1 JOHANA 3 - BUKUIT NE TILIL

Itililegei chi ne chamei kwanda

¹ Ogeero, chamnyet ne u nee ne kichamenech Kwanda, kot keguurenech lagokab Jehovah! Ago ki choto achek. Amu nito anyun, ko maingenech ng’ony, amu kima nai inendet.

² Chamanichu, ki lagokab Jehovah nguno, ak tomo keng’any kit ne tun ki u. Kingen kele, ye tun kaging’any inendet, kegergeitu ak inendet; amu tun kigeere ko u ole u inendet.

³ Ak chi age tugul ne tinyei kamang’unoni agobo inendet kotililegei, ko u ye tilil inendet.

Manamegei tengek ak chi ne weritab Jehovah

⁴ Chi age tugul ne yaei tengek koyaei bistoet: amu tengekto ko bistoet.

⁵ Ak ongen ole kiging’any inendet si kobiit koib tengekwogik; ama mi tengek eng’ inendet.

⁶ Chi age tugul ne menyei inendet ko mayaei tengek: ak chi age tugul ne yaei tengek ko tom kogeer inendet, ama ingen inendet.

⁷ Lagochu mengech, among’ kobeetok chi: inendet ne yaei imanda ko bo imanda ko u ye bo imanda inendet:

⁸ inendet ne yaei tengek ko bo oindet; amu kiyai oindet tengek koboch taunet. Kigeng’any Weritab Jehovah amu noto, si kobiit kong’em boisionikab oindet.

⁹ Chi age tugul ne kigesich eng’ Jehovah ko mayaei tengek, amu tebyei keswondennyi eng’ inendet: amaimuchi koyai tengek, amu kigisich eng’ Jehovah.

¹⁰ Ng’ang’aksei lagokab Jehovah eng’ nito, ak lagokab oindet: chi age tugul ne mayaei imanda ko ma bo Jehovah, anan inendet ne machamei ne tupcho.

¹¹ Amu ni ng’olyot ne kiogas koboch taunet, kele kechamnye achege eng’ achege.

¹² Ma ko u Kaen ne ki bo inendet ne ya, ak kibar ng’etab kamet. Amu nee si kobar? Amu ki yaachen boisionikyik, ak ki bo imanda che bo ng’etab kamet.

Chamnyetab tupchoseik

¹³ Amokwong’ie, che kitupche, ngot kowechok ng’ony.

¹⁴ Kingen kele kigemong’une meet kemong’ji sobondo, amu kichame che kitupche. Inendet ne machamei komenyei meet.

¹⁵ Chi age tugul ne wechei ne tupcho ko rumin: ak ongen ole mami rumin ne tinyei sobondab koigeny ne menyei eng’ inendet.

¹⁶ Kingen eng’ nito chamnyet, amu kiigoito sobondanyi agobo achek: ak kanyol kigoite sobonwekyok agobo che kitupche.

¹⁷ Ago chito ne tinyei tugukab ng’onyuni, ak kogeerei ne tupcho kobanani, ak koger muguleldanyi, ama rire inendet, komeng’doi ano chamnyetab Jehovah inendet?

¹⁸ Lagochu mengech, among’ kecham eng’ ng’olyot, anan eng’ ng’elyepta; ago eng’ boisiet ak imanit.

¹⁹ Kinae eng’ nito kele ki bo imanit, ak kigoigoi mugulelwekyok eng’ tainnyi,

²⁰ eng’ kiy tugul ne iruogunenech mugulelwekyok; amu o Jehovah kosiir mugulelwekyok, ak kongen tuguk tugul.

²¹ Chamanichu, ngot ko mairuokwech mugulelwekyok ketinye nyiganatet eng’ taitab Jehovah;

²² ak kiy age tugul ne kisome, kenyoru eng’ inendet, amu kiribe ng’atutikyik, ak keyae tuguk che chamaksei eng’ tainnyi.

²³ Ak ni ng’atutiennyi, kele kiyan kainetab Werinnyi Jesu Kristo, ak kechamnye achege eng’ achege, ko u ye kigonech ng’atutiet.

²⁴ Ak inendet ne ribei ng’atutikyik komenyei eng’ inendet, ak inendet eng’ ine. Ak kingen eng’ nito kele menyech inendet, eng’ Tamirmiriet ne kigogonech.