1 ATEPTAP PEETUUSYEK 23 - BUKUIT NE TILIL

Koeti Daudi Solomon koek laitoriat

¹ Kiga koosit Daudi, kiga kochang’a betusiekyik; ak kiyai Solomon werinnyi koek laitoriat koboi Israel.

Chobutik agobo Lawik

² Ak kiiyum bounik tugul che bo Israel, koboto tisiik ak Lawik.

³ Ak kigiit Lawik koboch che bo kenyisiek sosom ak che siirei: ak kiek koitenywa, ko kagiit chito agenge agenge, elfusiek sosom ak sisiit.

⁴ Kitononjin boisietab gotab Jehovah elfusiek tiptemu ak ang’wan eng’ bichoto; ak ki elfusiek lo kiptainik ak kiruogik:

⁵ ak ki elfusiek ang’wan ribikab kurgotik; ak kiilosu Jehovah elfusiek ang’wanu eng’ kibugandinik che kiayae ane, si kilosune Jehovah.

⁶ Ak kipchei Daudi ichek, kopchechi boisionik kobee werikab Lawi: Gerson, Kohat, ak Merari.

⁷ Che bo Gerson ko ki: Ladan ak Simei.

⁸ Werikab Ladan: ne o ko ki Jehiel, Setam, ak Joel, somok.

⁹ Werikab Simei ko ki: Selomot, Hasiel, ak Haran, somok. Chuto ko ki kandoikab gorikab kwanisiek che bo Ladan.

¹⁰ Ak werikab Simei ko ki: Jahat, Sina, Jeus, ak Beria. Chuto ang’wan ko ki werikab Simei.

¹¹ Ak ki ne o Jahat, ak ki ne bo aeng’ Sia: ago kima kotinyei werik che chang’ Jeus ak Beria; koek anyun ichek got agenge ne bo kwanisiek.

¹² Werikab Kohat ko ki: Amram, Isar, Hebron ak Usiel, ang’wan.

¹³ Werikab Amram ko ki: Aron, ak Musa: ak kigitaban Aron si kotaban inendet tuguk che tililen mising’, inendet ak werikyik, koigeny, si kobeelei nyamdutik eng’ taitab Jehovah, koboisiechi inendet, ak koberuris eng’ kainennyi koigeny.

¹⁴ Ago kigiitito werikab Musa chitab Kamuktaindet, oretab Lawi.

¹⁵ Werikab Musa ko ki: Gersom ak Elieser.

¹⁶ Werikab Gersom: ne o ko ki Sebuel.

¹⁷ Ak werikab Elieser: ne o ko ki: Reabia. Ak kima kotinyei Elieser werik alak; ago ki chang’ mising’ werikab Reabia.

¹⁸ Werikab Isar: ne o ko ki Selomit.

¹⁹ Werikab Hebron: ne o ko ki: Jeria, Amaria ne bo aeng’, Jahasiel, ne bo somok, ak Jekameam ne bo ang’wan.

²⁰ Werikab Usiel: ne o ko ki: Mika, ak Isia ne bo aeng’.

²¹ Werikab Merari ko ki: Mali ak Musi. Werikab Mali ko ki: Eleasar ak Kis.

²² Ak kime Eleasar, ama sich werik, kisich tibik kityo: ak kiitun ichek tupchosiekwak werikab Kis.

²³ Werikab Musi ko ki: Mali, Eder, ak Jerimot, somok.

²⁴ Chuto ko ki werikab Lawi ko u gorikab kwanisiekwak, kandoikab gorikab kwanisiekab icheget che kigiit, kobee koitetab kainaik, ko kagiit chito agenge agenge, che kiyai boisietab otisietab gotab Jehovah, koboch che bo kenyisiek tiptem ak che siirei.

²⁵ Amu kile Daudi, Kogogochi Jehovah Kamuktaindetab Israel bikyik kamuung’et; ak menyei inendet Jerusalem koigeny:

²⁶ ak kogeny, ma koiboti Lawik got ne kituiyechin koboto tugukyik tugul che bo boisiennyi.

²⁷ Amu kigiit werikab Lawi eng’ ng’alekab Daudi che bo let, koboch che bo kenyisiek tiptem ak che siirei.

²⁸ Amu ki boisienywa koboisiechi werikab Aron agobo boisietab gotab Jehovah, eng’ seremusiek, ak eng’ gorik che bo orit, ak eng’ kaanyinyetab tuguk tugul che tililen, boisietab otisietab gotab Kamuktaindet;

²⁹ agobo makatinikab kabartaet agichek, ak busiek che tambulul che bo kagochinetab busiek, ngo che bo makatinik che ma kinde mermerek anan che kigelei eng’ tabet, anan che kinuri, ak eng’ tuguk alak tugul che kigerisie ak che terjin eng’ oindo;

³⁰ ak kotonondos karonet age tugul koweekyin Jehovah kongoi ak kolosu inendet, ak ko u noto agine koskoleny;

³¹ ak kogochi Jehovah kagochinoik tugul che kibeelei eng’ sabatosiek, ak ye kaleel arawet, ak eng’ igorwek che kiging’at, eng’ koitenywa ko u ng’atutiet ne kiging’at agobo ichek, eng’ betusiek tugul eng’ taitab Jehovah:

³² si koripso eng’ ripsetab emait ne kituiyechin, ak ripsetab ole tilil, ak ripsetab werikab Aron tupchosiekwak, agobo otisietab gotab Jehovah.