1 ATEPTAP PEETUUSYEK 27 - BUKUIT NE TILIL

Chobetab lugetab Daudi

¹ Kiek lagokab Israel, ko u koitenywa, noto ko kandoikab gorikab kwanisiek ak kiptainikab elfusiek, ak che bo bogolwogik, ak kiptainikwak che kiboisiechin laitoriat, eng’ ng’olyot age tugul ne bo ripsosiek che kibwanei ak kobendi eng’ arawet age tugul eng’ arawek tugul che bo kenyit, bik elfusiek tiptem ak ang’wan che bo ripset age tugul.

² Kibou ripset ne bo tai ne bo arawet ne bo tai Jasobeam weritab Sabdiel: ak kimi ripsennyi bik elfusiek tiptemu ak ang’wan.

³ Ki bo lagokab Peres, ne o eng’ kiptainik tugul che bo luget ne bo arawet ne bo tai.

⁴ Ak kibou ripset ne bo arawet ne bo aeng’ Dodai Ahoindet, ak ripsennyi; ak Miklot bounindet: ak kitinyei bik elfusiek tiptem ak ang’wan eng’ ripsennyi.

⁵ Kiptaiyat ne bo somok ne bo luget eng’ arawetab somok ko ki Benaia, weritab Jeoiada, tisiindet ne o: ak kitinyei bik elfusiek tiptem ak ang’wan eng’ ripsennyi.

⁶ Benaia-ini ko ki chito ne nyigan eng’ bik sosom, ak kibou bichoto sosom: ak ki bo ripsennyi Amisabad werinnyi.

⁷ Ki Asael ng’etab kametab Joab kiptaiyat ne bo ang’wan eng’ arawet ne bo ang’wan, ak kirubei inendet Sebadia werinnyi: ak kitinyei eng’ ripsennyi bik elfusiek tiptem ak ang’wan.

⁸ Ki Samut Israindet kiptaiyat ne bo mut eng’ arawetab mut: ak kitinyei eng’ ripsennyi bik elfusiek tiptem ak ang’wan.

⁹ Ki Ira weritab Ikes Tekoindet kiptaiyat ne bo lo: eng’ arawet ne bo lo; ak kitinyei bik eng’ ripsennyi elfusiek tiptem ak ang’wan.

¹⁰ Ki Heles Pelonindet, ne bo werikab Epraim, kiptaiyat ne bo tisab eng’ arawet ne bo tisab: ak kitinyei eng’ ripsennyi bik elfusiek tiptem ak ang’wan.

¹¹ Ki Sibekai Husatindet ne bo Seraik, kiptaiyat ne bo sisiit eng’ arawet ne bo sisiit: ak kitinyei eng’ ripsennyi bik elfusiek tiptem ak ang’wan.

¹² Ki Abieser Anatotindet ne bo Benjaminik, kiptaiyat ne bo sogol eng’ arawetab sogol: ak kitinyei eng’ ripsennyi bik elfusiek tiptem ak ang’wan.

¹³ Ki Maarai Netopatindet ne bo Seraik, kiptaiyat ne bo taman eng’ arawet ne bo taman: ak kitinyei eng’ ripsennyi bik elfusiek tiptem ak ang’wan.

¹⁴ Ki Benaia Piratonindet ne bo lagokab Epraim, kiptaiyat ne bo taman ak agenge eng’ arawetab taman ak agenge: ak kitinyei eng’ ripsennyi bik elfusiek tiptem ak ang’wan.

¹⁵ Ki Heldai Netopatindet ne bo Otniel kiptaiyat ne bo taman ak aeng’ eng’ arawetab taman ak aeng’: ak kitinyei eng’ ripsennyi bik elfusiek tiptem ak ang’wan.

¹⁶ Kogeny, bik che kibou bororiosiekab Israel ko ki: bounindet Elieser weritab Sikri ne bo bikab Reuben: eng’ bikab Simeon, ko ki Sepatia weritab Maaka:

¹⁷ eng’ gab Lawi, ko ki Asabia weritab Kemuel: eng’ gab Aron, ko ki Sadok,

¹⁸ eng’ gab Juda, ko ki Eliu, age eng’ tupchosiekab Daudi: eng’ gab Isakar, ko ki Omri weritab Mikael:

¹⁹ eng’ gab Sebulun, ko ki Ismaia weritab Obadia: eng’ gab Naptali, ko ki Jeremot weritab Asriel:

²⁰ eng’ lagokab Epraim ko ki Hosea weritab Asasia: eng’ kebebertab bororietab Manase, ko ki Joel weritab Pedaia:

²¹ eng’ kebebertab bororietab Manase, eng’ Gilead, ko ki Ido weritab Sekaria: eng’ gab Benjamin, ko ki Jaasiel weritab Abner;

²² eng’ gab Dan, ko ki Asarel weritab Jeroam. Chuto ko ki kiptainikab bororiosiekab Israel.

²³ Ago kima iit Daudi che bo kenyisiek tiptem ak koba ng’ony: amu kiga mwa Jehovah kole, Atese Israel kotenit kecheikab kipsengwet.

²⁴ Kitoi Joab weritab Seruia koiit, ago ma iges; ak kibiit neregek eng’ Israel agobo koitonito: ama kisirji koitonoto tetetab ateptab betusiek ne bo laitoriat Daudi.

²⁵ Ak kibou ole kigonore tugukab laitoriat Asmabet weritab Adiel: ak kibou Jonatan weritab Usia ole kigonore tugukab mbarenik, eng’ nganasok, ak eng’ nganasok che mengechen, ak eng’ irimosiek:

²⁶ ak kibou Isri weritab Kelub ichek che kiyaei boisietab mbar, ne bo kabatisietab emet:

²⁷ ak kibou Simei Ramatindet mbarenikab sabibuk: ak kibou Sabdi Sipmindet ruratetab mbarenikab sabibuk che kigonori:

²⁸ ak kibou Baal-hanan Gederindet ketikab emitik ak mogoonik che kimi emet ne soi: ak kibou Joas ole kigonore mwanik:

²⁹ ak kibou Sitrai Saronindet akwotisiek che kiagetos eng’ Saron: ak kibou Sapat weritab Adlai akwotisiek che kimi atebwosiek:

³⁰ ak kibou Obil Ismaelindet tambesik: ak kibou Jedeia Meronotindet sigirok:

³¹ ak kibou Jasis Hagrindet akwotisiekab kechirek. Chuto tugul ko ki bounikab tugukab laitoriat Daudi.

³² Ki kiruogindet Jonatan weritab ng’etab kametab Daudi, ki chito ne ng’om, sirindet: ak kimi Jehiel weritab Akmoni koboto werikab laitoriat:

³³ ak ki kiruogindet Aitopel ne bo gab laitoriat: ki choruetab laitoriat, Hisai Arkindet:

³⁴ ak kirubei Jeoiada weritab Benaia ak Abiatar, Aitopel: ak ki kiptaiyatab lugetab laitoriat, Joab.