama nyoljin

¹⁷ Ago, ye ang’atok eng’ ng’olyondoni, ko maloswok amu oyumige ko ma agobo che miach ago agobo che yaach.

¹⁸ Amu ne bo tai eng’ tugul, ye oyumige eng’ kaniset, agase kele mitei kabesiosiek eng’ kwenung’wong’; ak ayani kitigin ale u noto.

¹⁹ Amu mi ne matiny kabesiosiek eng’ kwenung’wong’, si kobiit kotook ichek che bo iman eng’ kwenung’wong’.

²⁰ Ye oyumige anyun ko maimugaksei keam igortab Kiptaiyat:

²¹ amu eng’ amisieng’wong’ kosib konemu age amitwogikyik kotomo age; ak amei age rubet, kobogiti age.

²² Nee? Motinye gorik che oamisie ak oeeise? Anan osase kanisetab Jehovah, ak ogochini kalilanet icheget che matinyei? Amwawok nee anyun? Tos aloswok eng’ ng’olyondoni? Maloswok.

²³ Amu kiataach eng’ Kiptaiyat noto kiagonok agane, ko u ye kinam makatiat Kiptaiyat Jesu eng’ kemounoto kiging’wektoe inendet;

²⁴ ak kingo kagomwa kongoi, kotonaton, ak kole, Nito ko bortanyu, ne neng’wong’: oyae ni obwatena.

²⁵ Ko u noto agine kikombet, kingo kagoamis, kole, Kikombani ko arorutiet ne leel eng’ korotikyuk: oyae nito kotugul ye oee obwatena.

²⁶ Amu kotugul ye oame makatiandani, ak oee kikombet, obortoi meetab Kiptaiyat agoi koit.

²⁷ Noto anyun chi age tugul ne amei makatiat, anan ne eei kikombet ne bo Kiptaiyat ama nyoljin, koipchingei kiruoget ne bo borto ak korotikab Kiptaiyat.

²⁸ Ago ingosiagei chi, si koamei makatiat, ak koeei kikombet.

²⁹ Amu inendet ne amei ak koeei, koamei ak koeei kiruoget ngo ma ibesio borto.

³⁰ Amu nito anyun nyaluldos che chang’ eng’ kwenung’wong’, ak komiandos, ak koruitos che chang’.

³¹ Amu ngot kitigonige, ko matun kiruokwech.

³² Ago ye kiruokwech, kotigonech Kiptaiyat, si matun kigikyech koboto ng’ony.

³³ Noto anyun, tupchosiekyuk, ye oyumge oamisie, oganyge.

³⁴ Ngo amei chi age tugul rubet, koamis eng’ ga; si mabunji kayumeng’wong’ bo ge kiruoget. Ak ng’alek che kang’et ko ye kaitu, anyo achob.