1 KORINTOEK 10 - BUKUIT NE TILIL

Kiteu eng’ ng’alekab lagokab Israel

¹ Mamache anyun, che kitupche, ale oegu che mongen, ole kimitei kwanisiekyok tugul ng’onyutab boldet, ak kibun tugul nyanjet:

² ak kigibatisanji tugul Musa eng’ boldet ak eng’ nyanjet;

³ ak kiam tugul amdit agenge ne bo tamirmiriet;

⁴ ak kiee tugul eet agenge ne bo tamirmiriet: amu kiee tugul eng’ ruandet ne bo tamirmiriet ne kiisubi ichek: ak ruandanoto ko ki Kristo.

⁵ Ago kima baibaitune mising’ Jehovah che chang’ eng’ ichek: amu kigiserta eng’ ong’atet.

⁶ Kiek tuguchu anyun kaborunoikyok, si magimakyige tuguk che yaachen, ko u ye kimakyigei ichek mising’.

⁷ Amoegu che saei kanamonik, ko u alak eng’ ichek; ko u ye kigisir kele, Kiteb ng’ony bik koamis ak koee, ak kong’eetyo kourerenso.

⁸ Amongesokse, ko u ye kiyai alak eng’ ichek, ak kiibutyo eng’ betut agenge elfusiek tiptemu ak somok.

⁹ Anan ketiem Kiptaiyat, ko u ye kitiem alak eng’ ichek, ak kibar erenok.

¹⁰ Amat ong’unyng’ung’se, ko u ye kiing’unyng’ung’so alak eng’ ichek, ak kibek eng’ ng’emindet.

¹¹ Kiyaak anyun tuguchuto eng’ ichek si koek kaborunet; ak kigisir agobo kateunennyo, achek che kagonyonjech kagesunetab kenyisiek.

¹² Noto anyun ingoripgei si maibut, inendet ne ibwati kole tononi.

¹³ Kima namak yomset kobate noto ne imuchi komuitae chi tugul: ago bo iman Jehovah ne machamdook keyomak kosiir ne te ne omuchi; ago koboto yomsonoto koyaei agine oret ne ochilile, si kobiit omuch omuite.

Kanyol keesie kalosunetab kanamonik

¹⁴ Noto anyun, chamanikyuk, omwee biteetab kanamonik.

¹⁵ Ang’alali ko u ye ang’alaljini bik che ng’omen; obesie kit ne amwae.

¹⁶ Kikombet ne bo kaberuret ne kiberuri, ko tos ma yamdaet ne bo korotikab Kristo? Makatiat ne kibutuli, ko tos ma yamdaet ne bo bortab Kristo?

¹⁷ Amu achek che ki bik che chang’, ko ki makatiat agenge, borto agenge: amu kiame achek tugul makatiat agenge.

¹⁸ Ogeer Israel-o eng’ atebetab borto: tos matinyei yamdaet ak kaptisisiet ichek che amei tiseiywek?

¹⁹ Amwae nee anyun? Amwa ale kiy kit ne kieng’jin kanamonik, anan tos kiy kanamwet?

²⁰ Ago tuguk che igoitoi Bororiosiek koeng’jin oik, ago ma Jehovah: amamache koyai yamdaet ak oik.

²¹ Momuchi oee kikombetab Kiptaiyat, ak kikombetab oik: momuchi oam eng’ mesetab Kiptaiyat, ak mesetab oik.

²² Anan kitache Kiptaiyat konyor ng’etkong’? Tos ki kimen kosiir inendet?

²³ Chamdaat tuguk tugul; ago ma tuguk tugul che nyolu. Chamdaat tuguk tugul; ago ma tuguk tugul che teeksei.

²⁴ Amat kocheng’jigei chi chechik inegei, ago che bo chitab kokwennyi.

²⁵ Kiy age tugul ne kialdoi eng’ kabany, oam, amoteeb kiy amu kabwatet;

²⁶ amu bo Kiptaiyat ng’ony, ak che nyiitat ng’ony.

²⁷ Ngo kuurok age eng’ ichek che maiyani kole kobaak, ak omache obe; ko kiy age tugul anyun ne kaginde taing’wong’, oam, amat oteeb amu kabwatet:

²⁸ ago ngo lenjok chi age tugul, Kagigoitoi kii koek tiseiywot, ko moam, amu inendet ne kagoborun, ak amu kabwatet:

²⁹ kabwatet ne amwae ko ma neng’ung’, ago bo age; amu kalya si koruokyi katiagennyu kabwatet age?

³⁰ Ngot ataache eng’ kongoi, ko amu nee si kemwaitaena yaitio eng’ kit ne koagoite kongoi?

³¹ Noto anyun ngoame, anan ngoee, anan agot eng’ kiy age tugul ne oyae, oyai tugul otorori Jehovah.

³² Amonach Yahudik anan Yunanik, anan kanisetab Jehovah:

³³ agot ko u ye aboiboi bik tugul eng’ tuguk tugul, macheng’e kelunennyu anege, ago kelunet ne bo che chang’, si kobiit kesor.