1 ATEPTAP PEETUUSYEK 5 - BUKUIT NE TILIL

Koitetab ibinwek che kigosiirto

¹ Ak werikab Reuben taitab Israel, (amu ki taita inendet; ago amu kiimuruon itogutab kwandanyi, kigigochi etunatennyi ne bo siget werikab Josep weritab Israel; ak ma kiit tetutikab ibinwek che kigosiirto kisube etunatetab siget.

² Amu kiiterteris Juda kosiir tupchosiekyik, ak kimong’une inendet bounindet; ago kibunji Josep etunatetab siget:)

³ werikab Reuben taitab Israel ko ki: Hanok, Palu, Hesron, ak Karmi.

⁴ Werikab Joel ko ki: Semaia werinnyi, Gog werinnyi, Simei werinnyi;

⁵ Mika werinnyi, Reaia werinnyi, Baal werinnyi;

⁶ Beera werinnyi, ne kiluul Tilgat-pilneser laitoriatab Asuria komut: ki bounindetab bikab Reuben.

⁷ Ak tupchosiekyik eng’ ortinwekwak, ye kingiit tetutikab ibinwek che kigosiirto che bo ibinwekwak; ne o, Jeiel, ak Sekaria,

⁸ ak Bela weritab Asas, weritab Sema, weritab Joel, ne kimenyei Aroer, agoi Nebo ak Baal-meon:

⁹ ak kimeny kotokyigei kong’asis agoi ye kimandoe kebendi ong’atet koboch ainetab Euprate: amu kitesogis tukwak eng’ emetab Gilead.

¹⁰ Ak kiyai luget ak Hagrik eng’ betusiekab Saul, che kibek eng’ eunekwak: ak kimeny emaisiekwak eng’ emet tugul eng’ komostab kong’asis ne bo Gilead.

¹¹ Ak kimeny werikab Gad kotokyin ak ichek, eng’ emetab Basan agoi Saleka:

¹² ki ne o Joel, korub Sapam, ak Janai, ak Sapat eng’ Basan:

¹³ ak tupchosiekwak che bo gorikab kwanisiekwak ko ki: Mikael, Mesulam, Sheba, Jorai, Jakan, Sia, ak Eber, chuto tisab.

¹⁴ Chuto ko ki werikab Abiail weritab Huri, weritab Jaroa, weritab Gilead, weritab Mikael, weritab Jesisai, weritab Jado, weritab Bus;

¹⁵ Ahi weritab Abdiel, weritab Guni, bounikab gorikab kwanisiekwak.

¹⁶ Ak kimeny Gilead eng’ Basan, ak nganasokyik, ak emotinwek tugul che kiyagisie che bo Saron, agoi kiwotosiekwak.

¹⁷ Kigiit chuto tugul eng’ tetutikab ibinwekwak che kigosiirto eng’ betusiekab Jotam laitoriatab Juda, ak eng’ betusiekab Jeroboam laitoriatab Israel.

¹⁸ Werikab Reuben, ak che bo bikab Gad, ak kebebertab bororietab Manase, che bo bik che nyigonen, murenik che kiimuchi koib long’et ak rotwetab chok, ak komwokse kwanget, ak kongen luget komie, ko ki elfusiek artam ak ang’wan ak bogol tisab ak tamanwogik lo che kiimuch komanda koba luget.

¹⁹ Ak kiyai luget ak Hagrik, Jetur, Napis, ak Nodab.

²⁰ Ak kigitoret kobargei ak icheget, ak kiginde Hagrik eunekwak, koboto tugul che kimi koboto bichoto: amu kirirji Kamuktaindet komi luget, ak kigasyi inendet ichek; amu kiimang’ inendet.

²¹ Ak kikweri tukwak; kikweri eng’ tambesikwak elfusiek konom, ak eng’ kechirek elfusiek bogol aeng’ ak konom, ak kokweri eng’ sigirok elfusiek aeng’, ak komut bik elfusiek bogol agenge.

²² Amu kigibar che chang’, amu ki bo luget Kamuktaindet. Ak kimeng’is eng’ oloto kogeer ichek kot koit betut ne kigiluule.

²³ Ak kimeny emonoto lagokab kebebertab bororietab Manase: kitesak koboch Basan agoi Baal-hermon ak Senir ak tulwetab Hermon.

²⁴ Ak chu ko ki kandoikab gorikab kwanisiekwak: Eper, Isi, Eliel, Asriel, Jeremia, Hodabia, ak Jadiel, bik che kimen che nyigonen, bik che toogunotin, kandoikab gorikab kwanisiekwak.

²⁵ Ak kiingelelji Kamuktaindetab kwanisiekwak, ak kiibotgei ak kanamonikab bikab emonoto, che kiga bar Kamuktaindet eng’ tainywa.

²⁶ Ak kiing’eet Kamuktaindetab Israel tamirmirietab Pul laitoriatab Asuria, ak tamirmirietab Tilgat-pilneser laitoriatab Asuria, ak kiimut, bikab Reuben, ak bikab Gad, ak kebebertab bororietab Manase, ak kiimut koba Hala, Habor, ak Hara, kot koit ainetab Gosan, agoi ra.