1 ATEPTAP PEETUUSYEK 26 - BUKUIT NE TILIL

Kiboitinik che terotin che bo hekalut

¹ Pcheutikab ribikab kurget ko: che bo Koraik ko ki: Meselemia weritab Kore, che bo werikab Asap.

² Ak kitinyei werik Meselemia, Sekaria taita, Jediael ne bo aeng’, Sebadia ne bo somok, Jatniel ne bo ang’wan;

³ Elam ne bo mut, Jeohanan ne bo lo, Eliehenai ne bo tisab.

⁴ Ak kitinyei werik Obed-edom; Semaia taita, Jeosabad ne bo aeng’, Joa ne bo somok, ak Sakar ne bo ang’wan, Netanel ne bo mut.

⁵ Amiel ne bo lo, Isakar ne bo tisab, Peuletai ne bo sisiit: amu kiiberur Kamuktaindet inendet.

⁶ Ak kigisikyi werik Semaia agine, che kibou gotab kwandanywa: amu ki bik che kimen che nyigonen.

⁷ Werikab Semaia ko ki: Otni, Repael, Obed, Elsabad, che ki bik che ki nyigonen tupchosiekwak, Eliu ak Semakia.

⁸ Chuto tugul ko ki werikab Obed-edom: icheget ak werikwak ak tupchosiekwak ko ki bik che kimen eng’ kimnatet agobo otisiet; ki bik tamanwogik lo ak aeng’ che bo Obed-edom.

⁹ Ak kitinyei Meselemia werik ak che tupcho, bik che nyigonen, taman ak sisiit.

¹⁰ Kitinyei Hosa agine, ne bo lagokab Merari, werik; ki ne o Simri, (nganda kima ko taita inendet, ko kiyai kwandanyi inendet koek ne o;)

¹¹ Hilkia ne bo aeng’, Tebalia ne bo somok, Sekaria ne bo ang’wan: ki taman ak somok werik tugul che bo Hosa koboto tupchosiekyik.

¹² Kimi eng’ chuto pcheutikab bik che kiribei kurget, bik che eechen, kotinyei ripsosiek che u che bo tupchosiekwak, si kobois eng’ gotab Jehovah.

¹³ Ak kiser barbarek, bik che mengechen ak che eechen, kobee gorikab kwanisiekwak, agobo ormarichet age tugul.

¹⁴ Ak kibunji barbariat ne kitokyigei kong’asis Selemia. Yeityo koser barbarek agobo Sekaria werinnyi, kiruogindet ne ng’om; ak kimong’ barbariandennyi kotokyigei murot ne bo katam.

¹⁵ Ki bo Obed-edom ne kitokyigei murot ne bo tai; ak kibunji werikyik got ne kigonore tuguk.

¹⁶ Kibunji Supim ak Hosa ne kitokyigei cherongo, ole negite ormarichetab Saleket, eng’ ole kitogostoe, kotokyindos ribik.

¹⁷ Kimi Lawik lo komostab kong’asis, komi ang’wanu komostab murot ne bo katam betut age tugul, komi komostab murot ne bo tai ang’wanu betut age tugul, ak ki aeng’ aeng’ che bo got ne kigonore tuguk.

¹⁸ Kimi bik ang’wanu ye kitogostoe eng’ Parbar, komostab cherongo, komi aeng’ Parbar.

¹⁹ Chuto ko ki pcheutikab ribikab kurget che bo werikab Koraik, ak che bo werikab Merari.

²⁰ Ak eng’ Lawik, ko kiribei Aija tuguk che bo ole kigonore tuguk che bo gotab Kamuktaindet, koboto ole kigonore tuguk che itabanotin.

²¹ Werikab Ladan: werikab Gersonik che bo Ladan, kandoikab gorikab kwanisiek che bo Ladan Gersonindet, ko Jeieli.

²² Werikab Jeieli ko ki: Setam ak Joel ng’etab kamet, che kibou ole kigonore tugukab gotab Jehovah.

²³ Che bo Amramik, che bo Isarik, che bo Hebronik, che bo Usielik:

²⁴ ak kibou Sebuel weritab Gersom, weritab Musa, ole kigonore tuguk.

²⁵ Ak tupchosiekyik: kisich Elieser Reabia werinnyi, Jesaia werinnyi, Joram werinnyi, Sikri werinnyi, ak Selomot werinnyi.

²⁶ Kibou Selomotinito ak tupchosiekyik komoswek tugul ole kigonore tuguk che itabanotin, che kiga kotaban laitoriat Daudi, koboto kandoikab gorikab kwanisiek, ak kiptainikab elfusiek, ak che bo bogolwogik, ak kiptainikab luget.

²⁷ Kiitaban che bo barunenik tuguk che kigibaru eng’ lugosiek, si keteege ole kigobutok eng’ gotab Jehovah.

²⁸ Kibou Selomot ak tupchosiekyik tuguk tugul che kiga kotaban Samuel keerindet, ak Saul weritab Kis, ak Abner weritab Ner, ak Joab weritab Seruia, koboto kiy age tugul ne kiga kotaban chi age tugul.

²⁹ Kiyaei Kenania ak werikyik, che bo Isarik, boisionikab sang’ che bo Israel, koek kiptainik ak kiruogik.

³⁰ Eng’ Hebronik, ko kiribei Asabia ak tupchosiekyik, bik che nyigonen elfut agenge ak bogol tisab, Israel eng’ Jordan bitonin komostab cherongo; agobo boisionik tugul che bo Jehovah, ak otisietab laitoriat.

³¹ Che bo Hebronik, ko ki Jerija ne o, che bo Hebronik, ko u ibinwekwak, eng’ gorikab kwanisiek. Kigicheng’ bichoto eng’ kenyitab artam ne bo laitornatetab Daudi, ak kibiit eng’ ichek bik che kimen che nyigonen eng’ Jaser ne bo Gilead.

³² Ak tupchosiekyik, che ki bik che nyigonen, ko kiek elfusiek aeng’ ak bogol tisab, kandoikab gorikab kwanisiek, che kiinde laitoriat Daudi koboi bikab Reuben, ak Gadik, ak kebebertab bororietab Manase, agobo kiy age tugul ne tokyingei Kamuktaindet, ak ng’alekab laitoriat.