1 KORINTOEK 1 - BUKUIT NE TILIL

Kagatet ak kongoi

¹ Paulo, ne kigiguur koek ne kiyoktoi ne bo Jesu Kristo eng’ magetab Jehovah, ak Sostene tupchennyo,

² kisirjini kanisetab Jehovah ne mitei Korinto, ichek che kigitaban eng’ Kristo Jesu, che kigiguur koek che tililen, koboto tugul che kuurei kainetab Kiptaiyandennyo Jesu Kristo eng’ komosta age tugul, Kiptaiyandenywa ak ko nenyo:

³ Ingoteb kobotok mieindo ak kalyet ne bunu Jehovah Kwandanyo ak Kiptaiyat Jesu Kristo.

⁴ Amwachini Jehovah nenyu kongoi kotugul agobo okwek, amu mieindab Jehovah ne kigigonok eng’ Kristo Jesu;

⁵ amu kigeyaak oegu magorek mising’ eng’ inendet eng’ kiy age tugul, eng’ ng’alek tugul, ak naet tugul;

⁶ ko u ye kigigimit baornatetab Kristo eng’ okwek:

⁷ si moletu eng’ konunet age tugul; ogeni ng’ang’utietab Kiptaiyandennyo Jesu Kristo.

⁸ Ne igimitok agine agoi let, ko motinye kiy ne kiruogunenok eng’ betutab Kiptaiyandennyo Jesu Kristo;

⁹ Jehovah ko ne kiyani, kigeguurok eng’ inendet obwanji yamdaetab Werinnyi Jesu Kristo Kiptaiyandennyo.

Kabesiosiek eng’ kaniset

¹⁰ Asomok mising’ anyun, che kitupche, eng’ kainetab Kiptaiyandennyo Jesu Kristo, ale, omwa tugul kit agenge, si mabiit kabesiosiek eng’ kwenung’wong’; ago si oegu che igesunotgei kibagenge eng’ kabwatet agenge ak eng’ kiruoget agenge.

¹¹ Amu kigoborua ichek che mi gotab Kloe agobo okwek, tupchosiekyuk, kole mi toiyosiek kwenung’wong’.

¹² Kit anyun ne amwae ko ni, ale, mwaei age tugul eng’ okwek, kole, A bo Paulo; ak a bo Apolo; ak a bo Kepa; ak a bo Kristo.

¹³ Tos pcheat Kristo? Tos kigigartatwok Paulo? Anan kigibatisanjok kainetab Paulo?

¹⁴ Amwachini Jehovah kongoi amu ma abatisan chi eng’ okwek, kobate Krispo ak Gaio,

¹⁵ si mamwa chi age tugul kole kigibatisanjok kainennyu.

¹⁶ Ak kiabatisan che bo gotab Stepana agichek: mangen kogeny, ngo kita abitisan chi age.

¹⁷ Amu ma iyokwa Kristo abatisanis, ago aamda logoiywek che miach: ma eng’ ng’omnatet ne bo ng’alek, si ma kiyai kimurtoiyotab Kristo koek buch.

Kimnatetab kimurtoiyot

¹⁸ Amu berberindo ng’olyotab kimurtoiyot eng’ icheget che lustos; ago eng’ achek che kisoru ko kimnatetab Jehovah.

¹⁹ Amu kigisir kele, Ang’eme ng’omnatetab che ng’omen, Ak aesioi kaguiyetab icheget che iguitos.

²⁰ Mi ano ne ng’om? Mi ano sirindet? Mi ano kiptiiyotiot ne bo kenyisiechu? Tos ma yai Jehovah ng’omnatetab ng’onyuni koberberit?

²¹ Amu eng’ ng’omnatet ne bo Jehovah ko ma nai ng’ony Jehovah eng’ ng’omnatennyi, kicham Jehovah kosor icheget che iyani, eng’ berberindo ne bo ng’olyot ne kiamdoi.

²² Amu somei Yahudik kaborunoik, ak cheng’ei Yunanik ng’omnatet:

²³ ago kiamdoi achek Kristo ne kigigartat, ne kanagutiet eng’ Yahudik, ak ko berberindo eng’ Bororiosiek;

²⁴ ago eng’ ichek che kigiguur, Yahudik koboto Yunanik, Kristo ko kamuktaetab Jehovah, ak ng’omnatetab Jehovah.

²⁵ Amu berberindo ne bo Jehovah ko ng’om kosiir bik; ak nyalulnatetab Jehovah ko kim kosiir bik.

²⁶ Amu, ogeer kuurseng’wong’-o, tupchosiechu, ole ma kiguur che chang’ che ng’omen eng’ atebetab borto, anan che chang’ che kimen, ama che chang’ che toogunotin:

²⁷ ago kilewen Jehovah tuguk che berber che bo ng’ony, si kogochi kalilanet che ng’omen; ak kilewen Jehovah tuguk che nyalulotin che bo ng’ony, si kogochi kalilanet tuguk che kimen;

²⁸ ak kilewen Jehovah tuguk che ma toogunotin che bo ng’ony, ak tuguk che kisasei, ak tuguk che mamitei, si kowal koek buch tuguk che mitei:

²⁹ si mat kolosgei chi age tugul eng’ taitab Jehovah.

³⁰ Ago o bo inendet okwek eng’ Kristo Jesu, ne kigiyai eng’ Kristo Jesu, ne kigiyai eng’ achek koek ng’omnatet ne bunu Jehovah, ak imanda, ak tililindo, ak katiaget:

³¹ si koek, ko u ye kigisir kele, Inendet ne ilosugei, ko ingolosgei eng’ Kiptaiyat.