1 JOHANA 4 - BUKUIT NE TILIL

Tiemisiet ne kinae tamirmirik, ngo bo Jehovah

¹ Chamanichu, amoyan tamirmiriet age tugul, ago otiem tamirmirik, ngo bo Jehovah: amu kigomong’ji ng’ony maotik che chang’ che bo lembech.

² Ongen eng’ ni Tamirmirietab Jehovah: tamirmiriet age tugul ne ng’anyei kole kinyo Jesu Kristo eng’ borto ko bo Jehovah:

³ ak tamirmiriet age tugul ne mang’anyei Jesu ko ma bo Jehovah: nito anyun ko kirindoindetab Kristo, ne kiogas kele nyonei: ak nguno komitei ng’ony.

⁴ O bo Jehovah, lagochu mengech, ak kioterter ichek: amu o inendet ne mi eng’ okwek kosiir inendet ne mi ng’ony.

⁵ Bo ng’ony icheget: ko amu noto kong’alali che bo ng’ony, ak kogasei ng’ony ichek.

⁶ Ki bo Jehovah achek: inendet ne ingen Jehovah kogasech; inendet ne ma bo Jehovah ko magasech. Kingen eng’ nito tamirmirietab imanit, ak tamirmirietab kenisiet.

Chanyetab Jehovah ak chamnyetab chi

⁷ Chamanichu, ongechamnye: amu chamnyet ko bo Jehovah; ak age tugul ne tinyei chamnyet ko kigosich Jehovah, ak kongen Jehovah.

⁸ Inendet ne matinyei chamnyet ko maingen Jehovah; amu Jehovah ko chamnyet.

⁹ Kigeng’any eng’ nito chamnyetab Jehovah eng’ achek, kele kigoyok Jehovah Werinnyi ne kigii inegei konyo ng’ony, si kobiit kesopche eng’ inendet.

¹⁰ Nito chamnyet, ma kele kigicham Jehovah, ago kichamech inendet, ak koyok Werinnyi koek tiseiywot agobo tengekwogikyok.

¹¹ Chamanichu, amu kichamech Jehovah ko u ni, konyoljinech agachek kechamnye.

¹² Mami chi ne kigogeer Jehovah ole kigoi; ngot kechamdosi, komenyech Jehovah, ak keyaei chamnyennyi koek ne igesunotgei eng’ achek:

¹³ kingen eng’ nito kele kimenye eng’ inendet, ak komenyech inendet, amu kigogonech keyamde Tamirmiriennyi.

¹⁴ Ak kigegeer ak kebaoriani kele kiiyok Kwanda Werit konyo koek Yetindetab ng’ony.

¹⁵ Age tugul ne ng’anyei kole Jesu ko Weritab Jehovah komenyei Jehovah eng’ inendet, ak komenyei inendet Jehovah.

¹⁶ Ak kingen ak kigiyan chamnyet ne ting’enech Jehovah, Jehovah ko chamnyet; inendet ne menyei chamnyet komenyei Jehovah, ak komenyei Jehovah inendet.

¹⁷ Kigeyai chamnyet koek ne igesunotgei eng’ achek, si kobiit kesich nyiganatet eng’ betutab kiruoget; amu ko u ole u inendet, keu noto achek eng’ ng’onyuni.

¹⁸ Mami kaiyweisiet eng’ chamnyet: ago onei chamnyet ne igesunotgei kaiyweisiet, amu tinyei kaiyweisiet kergong’iet; ak inendet ne iyweisiei ko magiyaei koek ne igesunotgei eng’ chamnyet.

¹⁹ Kichame, amu kisib kochamech inendet.

²⁰ Ngot komwa chi kole, Achame Jehovah, ago wechei ne tupcho, ko kiplembechwa: amu inendet ne machamei ne tupcho ne kigogeer, ko maimuchi kocham Jehovah ne tomo kogeer.

²¹ Kitinye anyun ng’atutioni bunu inendet, kele inendet ne chamei Jehovah, ko ingocham ne tupcho agine.