1 JOHANA 5 - BUKUIT NE TILIL

Keyanetab bikab Kristo

¹ Age tugul ne iyani kole Jesu ko Kristo ko kigesich eng’ Jehovah: ak age tugul ne chamei inendet ne kisichei, kochamei agine inendet ne kigisichei eng’ inendet.

² Kingen eng’ nito kele kichame lagokab Jehovah, ye kichame Jehovah, ak keyae ng’atutikyik.

³ Amu ni chamnyetab Jehovah, ale kerib ng’atutikyik: ama nyigisen ng’atutikyik.

⁴ Amu age tugul ne kigesich eng’ Jehovah koterteri ng’ony: ak ni ko katerteret ne iterteri ng’ony, noto kayanennyo.

⁵ Ak ng’o inendet ne iterteri ng’ony, kobate inendet ne iyani kole Jesu ko Weritab Jehovah?

⁶ Ni ko inendet ne kinyo eng’ beek ak korotik, inendet ko Jesu Kristo; ma nyo eng’ beek ichegei, kinyo eng’ beek ak korotik.

⁷ Ak Tamirmiriet ne baoriani, amu Tamirmiriet ko imanit.

⁸ Amu mi somogu che baoriani, Tamirmiriet, ak beek, ak korotik: ak iyanjindos choto somogu eng’ agenge.

⁹ Ngot ketaache baornatetab bik, ko o baornatetab Jehovah kosiir ne bo bik: amu baornatetab Jehovah ko ni, kele, kigobaorian agobo Werinnyi.

¹⁰ Inendet ne iyani Weritab Jehovah kotinyei baornatanato eng’ inendet: inendet ne maiyani Jehovah ko kagoyai inendet koek kiplembechwa; amu ma iyan baornatet ne kibaorian Jehovah agobo Werinnyi.

¹¹ Ak baornatanato ko ni, kele, kigonech Jehovah sobondab koigeny, ak mi sobonito Werinnyi.

¹² Inendet ne tinyei Werit kotinyei sobondo: inendet ne matinyei Weritab Jehovah ko matinyei sobondo.

Ng’alek che bo let

¹³ Kaasirwak tuguchu, si kobiit onai ole otinye sobondab koigeny, okwek che oyani kainetab Weritab Jehovah.

¹⁴ Ak ni nyiganatet ne ketinye eng’ inendet, kele ngesom kiy age tugul ko u magennyi, kogasech:

¹⁵ ak ngot kingen kele kasech eng’ kit age tugul ne kisome, kingen kele kitinye tuguk che kigesom inendet.

¹⁶ Ngot kogeer chi tupchennyi koyaei tengekto ne ma bo meet, kosom, si kogochi Jehovah sobondo agobo icheget che kayai tengekto ne ma bo meet. Mi tengekto ne bo meet: mamwae ale kosom agobo noto.

¹⁷ Kiy age tugul ne ma bo imanda ko tengek: ak mi tengekto ne ma bo meet.

¹⁸ Kingen kele mayaei tengekto chi age tugul ne kigesich eng’ Jehovah; ago inendet ne kigesich eng’ Jehovah koribei inendet, ama twaei chichoto inendet ne ya.

¹⁹ Kingen kele ki bo Jehovah achek, ak mitei ng’ony komugul eng’ bounatetab inendet ne ya.

²⁰ Ak kingen kele kigonyo Weritab Jehovah, ak kigogonech kaguiyet, si kobiit kenai inendet ne bo iman, ak kemi eng’ inendet ne bo iman, eng’ Werinnyi Jesu Kristo. Nito ko Jehovah ne bo iman, ak sobondab koigeny.

²¹ Lagochu mengech, oistoege kanamonik.