1 ATEPTAP PEETUUSYEK 22 - BUKUIT NE TILIL

Chobutikab Daudi agobo teekseetab hekalut

¹ Yeityo kole Daudi, Ni ko gotab Jehovah Kamuktaindet, ak ni ko kaptisisietab kagochinet ne kibeelei, ne bo Israel.

² Ak king’at Daudi kiyum bunotik che kimi emetab Israel; ak kiinde musogik che waei koik kowai koik, si keteege gotab Kamuktaindet.

³ Ak kichob Daudi karik ng’isiat koek kipchumarisiek che bo kereiywekab ormarichok, ak che bo ole kituiyechin; koboto sugunonik ng’isiat che maiitoksei;

⁴ ak taragonik che maiitoksei; amu kiipchi bikab Sidon ak che bo Turo Daudi taragonik ng’isiat.

⁵ Ak kile Daudi, Ta ko ming’in werinnyu Solomon, ak ko etyet, ak nyolu kogararanit mising’ got ne keteekyin Jehovah, konyor toogunatet ak torornatet eng’ emotinwek tugul: amu noto anyun achopchini tuguk goyoto. Kochob anyun Daudi tuguk ng’isiat kotom kome.

⁶ Kiguur werinnyi Solomon anyun, ak kong’at inendet koteekyi got Jehovah, Kamuktaindetab Israel.

⁷ Ak kilenji Daudi Solomon werinnyi, Kimi muguleldanyu ateekyi got kainetab Jehovah Kamuktaindennyu.

⁸ Ago kinyonja ng’olyotab Jehovah, kolenja, Kiitumde korotik che chang’ mising’, ak iyai lugosiek che eechen: meteekyini got kainennyu, amu kiitumde korotik che chang’ eng’ ng’ony eng’ tainnyu:

⁹ keero, tun kisigun werit, ne egu chitab kamuung’et; ak agochini inendet kamuung’et eng’ bunikyik tugul che mi komoswek tugul: amu kiguure kainennyi Solomon, ak agochi Israel kalyet ak kamuung’et eng’ betusiekyik:

¹⁰ teekyin inendet got kainennyu; ak koek werinnyu, ak aegu kwandanyi; ak agimit ng’echeretab laitornatet ne bo bounatennyi eng’ Israel koigeny.

¹¹ Ara anyun, werinnyu, ingoteb Jehovah koboten; ak ibor, ak iteech gotab Jehovah Kamuktaindeng’ung’, ko u ye kigomwa agobo inye.

¹² Ingogonin Jehovah kaguiyet ak naet, ak kogonin ng’atutiet agobo Israel; si kobiit irib ng’atutietab Jehovah Kamuktaindeng’ung’.

¹³ Ibor anyun, ngot irib iyai ng’atutik ak kiruogutik che kiiyomis Jehovah Musa agobo Israel: kimitu, nyiganitu; ameiywei, anan itoptoben.

¹⁴ Keer anyun-o, kiachopchi gotab Jehovah eng’ nyalildanyu talentaisiek elfusiek bogol che bo tahabu, ak talentaisiek elfut konyil elfut che bo feda; koboto sugunonik ak karik che maiitoksei; amu ng’isiat: kiachob ketik agichek ak koik; ak imuchi ko ta ites alak.

¹⁵ Ak itinye kogeny kiboitinik che chang’ kot, waikab koik ak che boisie koik ak ketik, ak bik tugul che ng’omen eng’ boisiet age tugul;

¹⁶ maiitoksei tahabu, ak feda, ak sugunonik, ak karik; ng’eet anyun, boisie, ak ingoteb Jehovah koboten.

¹⁷ King’at kogeny Daudi bounik tugul che bo Israel kotoret werinnyi Solomon, kolenji,

¹⁸ Tos mami kobotok Jehovah Kamuktaindeng’wong’? Ak ma konok kamuung’et eng’ komoswek tugul? Amu kiinde eunnyu bik che menyei emoni; ak kigiterter emet eng’ taitab Jehovah, ak eng’ taitab bikyik.

¹⁹ Ara anyun, ochob mugulelwekwok ak sobonwekwok, ocheng’ Jehovah Kamuktaindeng’wong’, ong’eetye anyun, oteech ole tilil ne bo Jehovah Kamuktaindeng’wong’, si oibu moingetab arorutietab Jehovah ak tuguk che tililen che bo Kamuktaindet, kobwa got ne kiteekyin kainetab Jehovah.