1 JOHANA 1 - BUKUIT NE TILIL

Sobondab koigeny ne kiging’any eng’ Jesu

¹ Noto ne kimi koboch taunet, noto ne kigegas, noto ne kigegeer eng’ konyekyok, noto ne kigesue, ak konam eunekyok, agobo Ng’olyotab sobondo,

² (ak king’ang’ak sobonoto, ak kigegeer, ak kebaoriani, ak kiboruok sobonoto bo koigeny, ne kimi koboto Kwanda, ak kiging’ang’wech;)

³ noto kigegeer ak kegas ko noto ne keamwok ak okwek, si kobiit osich ak okwek yamdaet kobotech: ee, mitei yamdaennyo koboto Kwanda, ak koboto Werinnyi Jesu Kristo:

⁴ ak kesirwok tuguchuto, si kobiit kosulda boiboiyennyo.

Kanyol koistoegei tengekto bik che machei yamdaet ak Jehovah

⁵ Ak ni ng’olyot ne kigigas eng’ inendet, ak keamwok, kele lapkeiyet Jehovah, ama mi mesundeito eng’ inendet agot kitigin.

⁶ Ngot kemwa kele kitinye yamdaet koboto inendet, ak kebendoti eng’ mesundeito, kegenu, ama kiyae imanit:

⁷ ago ngot kebendote lapkeiyet, ko u ye mi inendet eng’ lapkeiyet, keting’ege yamdaet, ak kotililech korotikab Jesu Werinnyi eng’ tengekwogikyok tugul.

⁸ Ngot kemwa kele magitinye tengek, kegenege, ama mi imanit eng’ achek.

⁹ Ngot keng’anye tengekwogikyok, koyanat ak ko bo imanda konyoiywech kaat tengekwogikyok, ak kotililech eng’ kiy tugul ne ma bo imanda.

¹⁰ Ngot kemwa kele tomo keyai tengek, ko kagiyai inendet koek kiplembechwa, ama mitei ng’olyondennyi eng’ achek.